Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me pengajaren Salomo, anak Daud raja Israel.
2 Tujunna eme nampati kalak gelah pentar dingen ngaloken pengajaren si mehuli, janah ngantusi ranan si mbages ertina.
3 Iajarkenna kalak maka nggeluh pentar, bujur, adil dingen benar.
4 Iajarkenna kalak si langa erpengalamen gelah cerdik, kalak si nguda gelah pantas dingen pentar.
5 Pengajaren enda banci nambahi pemeteh kalak pentar, janah kalak si nggo meganjang sekolahna pe banci erlajar i jenari.
6 Alu bage banci mbages isipatina erti si terbuni i bas pengajaren enda janah ietehna njabap persoalen-persoalen si ibereken kalak pentar.
7 Guna ndatken pemeteh, si pemenana si la banci la lit i bas kalak eme mehamat dingen erkemalangen man TUHAN. Kalak lenge la nggit mperdiateken kepentaren dingen la ia nggit erlajar.
8 O anakku, perdiatekenlah kai si ikataken nande bapandu man bandu,
9 sabap ajarenna e nambahi lagu langkah si mehuli kap, si desken rudang-rudang i babo takalndu tah pe bura-bura i bas kerahungndu si erbahanca kam mejile.
10 O anakku, adi iajuk-ajuk kalak jahat kam ula kam nggit.
11 Kune ikatakenna nina, "Ota si darami kalak maka si bunuh! Ota sipesenang dirinta alu nggempangi kalak si la ersalah.
12 Tupung sijumpai ia nggeluh alu mejuah-juah, tapi tupung si tadingken ia nggo mate.
13 Sirampuk barang-barangna si meherga gelah rumahta dem alu barang-barang rampasen.
14 Ota ras kita, gelah si bagi-bagiken barang si itangko kita e."
15 O anakku ula kam nggit ngikutken kalak si bage. Sirangilah ia.
16 La ia erkari-kari adi erbahan jahat. Katawari pe nggo sikap ia lako munuh.
17 Perik-perik pe la nggit ndedeh siding adi idahna siding e itogeng.
18 Tapi kalak jahat ikurukna kap lubang jadi siding man kesahna janah ia nge gedap ku bas.
19 Perampuk, kesah kap asamna ngerampuk -- enda me si jadi man kalak si nggeluh ndarami untung melket.
20 Dengkehkenlah! Kepentaren erlebuh i gedang-gedang pasar bage pe i tiga.
21 Megang sorana erlebuh i pintu-pintu gerbang dingen i bas ingan pulung jelma si nterem.
22 Nina, "O kalak motu! Asa kai nari atendu dekahna kam tetap motu? Asa kai nari dekahna meriah iakapndu i bas kebodohenndu janah la nggit erlajar?
23 Tinggelken adi kam kutembehi, gelah kam kuajarken alu mehuli jenari kubereken pemetehku man bandu.
24 Nggo kam kudilo dingen kuendik-endik tapi la ibegikenndu.
25 Kerina ajarku la diatendu pe, dingen la atendu ngena adi kam kupandang.
26 Emaka tupung kam i bas kiniseran, tawa aku. Tupung kam i bas kebiaren kuguro-guroken kam.
27 Kutawa-tawai kam tupung kam iderpa galumbang kiniseran si reh desken angin kalinsungsung, seh maka kam susah janah mesui atendu.
28 I je maka ilebuhndu aku, tapi la kualoi, idaramindu aku tapi la kam jumpa ras aku.
29 La pernah turah ukurndu maka perlu kepe pemeteh. La kam nggit ngikutken TUHAN.
30 La pernah kam nggit ngaloken ajarku, janah la pernah iperdiatekenndu kune kupandang kam.
31 Dage nanamindu me bekas perbahanenndu, janah mesui me atendu.
32 Kalak si la erpengalamen, mate erkiteken itulakna kepentaren.
33 Tapi kalak si megiken kepentaren, teneng geluhna janah la perlu ia mbiar."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA