Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Psalm humbani si Daud. (51-2) Sanggah na roh Nabi Natan mangayakisi, dob idohori si Batseba. (51-3) Maidop ma uhur-Mu bangku, Ham Naibata, romban hubani dear ni layak-Mu, sasap Ham ma panlanggaronku romban hubani buei ni idop ni uhur-Mu.
2 (51-4) Burihi Ham ma ahu pansing tumang humbani hajahatonku, anjaha paborsih Ham ma ahu humbani dousangku.
3 (51-5) Ai mangahap do ahu bani panlanggaronku, anjaha tongtong do sonson i lobeihu dousangku.
4 (51-6) Bamu, Bamu tumang do ahu mardousa, anjaha na jahat bani panonggor-Mu do huhorjahon, ase taridah pintor do Ham bani parsahap-Mu, anjaha pitah Ham bani panguhumion-Mu.
5 (51-7) Tongon, ibagas hagedukon do ahu tubuh, anjaha ibagas dousa ijalo inang ahu.
6 (51-8) Tongon, hasintongan na ibagas uhur do iharosuhkon Ham, anjaha ibagas na ponop ipabotohkon Ham hauhuron bangku.
7 (51-9) Uras Ham ma ahu humbani dousangku marhitei hisop, ase borsih ahu, burihi Ham ma ahu, ase lopakkan ahu marimbang salju.
8 (51-10) Sai pabogeihon Ham ma hu bangku malas ni uhur pakon hamegahon, ase marolob-olob holi-holi na dob nirosakan-Mu.
9 (51-11) Ponopkon Ham ma bohi-Mu humbani dousangku, anjaha sasap Ham ma ganup hajahatonku.
10 (51-12) Tompa Ham ma uhur na borsih ibagas diringku, Ham Naibata, anjaha bere Ham ma bangku tonduy na baru anjaha na totap.
11 (51-13) Ulang ma pabali Ham ahu hun lobei-Mu, anjaha ulang ma buat Ham Tonduy-Mu Na Pansing in humbangku.
12 (51-14) Pasuang Ham ma bangku malas ni uhur halani pangurupion-Mu, anjaha tungkoli Ham ma ahu marhitei tonduy pambalosion.
13 (51-15) Ase huajarhon dalan-Mu bani sipanlanggar, ase mulak halak pardousa hu Bamu.
14 (51-16) Sai paluah Ham ma ahu humbani sapata ni daroh, Ham Naibata, Naibata ni hatuahonku, ase ipuji dilahku hapintoron-Mu.
15 (51-17) Buha Ham ma bibirhu, Ham Tuhan, ase iambilankon pamanganku puji-pujian-Mu.
16 (51-18) Ai seng iharosuhkon Ham galangan sisayaton, anjaha porini huboban galangan situtungon, seng anjai hadearhonon-Mu ai.
17 (51-19) Galangan na hinarosuhkon ni Naibata, ai ma tonduy na marosak; uhur na maropuk anjaha na marosak seng itulak uhur-Mu, Ham Naibata.
18 (51-20) Bahen Ham ma na madear hu Sion romban hubani idop ni uhur-Mu, pauli Ham ma tembok ni Jerusalem.
19 (51-21) Jadi ijai ma harosuhkonon-Mu galangan na sintong, galangan situtungon ampa galangan sirasogon; ijai ma galangonkon lombu jonggi i atas anjapanjap-Mu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA