Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ibereken TUHAN man Musa,
2 peraturen-peraturen si arah teruh enda gelah iikutken kalak Israel i bas taneh si ibereken TUHAN AteNa man bana.
3 Jenggi lembu, bajar biri-biri, biri-biri, ntah kambing banci ipersembahken man TUHAN jadi persembahen tutungen ntah jadi sada persembahen guna nehken sada padan si nggo ibahan man TUHAN ntah jadi sada persembahen riah ukur ntah jadi sada persembahen tupung pesta-pesta agama biasa; merim iakap TUHAN nganggeh bau persembahen pangan enda.
4 Ise si mpersembahken biri-biri ntah kambing jadi persembahen tutungen man TUHAN, rikut ras tep-tep sada asuh-asuhen e arus ibabana sada kilo tepung icampur ras sada liter minak saitun jadi persembahen buah gandum. Radu ras si e arus pe ipersembahken sada liter lau anggur.
5 (Bil 15:4)
6 Adi ipersembahken sada bajar biri-biri, arus ka pe ipersembahken dua kilo tepung gandum icampur ras sada setengah liter minak saitun jadi persembahen buah gandum.
7 Tambah si e arus pe ibabana sada setengah liter anggur. Merim iakap TUHAN nganggeh bau persembahen-persembahen enda kerina.
8 Adi sada jenggi lembu ipersembahken man TUHAN jadi sada persembahen tutungen ntah pe jadi sada persembahen guna nehken sada padan man Dibata ntah pe jadi sada persembahen persadan,
9 arus pe ipersembahken persembahen buah gandum, eme telu kilo tepung si icampur ras dua liter minak saitun.
10 Rikut ras si e arus pe ipersembahken dua liter anggur. Merim iakap TUHAN bau persembahen enda.
11 Eme si arus ipersembahken ras tep-tep jenggi lembu, bajar biri-biri, biri-biri, ntah pe kambing.
12 Adi lebih sada asuh-asuhen ipersembahken, buena tepung, minak saitun ras anggur si ikut ipersembahken arus itambahi sue ras buena asuh-asuhen e.
13 Tep-tep kalak Israel asli arus erbahan si enda adi ipersembahkenna persembahen pangan, si merim bauna man TUHAN.
14 Janah katawari pe adi sekalak asing si ringan i tengah-tengahndu, subuk kentisik bage pe si nggo erkuta i je, erbahan persembahen pangan si merim iakap TUHAN, ia pe arus ndalanken peraturen enda.
15 I bas kerina paksa-paksa si reh enda, penduduk asli bage pe kalak asing si ringan i tengah-tengahndu arus seri peraturen si man ikutenken. Kam ras ia bali nge pengidah TUHAN;
16 undang-undang si seri berlaku man bandu ras man bana.
17 Ibereken TUHAN man Musa
18 peraturen-peraturen si arah teruh enda gelah idalanken bangsa Israel i bas taneh si ibereken TUHAN AteNa man bana.
19 Adi pangan si iasilken i je ipan, la banci la iserapken deba jadi sada pemere si khusus man TUHAN.
20 Adi itasakken kam roti, si ibahan i bas tepung gandum si mbaru nari, roti si pemena arus ipersembahkenndu jadi pemere khusus man TUHAN. Bage me pe cara mpersembahken gandum si mbaru denga ierik jadi sada persembahen khusus.
21 I bas kerina paksa-paksa si reh enda, roti si pemena si itasakkenndu arus ibereken man TUHAN jadi sada pemere si khusus.
22 Tapi uga adi lit sekalak la ndalanken piga-piga peraturen-peraturen si ibereken TUHAN man Musa alu la isengajana?
23 Janah uga adi lanai denggo perpulungen e ngasup ndalanken asa kai si nggo ipedahken TUHAN arah Musa?
24 Adi kesalahen e ibahanna erkite-kiteken la iangka perpulungen kai si patut ibahanna, emaka arus ipersembahkenna sada jenggi lembu jadi sada persembahen tutungen, si merim bauna iakap TUHAN, rikutken persembahen buah gandum ras anggur si payo. Tambah si e, arus pe ipersembahkenna sada bajar kambing jadi sada persembahen pengalemi dosa.
25 Imam arus erbahan acara pembersihen guna perpulungen e, janah dosana kerina banci ialemi, sabap kesalahen e la isengajana janah ibabana persembahen pengalemi dosa, eme persembahen pangan man TUHAN.
26 Kerina perpulungen Israel bage pe kalak asing si ringan i tengah-tengahna, dosana ialemi, sabap kerina nggo ikut i bas kesalahen e.
27 Adi lit sekalak jelma erbahan dosa alu la sengaja, arus ipersembahkenna sada kambing beruna umur sada tahun jadi sada persembahen pengalemi dosa.
28 Imam arus erbahan acara pembersihen dosa man kalak si erdosa e i das batar-batar, jenari dosana nggo ialemi.
29 Peraturen enda berlaku man tep-tep kalak si erdosa alu la sengaja, subuk ia kalak Israel asli bage pe kalak asing si ringan i tengah-tengahndu.
30 Tapi kalak si erbahan dosa alu sengaja, kalak Israel ntah pe kalak asing, ia ersalah erkite-kiteken megombang man TUHAN, janah arus ibunuh.
31 Sabap nggo itulakna kai si ikataken TUHAN janah alu sengaja nggo ngelanggar PerentahNa. Kesalahenna e arus itanggungna alu kematenna jine.
32 Sekali jadi, tupung bangsa e i bas taneh si mesawang denga, lit sekalak terdat pepulung ranting tupung wari Sabat.
33 Ia ibaba ngadap Musa, Harun, ras kerina perpulungen,
34 jenari ia itamaken ku bas tahanen sabap langa tangkas kai arus ibahan man bana.
35 Kenca bage nina TUHAN man Musa, "Ia arus ibunuh; kerina perpulungen e arus menteri ia alu batu seh mate i darat ingan erkemah."
36 Emaka kerina perpulungen e maba ia ku darat ingan erkemah, jenari ibenterina alu batu seh mate, sue ras si nggo iperentahken TUHAN.
37 Isuruh TUHAN gelah ikataken Musa
38 man kalak Israel nina, "Bahanlah ambu-ambu uisndu i bas sukina janah tamalah benang biru i bas tep-tep ambu-ambu. Enda arus ibahanndu i bas kerina paksa-paksa si reh enda.
39 Ambu-ambu enda gunana jadi sada persinget, gelah tep-tep kali idahndu e ingetndu pedahKu jenari ikutkenndu; emaka la Aku itadingkenndu janah la ikutkenndu sura-surandu ras si ngena atendu.
40 Ambu-ambu uis e mpersingeti kam guna ndalanken kerina pedahKu, emaka kam tuhu-tuhu jadi sikerajangenKu.
41 Aku kap TUHAN Dibatandu, Kubaba kam i Mesir nari gelah Aku jadi Dibatandu. Aku kap TUHAN Dibatandu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA