Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Puji ma Jahowa, ai pardear layak do Ia; tongon ronsi sadokah ni dokahni do idop ni uhur-Ni.
2 Sonai ma sihatahononkon ni halak na pinaluah ni Jahowa, na pinaluah-Ni humbani odoh-odoh ni hasosakan,
3 na pinahumpul-Ni humbani sagala nagori, hun hapoltakan pakon hun hasundutan, hun utara pakon hun dangsina.
4 Sidea na mawat-awat i halimisan, bani ianan na lungun, na seng dapotan dalan hu huta siiankonon,
5 na horahan loheian, pala madotei uhurni ibagas,
6 tapi na dilo-dilo bani Jahowa ibagas hasosakanni, gabe ipaluah sidea humbani harusakan ni sidea,
7 ibobahon sidea bani dalan na pintor, ase das sidea bani huta siianonkon.
8 Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma,
9 halani ipasombuh do tonduy na horahan, anjaha ipabosur tonduy na loheian bani na madear.
10 Sidea na hundul bani na golap ampa na golap marimpot-impot, na hona gari bani hamarsikon ampa bosi,
11 halani ilanggar sidea hata ni Naibata, anjaha mapas bani podah ni Sitimbulan in,
12 gabe ipatoruh uhur ni sidea marhitei halojaon, mangkatargompang sidea seng dong na mangurupi,
13 tapi na dilo-dilo bani Jahowa ibagas hasosakanni, gabe ipaluah sidea humbani harusakon ni sidea,
14 ipadarat sidea humbani na golap marimpot-impot, anjaha irotapi gari ni sidea.
15 Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma,
16 halani na dob pinarseda-Ni ai horbangan tombaga anjaha irosaki oruk-oruk bosi.
17 Sidea na marsik halani parlahouni na masambor, anjaha hona bogbogan halani hajahatonni,
18 na mangkagigihon sagala sipanganon, pala domma das bani horbangan ni hamatean,
19 tapi na dilo-dilo bani Jahowa ibagas hasosakanni, gabe ipaluah sidea humbani harusakon ni sidea.
20 itongos hata-Ni anjaha ipamalun sidea, ipaluah sidea humbani tanoman.
21 Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma,
22 ningon galangkonon ni sidea do galangan puji-pujian, anjaha baritahononni pambahenan-Ni ai marhitei olob-olob.
23 Sidea na markapal i laut, na marboniaga mandipari bah bolag,
24 na mangidah jadi-jadian ni Jahowa, ampa halongangan na binahen-Ni ibagas laut,
25 marsahap ma Ia, gabe roh ma logou haba-haba, marbanggal gilumbang;
26 naik sidea songon na hu langit, turun use hu toruh, hu na bagas, magou uhurni halani hasosakan,
27 mirdong sidea anjaha rebad-rebad songon halak na mabuk, magou haganup hapandeian ni sidea,
28 tapi na dilo-dilo bani Jahowa ibagas hasosakanni, gabe ipaluah sidea humbani harusakon ni sidea,
29 ipasoh ma haba-haba ai gabe sonang, minop homa pakon gilumbang.
30 gabe marmalas ni uhur sidea halani na minop ai, anjaha iboban sidea das bani labuhan na sinintani.
31 Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma,
32 ningon patimbulon ni sidea Ia i tongah-tongah ni tumpuan ni bangsa in, anjaha maningon pujion do Ia bani harungguan ni pangintuai-pangintuai.
33 Ia do na paubahkon bah mardalan gabe halimisan, pakon tanoh na gokan bah gabe tanoh dorging;
34 tanoh na lambutan gabe tanoh garam, halani hajahaton ni halak na marianan ijai.
35 Ia do na paubahkon halimisan gabe tao, tanoh dorging gabe hatubuhan ni bah.
36 Ibahen do ijai marianan halak na loheian, anjaha ijai ma itombei sidea huta siiankonon ni sidea.
37 Isuani sidea ma juma anjaha ipungkah pohon anggur, na mambere ganup tahun gogohni.
38 Ipasu-pasu do sidea manggargar, anjaha pinahanni seng hurang ibahen.
39 Tapi lambin moru ma sidea anjaha roh toruhni, halani pandorunon, sitaronon pakon hasombuhon.
40 Ia na parohkon hahirion bani halak na sangap-sangap, Ia do pakahou sidea bani halimisan na so dong dalan.
41 Tapi halak na sombuh ipagijang do humbani hadoyukon, anjaha ipabuei do ginompar ni sidea marhulan-hulan.
42 ididah halak parpintor ma ai gabe marmalas ni uhur, tapi sagala sihorjahon hajahaton itutup bei ma babahni.
43 Barang ise na pantas maruhur, iparimbagaskon ma ai, anjaha iparuhurhon ma pangidopi ni Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA