Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Humbani si Daud. Sada Psalm. Jahowa do simada tanoh on pakon haganup isini, dunia on pakon sagala na mangiankonsi.

² Ai Ia do pajonamkonsi i atas ni laut, anjaha ipatotap do i atas ni bah mardalan.

³ Ise do na boi tangkog hu dolog ni Jahowa? Ise do na boi jongjong bani ianan-Ni na pansing in?

⁴ Partangan na borsih ampa paruhur na pitah, halak na so mandompakkon tonduyni bani na so margagan, ampa halak na so ra marbija laho manipu.

⁵ Ia ma na manjalo pasu-pasu humbani Jahowa pakon hapintoron humbani Naibata na paluahkonsi.

⁶ Ai ma sundut na sungkun-sungkun pasal Jahowa, na mangindahi bohi-Mu, Ham Naibata ni Jakob. Sela.

⁷ Pagijang ma ulunima, ale sagala horbangan, tarangkat ma hanima, ale labah na basaia, ase masuk raja ni hamuliaon.

⁸ Ise ma nani Raja ni hamuliaon in? In ma Jahowa, na Gogoh anjaha Puanglima, Jahowa Puanglima i parporangan.

⁹ Ipagijang ma ulunima, ale sagala horbangan, tarangkat ma hanima, ale labah nabasaia, ase masuk raja ni hamuliaon in.

¹⁰ Ise ma nani raja ni hamuliaon in? In ma Jahowa Zebaot, Ia do Raja ni hamuliaon. Sela.