Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne sikamma pappakainga’na Salomo ana’ bura’nena Daud, karaeng Israel.
2 Matu-matunna iamintu untu’ antulungi taua sollanna naasseng antekamma batena nakkulle a’jari tu cara’de’, siagang naasseng atorang baji’na nikanaya katallassang, kammayatompa nakkulle napahang battuanna kana rapang-rapang malantanga battuanna.
3 Anne sikamma pappakaingaka naajaraki taua antekamma nakkulle a’jari tu cara’de’ lalang tallasa’na, lambusu’, adele’ siagang annaba.
4 Naajaraki tau tenaya pangalamanna sa’genna a’jari tarang pikkiranna, kammayatompa tau rungkaya naajaraki a’jari tau cara’de’ siagang appikkiri’ kamma tau toa.
5 Lanri anne sikamma pappakaingaka namanna tau cara’deka lanatambai tongi pangngassenganna, kammayatompa tau niaka sikolana lanipimping tongi.
6 Lanri kammana nakkullemo naselangngi apa battuang taccokkona anjo pappakaingaka siagang napahang kana-kananna tau cara’deka kammayatompa sikamma passala’ napakkuta’nangnganga ke’nanga.
7 Sollanna akkulle nigappa pangngassengang sitojennaya, uru-urua parallu niparhatikang iamintu parallui taua mappakala’biri’ siagang malla’ mae ri Batara. Tau toloa tena naanggaraki kacara’dekanga siagang taerokai niajara’.
8 Parhatikangi kananna anrong manggenu, anakku,
9 saba’ anjo sikamma ajaranna ke’nanga natambai akkala’ baji’nu, sanrapang belo-belo ri ulunnu siagang rante bulaeng ampakaga’gai tanja’nu.
10 Punna nanyonyokko tau rungkaya, anakku, teako turuki panynyonyo’na ke’nanga.
11 Ebara’ nakana ke’nanga, "Umba, ki’lampa mange a’boya tau nampa niborongi. Sollanna nia’ nigaukang, umba naniba’ji tau tenaya salana.
12 Kamma-kamma anne sannangi nyawana siagang sehaki tubuna ke’nanga, mingka sallang la’jari sangkammai tau sitangnga mate ke’nanga.
13 Niallei barang-barang ka’jala’na ke’nanga, sollanna rassi ballatta siagang barang-barang nirampasa’.
14 Umba, amminawang mako. Sinampe’ nanibage sangkamma-kamma anjo barang-barang nirampasaka."
15 Teako amminawangngi mae ri tau kammaya anjo, ikau ana’-anakku! Pakabellai kalennu battu ri ke’nanga.
16 Tena nalammakkang ke’nanga punna tenapa na’gau’ ja’dala’. Eroki akkaro-karo ke’nanga ammuno.
17 Manna jangang-janganga tena todong nalantama’ ri sikko’ nitannanga ri dallekang matanna,
18 mingka anjo tau ja’dalaka ba’lalo kalenna tonji ke’nanga natannangngi sikko’, iamintu sikko’ lambalai kalenna ke’nanga.
19 Kamma memangi, angkanaya tau ammakea katerassang a’boya dalle’, nyawana tonji ke’nanga lanapabayara’.
20 Pilangngeri! Kacara’dekanga akkio’-kioki ri agang-aganga siagang ammarrang-marrangi ri sikamma paranga!
21 Akkio’-kioki ri sikamma pakke’bu’ lompoa siagang ri tampa’-tampa’ suaraka, angkana:
22 "He tau dongoka! Siapa sallonu tuli lakamma? Kerepi wattu nanupammari ambawang-bawangngangi pangngassenganga siagang ansorongbokoi pappilajaranga?
23 Pilangngeria’ punna kupasaileko, na lakupa’nyata bonena atingku, siagang kuajarrangko pangngassengangku.
24 Le’ba’ mako kukio’ ngaseng, mingka taerokako siagang tena ngaseng nujampangi.
25 Sikontu pappakaingakku nubalang parekangi siagang pappasaileku nusorongbokoi.
26 Lanri kammana, punna cilakako, lakukakkaliko. Punna nabattuiko malla’, lakucau-cauko.
27 Ba, lakucau-cauko punna lussakko siagang sessako lanri nitujuko ri bala ia battua sanrapang anging lompo.
28 Anjo wattua lakkio’ ngasengko mae ri nakke, mingka talappialia’. Lanuboya’ ri kere-keremae, mingka talanubuntula’.
29 Sangkamma ngasengko tau tenaya nale’ba’ nungai anggappa pangngassengang, kammayatompa limpuruki bukunnu mannuruki ri Batara.
30 Tale’bakako ero’ antarimai sikamma pappakaingakku siagang sikamma pappasaileku.
31 Lanri kammana, lanukasia’ ngasengi sallang kale’bakkanna sikamma panggaukang-panggaukannu siagang rancana-rancana kodinu.
32 Tau tenaya pangalamanna lamatei lanri tanajampangia’, kammayatompa tau toloa laancuruki lanri tanajampangia’.
33 Mingka tau mappilangngeria ri nakke laniparakai. Laamangi lalang tallasa’na siagang tena naparallu malla’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA