Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma dompak si Musa,
2 “Hatahon ma hubani halak Israel, anggo das ma hanima hu tanoh siianonnima ai, na sihol layak-layakkonon-Ku bennima,
3 anjaha sihol galangkononnima humbani lombu barang biribiri, sada galangan apuy atap galangan situtungon atap galangan sisayaton laho manggoki bagah-bagah barang galangan niojur ni uhur bani ari rayanima, laho mambahen uap na misbou hubani Jahowa,
4 jadi barang ise na sihol manggalangkon galanganni hubani Jahowa, maningon boanonni do bahen galangan sipanganon saparsapuluh efa itak na lumat, na niagu pakon saparompat hin minak,
5 anjaha maningon boanonmu homa anggur bahen galangan siinumon saparompat hin hasoman ni galangan situtungon barang galangan sisayaton hasoman ni ganup anak ni biribiri.
6 Atap bani sada biribiri tunggal, maningon pasirsironmu do bahen galangan sipanganon dua parsapuluh efa itak na lumat, na niagu pakon minak sapartolu hin;
7 anjaha bahen galangan siinumon ai maningon galangkononmu do sapartolu hin anggur, bahen uap na misbou bani Jahowa;
8 anjaha anggo sihol galangkononmu sada anak ni lombu bahen galangan situtungon barang galangan sisayaton, laho manggoki bagah-bagah barang galangan pardameian hubani Jahowa,
9 maningon boanonmu do hasoman ni anak ni lombu ai bahen galangan sipanganon tolu parsapuluh itak na lumat, na niagu pakon minak satongah hin;
10 anjaha maningon galangkononmu homa anggur bahen galangan siinumon satongah hin, songon galangan apuy, uap na misbou bani Jahowa.
11 Maningon sonai bahenon bani ganup lombu barang biribiri tunggal, bani ganup biribiri boru-boru barang hambing.
12 Romban hubani bilangan ni pinahan sigalangkononnima ai, maningon sonai bahenonnima bani ganup galangan mangihutkon bilanganni.
13 Sagala halak pangisi ni tanoh ai maningon sonai bahenonni laho manggalangkon galangan apuy bahen uap na misbou bani Jahowa.
14 Anjaha anggo manginsolat sada halak dagang rap pakon hanima barang marianan ia i tongah-tongahnima marsundut-sundut, anjaha sihol galangkononni galangan apuy bahen uap na misbou bani Jahowa, maningon bahenonni do songon na binahennima ai.
15 Sada do aturan bani tumpuan in, bennima pakon bani halak na manginsolat; aturan na totap do in bani ginomparnima marsundut-sundut; usih songon hanima, maningon sonai do halak dagang i lobei ni Jahowa.
16 Maningon sisada titah pakon sisada aturan do hanima pakon halak dagang na manginsolat i tongah-tongahnima.”
17 Dob ai nini Jahowa ma hubani si Musa,
18 “Hatahon ma hubani halak Israel, anggo das ma hanima, hu tanoh na sihol arahkonon-Ku hanima,
19 anjaha anggo ipangan hanima ma ruti gogoh ni tanoh ai, maningon galangkononnima do galangan sitatangon bani Jahowa.
20 Humbani limbuah ni itak ni gandum, maningon galangkononmu do sada kuei bahen galangan sitatangon; usih songon galangan sitatangon na humbani pardogeian maningon sonai do ia tatangonmu.
21 Maningon bereonnima do hubani Jahowa humbani limbuah ni itak ni gandumnima bahen galangan sitatangon, torus marsundut-sundut.”
22 Tapi anggo kahou hanima, gabe seng ihorjahon hanima ganup tonah on, na ipatugah Jahowa hubani si Musa,
23 sagala na tinonahkon ni Jahowa bannima marhitei si Musa, singgan ni ari dob martonah Jahowa pakon hu lobeian on torus marsundut-sundut,
24 jadi anggo ponop bani pangidah ni tumpuan ai tarjadi hakahouon ai, maningon galangkonon ni ganup tumpuan ai do sada anak ni lombu bahen galangan situtungon, gabe uap na misbou bani Jahowa, rap pakon galangan sipanganonni pakon galangan siinumonni romban hubani aturan ai; sonai homa sada hambing tunggal bahen galangan pardousaon.
25 Maningon bahenon ni malim ai ma pardearan bani ganup tumpuan ni halak Israel, ase sasap dousa ni sidea ai, ai na so tinuntun do ai; maningon sidea do mamboan galangan ni sidea bahen galangan pardousaon ni sidea, ai ma galangan apuy bani Jahowa ampa galangan pardousaon ni sidea ilobei ni Jahowa halani hakahouon ni sidea ai.
26 Jadi salosei ma dousa ni ganup tumpuan ni halak Israel, age dousa ni halak dagang na manginsolat i tongah-tongah ni sidea, ai kahahouon do ai bani haganup bangsa ai.
27 Anjaha anggo mardousa sada halak halani hakahouonni, maningon boanonni do sada hambing boru-boru na marumur satahun bahen galangan pardousaon.
28 Maningon bahenon ni malim ai do pardearan bani halak na kahou ai, na mardousa i lobei ni Jahowa ibagas na so tinuntun, mambahen pardearan bani, jadi salosei ma dousani.
29 Maningon sada do titah bennima, age bani halak Israel pangisi ni tanoh in, age bani halak dagang na manginsolat i tongah-tongahnima, anggo marsalah ia halani hakahouonni.
30 Anjaha anggo adong sahalak na mardousa halani jungkatni, age pangisi ni tanoh ai ia, age halak dagang na manginsolat i tongah-tongahnima, na mangapasi Jahowa do ia ai, halani ai maningon siapkonon do halak sisonai ai hun tongah-tongah ni bangsani.
31 Halani mahiri ibahen hata ni Jahowa, anjaha iosei tonah-Ni, maningon siapkononkon do jolma sisonai ai, maningon manginsonoh hubani do hajahatonni.
32 Jadi sanggah i halimisan halak Israel, jumpah sidea ma sada dalahi na marsoban-soban bani ari Sabat.
33 Jadi iboban halak na mangidahsi ai ma ia hubani si Musa, si Aron pakon hubani ganup tumpuan ai.
34 Dob ai ipatutupkon sidea ma ia hubagas tutupan, ai seng ope tangkas ibotoh sidea uhum sidabuhon hu bani.
35 Nini Jahowa ma hubani si Musa, “Maningon marutang hosah do dalahi ai; maningon ganup tumpuan ai manggijigsi bani batu i darat ni tumpuan ai.”
36 Jadi ganup ma tumpuan ai mangarahkonsi luar hu darat ni partumpuan ai, lanjar igijigi sidea ma ia matei bani batu, songon na tinonahkon ni Jahowa hubani si Musa.
37 Dob ai nini Jahowa ma hubani si Musa,
38 “Hatahon ma hubani halak Israel, ase ibahen sidea rambu bani suhi ni pakean ni sidea torus marsundut-sundut, anjaha maningon bahenon ni sidea do bani rambu ni ganup suhi sada tali bonang na mahonda.
39 Gabe rambu pardingatan ma ai bennima; anggo ididah hanima ai, maningon dingatonnima ma titah ni Jahowa anjaha horjahononnima ai, ase ulang iirikkon hanima ojur-ojur ni uhur barang matanima, gabe madabuh hubagas parbangkison halani ai,
40 ase idingat anjaha ihorjahon hanima ganup tonah-Ku, gabe pansing hanima bani Naibatanima.
41 Ahu do Jahowa, Naibatanima, na mangarahkon hanima luar hun Masir, ase Ahu gabe Naibatanima, Ahu do Jahowa Naibatanima.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA