Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Untu’ pamimping pakelong. Pammujina Daud. (19-2) Langi’ ampa’nyatai kalompoanNa Allata’ala, siagang allaka ancaritai bate pare’Na.

² (19-3) Allo se’rea ampabattui mae ri allo ammukoa; bangngi se’rea ancaritai mae ri bangngi poleanga.

³ (19-4) Tena a’bicara yareka akkana-kana, tena sa’ra kalangngerang.

⁴ (19-5) Mingka pakkio’Na kalangngerangi ri sikontu linoa, pappasanNa ta’rapiki sa’genna cappa’-cappa’na buttaya. Appareki Batara balla’ ri langi’ untu’ mataalloa.

⁵ (19-6) ammumbai ri bari’basaka sanrapang bunting bura’ne assulu’ battu ri kamara’na, sanrapang tubarani eroka ampakaramulai pa’lampanna.

⁶ (19-7) Najappai langika battu ri cappa’ se’rea mange ri cappa’ maraenga; tena tanitaba ri bambanna.

⁷ (19-8) Anjo hukkunNa Batara sukku’ ganna’na, napakabajiki pakkasia’na nyawaya. ParentaNa Batara akkullei nipatappa’ assare kacara’dekang mae ri tu biasaya.

⁸ (19-9) Anjo paratoranNa Batara coco’ sikali, appakasannangi pa’mai’. Anjo Napattantua Batara maci’nongi, napa’jari pahangi taua.

⁹ (19-10) Anjo manynyombaya ri Batara bajiki, nigaukang satunggu-tungguna. Anjo hukkunNa Batara tojengi, na adele’ ngaseng.

¹⁰ (19-11) Lompoangangi anggaranna HukkunNa Batara na bulaeng ti’no’, te’neangangi naje’ne’ bani tenaya bengkoro’na.

¹¹ (19-12) Yangasenna anjo mappakainga’ ri atanTa; sadiai pahala lompoa mange ri tau anturukiai.

¹² (19-13) Tena akkulle mangngu’rangi ri kalinguanna; o, Batara Kilappassanga’ battu ri kasalang taccokkoa.

¹³ (19-14) Pakabella’ battu ri dosa kusangajakkia, teaKi’ lappassangngia’ nikoasai. Nakuma’jari tena callangku, kuta’lappasa’ battu ri gau’ sala lompoa.

¹⁴ (19-15) Poro Kipassiratang kana-kanangku siagang nawa-nawangku ri Katte, o, Batara, pa’la’langangku siagang tumappasulukku!

Mazmur

Video Mazmur 19

Ikuti Kami:

KONTAK | PARTISIPASI | DONASI