Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Molja’agi PANGERAN! Molja’agi PANGERAN, sakabbinna essena sowarga! Kabbi se badha e kennengngan se tenggi, molja’agi Salerana!

² Para malaekadda Pangeran, molja’agi Salerana, sakabbinna tantara sowarga, molja’agi Salerana!

³ Molja’agi Salerana, are ban bulan, molja’agi Salerana, tang-bintang se rap-galiraban!

⁴ Molja’agi Salerana, langnge’ se paleng tenggi, molja’agi Salerana, aeng e attas langnge’!

⁵ Mara kabbi padha ngagungngagi asmana PANGERAN, sabab kabbi reya epabadha lantaran dhabuna.

⁶ Pangeran se nantowagi kennengnganna bang-sebang, kateptebban jareya etantowagi kaangguy salanjangnga.

⁷ Molja’agi PANGERAN, saessena bume, ga-naga tase’ ban sakabbinna sagara se lebar;

⁸ kelap ban ojan es, salju ban ondhem, kaleng busbus se atoro’ ka papakonna PANGERAN!

⁹ Molja’agi Salerana, mo’-gumo’ ban nong-gunong, bungkana wa’-buwa’an ban las-alas;

¹⁰ sakabbinna ebin ban keban alasan, sakabbinna keban se agalajar ban no’-mano’!

¹¹ Molja’agi Salerana, to-rato ban sa-bangsa, sakabbinna oreng agung ban para pangobasa;

¹² ngangodhadan lake’ ban bine’, oreng towa ban oreng ngodha.

¹³ Mara kabbi ngagungngagi asmana PANGERAN, sabab asmana lebbi agung dhari sakabbinna nyama; kaagunganna ngongkole langnge’ ban bume.

¹⁴ Salerana la makowat bangsana, sampe’ Salerana egung-agungngagi ommadda, Isra’il, ommadda se kataresnan. Molja’agi PANGERAN!