Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN marengngagi ka Mosa
2 atoran-atoran reya se kodu etoro’ bi’ bangsa Isra’il e nagara se eparengngagiya PANGERAN se ekennengngana reng-oreng jareya:
3 Mon ngatorragiya kurban obbaran otaba kurban ngessa’agiya neyat otaba kurban sokalella, otabana kurban kaangguy paraya’an-paraya’anna agama se biyasa, oreng olle ngatorragi ka PANGERAN kurban se aropa sape lake’, dumba lake’, dumba otaba embi’. Bauna ban-kurban jareya masenneng panggaliyanna PANGERAN.
4 Pa’-sapa’a ngatorragi dumba otabana embi’ menangka kurban obbaran ka PANGERAN, sabban ebin settong kodu etoro’e keya teppong sakilo ecampor ban mennya’ jaitun saliter kaangguy kurban sasajin, bariya keya aengnga anggur saliter.
5 (15:4)
6 Mon se ekurbannagi jareya dumba lake’, kodu etoro’e keya teppong dhu kilo ecampor bi’ mennya’ jaitun saliter satengnga menangka kurban sasajin,
7 sarta aengnga anggur saliter satengnga. Bauna kurban jareya masenneng panggaliyanna PANGERAN.
8 Mon se ekurbannagi jareya sape lake’ menangka kurban obbaran otaba kurban kaangguy ngessa’agi neyat otaba kaangguy kurban salameddan,
9 kodu etoro’e keya teppong tello kilo ecampor bi’ mennya’ jaitun dhu liter menangka kurban sasajin,
10 sarta aengnga anggur dhu liter. Bauna kurban jareya masenneng panggaliyanna PANGERAN.
11 Jareya se kodu eatorragi epabareng ban saneyap sape ban dumba lake’, dumba otabana embi’.
12 Mon se ekurbannagi jareya ebinna lebbi dhari settong, tor-ator teppong, mennya’ ban aengnga anggur jareya gi’ kodu etamba’agi keya se bannya’na menorot parbandhingan se kasebbut gella’.
13 Jareya kodu etoro’ bi’ saneyap oreng Isra’il e bakto ngatorragi kurban. Bauna kurban jareya masenneng panggaliyanna PANGERAN.
14 Oreng manca se aenggun e antarana ba’na, kaangguy sabatara bakto otabana kaangguy saterrossa, kodu ngestowagi atoran jareya keya mon ngatorragi kurban kakanan, se bauna masenneng panggaliyanna PANGERAN.
15 Sakabbinna hokom ban atoran se kodu etoro’ bi’ ba’na ban oreng manca se aenggun e antarana ba’na, padha bai, sabab ba’na ban oreng manca jareya e dhalem pangoladanna PANGERAN tadha’ bidana. Ban parkara jareya kodu eestowagi salanjangnga.
16 (15:15)
17 PANGERAN marengngagi ka Mosa
18 atoran-atoran reya se kodu etoro’ bi’ bangsa Isra’il e nagara se eparengngagiya PANGERAN ka reng-oreng jareya.
19 Mon oreng Isra’il la molae ngakan hasella nagara jareya, sabagiyan kodu epalaen kaangguy tor-ator se malolo ka PANGERAN.
20 Roti se eola dhari gandum se eanye dha’-adha’ kadibi’ kodu eatorragi menangka kurban se malolo ka PANGERAN. Carana ngatorragi padha ban carana ngatorragi gandum ollena anye se dha’-adha’.
21 Kaangguy salanjangnga, saneyap roti dhari gandum se eanye dha’-adha’ kadibi’ kodu eatorragi menangka tor-ator se malolo ka PANGERAN.
22 Saompamana badha oreng se ta’ etengnget ta’ ngestowagi sala settong e antarana atoran se la eparengngagi PANGERAN ka Mosa jareya, molae dhari are e bakto PANGERAN marengngagi atoran jareya sampe’ saterrossa ron-temoron, ban kasala’an jareya se daddi lantaranna polana ommat ta’ tao ja’ badha atoran se kantha jareya, sakabbinna ommat Isra’il jareya kodu ngatorragi sape lake’ settong menangka kurban obbaran. Tor-ator jareya kodu etoro’e tor-ator kurban sasajin ban aengnga anggur akantha se la etantowagi. Bauna kurban jareya masenneng panggaliyanna PANGERAN. Laen dhari jareya kurban jareya kodu etoro’e dumba lake’ settong menangka kurban pangamponanna dusa.
23 (15:22)
24 (15:22)
25 Imam pas kodu mabadha opacara palebbaranna dusa kaangguy ommadda. Reng-oreng jareya tanto esapora bi’ PANGERAN lantaran se ta’ etengnget agabay sala jareya, ban lantaran reng-oreng jareya la ngeba kurban pangamponanna dusa sarta kurban obbaran ka PANGERAN.
26 Sakabbinna oreng Isra’il ban reng-oreng manca se aenggun e antarana reng-oreng Isra’il jareya bakal esapora’a, lantaran kabbi padha ta’ etengnget agabay sala.
27 Mon se ta’ etengnget agabay dusa jareya pera’ kasorang, oreng jareya kodu ngurbannagi embi’ babine’ se aomor sataon kaangguy kurban pangamponanna dusa.
28 Imam kodu mabadha opacara pangamponanna dusa e ajunanna PANGERAN e adha’na mezba, sopaja oreng jareya esapora dusana.
29 Sapa’a bai se ta’ etengnget agabay dusa, oreng Isra’il otabana oreng manca se aenggun neptep e antarana reng-oreng Isra’il, kodu padha atoro’ ka atoran reya.
30 Tape sapa’a bai se etengnget agabay dusa, apa jareya oreng Isra’il otabana oreng manca, oreng jareya ya-nyeya PANGERAN. Oreng jareya kodu eokom mate,
31 sabab ta’ atoro’ ka PANGERAN, etengnget ta’ atoro’ ka se epakonnagi PANGERAN. Oreng jareya mate polana salana dibi’.
32 E settong are, e bakto oreng Isra’il gi’ badha e ra-ara beddhi, badha oreng lalake’ etemmo teppa’na makompol kaju e are Sabat.
33 Oreng jareya egiba ngadhep ka Mosa, Harun ban ka sakabbinna ommat,
34 oreng jareya gi’ etahan gallu sabab gi’ ta’ terrang epabaramma’a.
35 Dhabuna PANGERAN ka Mosa, "Oreng jareya kodu eokom mate; kodu egiba ka lowaranna parkemahan ban e jadhiya kodu egarujuk bi’ sakabbinna ommat sampe’ mate."
36 Daddi sakabbinna ommat agiring oreng jareya ka lowaranna parkemahan, oreng jareya laju egarujuk sampe’ mate, akantha se edhabuwagi PANGERAN.
37 Dhabuna PANGERAN ka Mosa,
38 "Kabala ka bangsa Isra’il: Saneyap konco’na kalambina ba’na pobuwi bay-rambay, ban saneyap bay-rambay jareya tale’e ban tale bungo. Jareya kodu etoro’ ban ba’na ron-temoron.
39 Bay-rambay jareya menangka parengeddan: Sabban ba’na ngabas ka bay-rambay jareya, ba’na enga’ ka sakabbinna Tang parenta ban ngestowagi Tang parenta jareya kabbi. Lantaran jareya ba’na ta’ kera loppa ka Sengko’ ban ta’ kera norodi pangaterrona ban karebba atena dibi’.
40 Bay-rambay jareya bakal maenga’a ba’na sopaja ngestowagi sakabbinna Tang parenta, sampe’ ba’na daddi Tang andhi’ ongguwan.
41 Sengko’ reya PANGERAN, Allahna ba’na; bi’ Sengko’ ba’na epakalowar dhari Messer sopaja Sengko’ daddiya Allahna ba’na. Sengko’ reya PANGERAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA