Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tonggo ni si Daud. Paeleng Ham ma pinggol-Mu, Ham Jahowa, balosi Ham ma ahu, ai doyuk janah sombuh do ahu.

² Ramotkon Ham ma tonduyhu, ai na daulat do ahu. Sai paluah Ham ma juakjuak-Mu na martenger ni uhur hu Bamu!

³ Ham do Naibatangku idop ma uhur-Mu bangku, ai hu Bamu do ahu dilo-dilo ganup ari.

⁴ Sai pamalas Ham ma uhur ni juakjuak-Mu, ai hu Bamu do Tuhan, hudompakkon tonduyhu.

⁵ Ai pardear layak do Ham, Tuhan, anjaha marpangulaki do uhur-Mu, buei do idop ni uhur-Mu bani haganup na mandilo Ham.

⁶ Tangihon Ham ma, ale Jahowa, tonggongku, anjaha pardiateihon Ham ma elek-elekku.

⁷ Bani panorang hasosakanku, sai Ham do hudilo, ai ibalosi Ham do ahu.

⁸ Seng dong na doskon Ham i tongah-tongah ni naibata-naibata, Ham Tuhan, anjaha seng dong na doskon pambahenan-Mu.

⁹ Sai roh do sagala bangsa, na jinadihon-Mu; marsombah do sidea hu lobei-Mu, Ham Tuhan, anjaha pasangapon ni sidea do goran-Mu.

¹⁰ Ai timbul do Ham, sibahen halongangan, pitah Ham do Naibata hansa.

¹¹ Sai ajarhon Ham ma dalan-Mu hu bangku, Ham Jahowa, ase mardalan ahu ibagas hasintongan-Mu; sai pabulat Ham ma uhurhu laho mangkabiari goran-Mu.

¹² Ham Tuhan Naibatangku, sihol do pujionku Ham humbani gok ni uhurhu, anjaha pasangaponku goran-Mu sadokah ni dokahni.

¹³ Ai banggal do idop ni uhur-Mu bangku, ipaluah Ham do ahu humbani nagori toruh.

¹⁴ Ham Naibata, roh do na jungkat maruhur mangimbang ahu, hulanan ni parjahat sihol mamunuh ahu, seng parduli sidea Bamu.

¹⁵ Tapi Ham do Tuhan, Naibata paridop ni uhur janah parholong, Ham, na lambat manringis, parontou ni uhur banggal janah parsintong.

¹⁶ Dompakkon Ham ma ahu anjaha maidop uhur-Mu bangku. Bere Ham ma gogoh-Mu bani juakjuak-Mu, anjaha paluah Ham ma anak ni jabolon-Mu naboru.

¹⁷ Bahen Ham ma bangku tanda hadearon, ase maila halak sidomdomi ahu, mangidah na dob iurupi anjaha iapohi Ham ahu, Ham Jahowa.