Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhari Daud. Mara molja’agi PANGERAN, tang sokma, tang ate, mara molja’agi asmana se socce.

² Mara molja’agi PANGERAN, tang sokma, ja’ kaloppae kasaeyanna Salerana!

³ Salerana se nyapora sakabbinna dusana ba’na, se mabaras sakabbinna panyakedda ba’na,

⁴ Salerana se malopot nyabana ba’na dhari koburan, se marenge ba’na kataresna’an ban kabellasan se talebat bannya’na.

⁵ Salerana se marenge odhi’na ba’na sabarang se becce’ se ta’ korang bannya’na sampe’ ba’na teptep ngodha akantha mano’ ellang raja.

⁶ PANGERAN alampa’agi hokom ban kaadilanna, kaangguy sakabbinna oreng se tatendhes odhi’na.

⁷ Salerana anyata’agi ka Mosa sabarang se elampa’agiya Salerana, bangsa Isra’il epanangale sabarang se elampa’agi Salerana.

⁸ Sabab PANGERAN reya bellas ase, lanjang sabbarra ban kataresna’anna talebat rajana.

⁹ Salerana ta’ abentak ros-terrosan, ta’ duka salanjangnga.

¹⁰ Pangeran ta’ ngokom sengko’ ban ba’na satembang ban dusana, otabana apareng babales ka sengko’ ban ba’na satembang ban kasala’anna.

¹¹ Tape padha ban tenggina langnge’ e attassa bume, sajareya rajana kataresna’anna ka oreng se alem.

¹² Akantha jauna temor dhari bara’, sajareya keya jauna Salerana mowang sa-dusana sengko’ ban ba’na.

¹³ Akantha oreng lake’ se neser ka na’-ana’na, kantha jareya taresnana PANGERAN ka oreng se alem.

¹⁴ Sabab PANGERAN ngagali ekagabay dhari apa sengko’ ban ba’na reya, Pangeran emot sengko’ ban ba’na pera’ dhari abu tana.

¹⁵ Odhi’na manossa sakejja’ akantha rebba, mekkar akantha kembang e teggal;

¹⁶ mon eketbat angen laju elang mosna, la’-mala’ ta’ etemmo lampadda kennengnganna.

¹⁷ Tape PANGERAN teptep taresna ka oreng alem, kabecce’anna ta’ ambu ron-temoron

¹⁸ ka oreng se neggu’i parjanjiyanna, ban esto ajalannagi papakonna.

¹⁹ PANGERAN marenta e sowarga; Salerana jareya rato se ngobasane sakabbinna.

²⁰ Molja’agi PANGERAN, kat-malaekat se parjuga, se meyarsa’agi ban alampa’agi dhabuna.

²¹ Molja’agi PANGERAN, lok-mahlok e sowarga, sakabbinna abdina se ajalannagi kasokanna.

²² Molja’agi PANGERAN, sakabbinna cepta’an se badha e baba kakobasa’anna. Molja’agi PANGERAN, tang sokma!