Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Beterus Deside Isa berangkat lẽman derike dait rauh lẽq kampung asal-Ne, teiring siq pengiring-pengiring-Ne.

² Lẽq jelo Sabat Ie mulai ngajahang lẽq balẽ ibadah. Araq luwẽq dengan lẽq derike. Waktu dengan-dengan nike dengah pengajahan Deside Isa, ie pade bengaq gati. Ie pade bebase, "Lẽman mbẽ dengan niki mauq selapuq nike? Hikmat macem napi saq araq lẽq Ie? Berembẽ Ie bau piaq muqjizat saq maraq nike?

³ Tekan Ie niki tukang kayuq, bije Mariam, dait sanakne Yakub, Yoses, Yudas dait Simon? Sanak-sanak-Ne saq nine ẽndah araq ndot lẽq deriki." Keranaq nike Deside Isa tetolaq siq ie pade.

⁴ Beterus Deside Isa bemanik lẽq ie pade, "Sopoq nabi tehormatin lẽq mbẽ-mbẽ, kecuali lẽq kampung asalne, lẽq antare semeton, kadang jarine dait keluargene mẽsaq."

⁵ Lẽq taoq nike Deside Isa nẽnten bau piaq sopoq juaq muqjizat, kecuali nyelahang dengan-dengan sakit siq care noloq gading-Ne lẽq atas ie pade.

⁶ Deside Isa bengaq sẽngaq ie pade ndẽq percaye. Beterus Deside Isa lumbar ojok kampung-kampung lẽq sekiter nike, dait ngajahang.

⁷ Ie ngemanikang kedue olas pengiring-Ne, terus ngutus ie pade due-due dait ngicanin kuase tipaq ie pade jari sediq roh-roh jahat.

⁸ Ie ngicanin petunjuk niki tipaq ie pade, "Ndaq jauq napi-napi dalem kelampande, kecuali tunjang. Ndaq jauq keloran, atao takaq sangu atao kẽpẽng.

⁹ Kadu sepatu, laguq ndaq jauq due kelambi."

¹⁰ Deside Isa ẽndah bemanik, "Lamun side pade tame ojok sopoq balẽ, ndot lẽq derike jangke side pade bilin taoq nike.

¹¹ Laguq lamun side pade dateng lẽq sopoq taoq, dait dengan-dengan lẽq derike ndẽq mẽlẽ nerimaq dait dengahang side pade, bilin taoq nike. Dait kerapang kerepuk lẽman lampak naẽnde jari peringetan tipaq ie pade!"

¹² Beterus kedue olas pengiring Deside Isa nike lumbar. Ie pade lumbar nyampẽang berite bahwe manusie harus tobat lẽman dose-dosene.

¹³ Pengiring-pengiring Deside Isa nike sediq luwẽq roh jahat, ngolẽsang minyak lẽq dengan sakit dait nyelahang ie pade.

¹⁴ Berite-berite mengenai selapuq peristiwe nike dateng ẽndah tipaq Raje Herodes, lantaran pesẽngan Deside Isa sampun kesohor lẽq mbẽ-mbẽ. Araq dengan saq bebase, "Yahya Pembaptis sampun idup malik! Keranaq nike Ie bedowẽ kuase jari miaq keajaipan nike."

¹⁵ Laguq dengan-dengan lain bebase, "Ie Elia." Araq ẽndah saq bebase, "Ie nabi maraq salaq sopoq nabi jaman laẽq."

¹⁶ Sewaktu Herodes pireng hal nike, ie bebase, "Pasti niki Yahya Pembaptis saq piranan sampun tiang suruq penggal ulune. Mangkin ie sampun idup malik!"

¹⁷ Sẽngaq sendẽqman nike Herodes sampun prẽntahang dengan bau Yahya, dait sẽkoqne ie lẽq dalem bui. Herodes ngelaksaneang hal nike lantaran Herodias, sebiniqne Pilipus sanakne mẽsaq. Sẽngaq Herodes sampun nikah kance Herodias,

¹⁸ dait mengenai hal nike Yahya sampun peringet Herodes maraq niki, "Nẽnten kanggo pelungguh merariq kance sebiniq sanakde nike!"

¹⁹ Keranaq nike Herodias dendem lẽq Yahya dait beniat nyematẽq Yahya, laguq ie ndẽq bau ngelaksaneang hal nike.

²⁰ Sẽngaq Herodes sampun mrẽntahang dengan jagaq bagus-bagus keselametan Yahya lẽq bui, lantaran ie takut lẽq Yahya. Ie nenaoq bahwe Yahya nike dengan saq solẽh dait suci saq teutus siq Allah. Dait mule lamun Yahya bebase, Herodes seneng ẽndah pirengang ie, timaq ie jari osah gati.

²¹ Ahirne Herodias mauq kesempatan lẽq jelo ulang taun Herodes. Waktu nike Herodes ngaraqang gawẽ umaq selapuq pembelẽq-pembelẽq kerajaan, prewire-prewire, dait tokoh-tokoh masyarakat Galilea.

²² Lẽq gawẽ nike, bije Herodias saq dedare ngigel, dait igelanne nike sanget nyenengang angen Herodes dait temuẽ-temuẽne. Make Herodes bebase lẽq dedare nike, "Tunas lẽq tiang napi juaq saq side melẽtang. Tiang gen bẽng side!"

²³ Beterus Herodes bejanji lẽq dedare nike kadu sumpah. Herodes bebase, "Napi juaq saq side tunas gen tiang bẽng, timaq separo lẽman kerajaan tiang."

²⁴ Make dedare nike sugul dait beketuan lẽq inaqne, "Inaq, napi saq harus tiang tunas?" Jawab inaqne, "Tunas ulune Yahya Pembaptis."

²⁵ Dedare nike becat tulak tipaq Herodes, dait bebase, "Tiang tunas ulu Yahya Pembaptis teican lẽq tiang mangkin niki ẽndah kadu narẽ!"

²⁶ Pirengang petunasan nike Herodes sedih gati. Laguq ie ndẽq bau nolaq petunasan nike sẽngaq ie sampun besumpah lẽq julu temuẽ-temuẽne.

²⁷ Jari, ie langsung mrẽntahang sopoq pengawalne bait ulu Yahya Pembaptis. Make dengan nike lumbar ojok bui, terus penggalne ulu Yahya.

²⁸ Beterus ie jauq ulu nike kadu narẽ dait nyerahang tipaq dedare nike. Dait dedare nike ẽndah nyerahang tipaq inaqne.

²⁹ Sewaktu pengiring-pengiring Yahya dengah hal nike, ie pade lumbar bait jenazah Yahya, terus nguburang ie.

³⁰ Beterus rasul-rasul saq teutus siq Deside Isa nike tulak malik, dait bekumpul kance Deside Isa. Ie pade ngelaporang lẽq Deside Isa selapuq saq sampun ie pade laksaneang dait ajahang.

³¹ Luwẽq gati dengan saq dateng dait lumbar sehingge Deside Isa dait pengiring-pengiring-Ne nẽnten bedowẽ kesempatan medaran. Keranaq nike Deside Isa bemanik lẽq pengiring-pengiring-Ne, "Silaq ite lumbar ojok taoq saq sepi adẽq ndẽq araq dengan lain dait ite mauq mentelah seberaq."

³² Make ie pade lumbar kadu perau ojok taoq saq sepi.

³³ Laguq sewaktu ie pade bilin taoq nike, luwẽq dengan serioq ie pade dait nenaoq ojok mbẽ ie pade lumbar. Beterus lẽman selapuq kote lẽq wilayah nike, dengan-dengan pelai langan darat senjuluq Deside Isa dait pengiring-pengiring-Ne.

³⁴ Sewaktu Deside Isa turun lẽman perau, Ie cingakin dengan luwẽq. Make Deside Isa periak lẽq ie pade sẽngaq ie pade maraq dombe saq ndẽq bedowẽ pengarat. Make Ie mulai ngajahang mengenai luwẽq hal tipaq ie pade.

³⁵ Sewaktu serep jelo, pengiring-pengiring Deside Isa matur lẽq Ie, "Taoq niki kesempil dait sampun serep jelo.

³⁶ Solahan Pelungguh manikang dengan-dengan niki lumbar, adẽq ie pade mauq beli keloran lẽq dẽse-dẽse dait kampung-kampung lẽq sekiter niki."

³⁷ Laguq jawab Deside Isa, "Side pade saq harus ngebẽng ie pade bekelor." "Napi tiang pade harus lalo beli ruti siq aji satak kẽpẽng perak jari bẽng bekelor dengan-dengan niki?" Maraq nike atur pengiring-pengiring Deside Isa nike.

³⁸ Beterus Deside Isa beketuan, "Araq pire ruti lẽq side pade? Cobaq lumbar serioq." Sesampun ie pade lumbar serioq, ie pade matur, "Araq lime ruti dait araq due empaq ẽndah."

³⁹ Beterus Deside Isa ngemanikang selapuq dengan nike tokol bekelompoq-kelompoq lẽq pupaq saq ijo.

⁴⁰ Dengan-dengan nike tokol, araq saq satus dengan sekelompoq, dait araq ẽndah saq sẽket dengan sekelompoq.

⁴¹ Beterus Deside Isa bait lime ruti dait due empaq nike, terus nengadah andang langit dait ngucap syukur tipaq Allah. Sesampun nike, Ie peleng-peleng ruti nike kadu gading-Ne terus icanin-Ne lẽq pengiring-pengiring-Ne jari tebagi-bagiang tipaq dengan luwẽq nike. Dait due empaq nike tebagi-bagi ẽndah tipaq ie pade selapuq.

⁴² Ie pade bekelor jangke besuh.

⁴³ Beterus salo keloran nike tekumpulang siq pengiring-pengiring Deside Isa -- selapuqne araq due olas bakaq penoq.

⁴⁴ Dengan-dengan mame saq ngelorang ruti nike luwẽqne kire-kire lime iyu dengan.

⁴⁵ Sesampun nike, Deside Isa manikang pengiring-pengiring-Ne berangkat kadu perau senjuluq Ie ojok Betsaida lẽq itoqan danao. Lẽq waktu nike ẽndah Ie ngemanikang dengan luwẽq nike ulẽq.

⁴⁶ Sesampun Deside Isa bekelin lẽman ie pade, Ie lumbar ojok bukit jari bedo'e.

⁴⁷ Sewaktu kekelem, perau pengiring-pengiring Deside Isa sampun araq lẽq tengaq-tengaq danao, lẽq waktu nike Deside Isa masih araq lẽq darat.

⁴⁸ Deside Isa cingakin ie pade sengke gati bedayung perau nike sẽngaq angin belawanan andang kance perau. Make kire-kire antare jam telu dait jam enem kelẽmaq, Deside Isa rauh tipaq ie pade bemargi lẽq atas aiq, dait Ie tetep bemargi maraqne gen liwatin ie pade.

⁴⁹ Waktu ie pade serioq Deside Isa bemargi lẽq atas aiq, Deside Isa teparan hantu siq ie pade,

⁵⁰ sehingge ie pade bekuih-kuih siq takutne, sẽngaq ie pade selapuq serioq Ie dait ie pade tinjot gati. Laguq Deside Isa langsung bemanik lẽq ie pade, "Tenang! Tiang niki Isa, ndaq takut!"

⁵¹ Beterus Deside Isa taẽk ojok perau ie pade, langsung waktu nike ẽndah angin jari tenang. Selapuq pengiring-pengiring-Ne bengaq gati.

⁵² Sẽngaq sesampun peristiwe ruti nike ie pade ndẽqman ẽndah ngerti dait ie pade tetep keras atẽ.

⁵³ Sesampun rauh lẽq itoqan danao, ie pade mendarat lẽq Genesaret.

⁵⁴ Waktu ie pade turun lẽman perau, dengan-dengan serioq bahwe saq rauh nike Deside Isa.

⁵⁵ Terus ie pade pelai ojok mbẽ-mbẽ lẽq selapuq wilayah nike. Dait mulai jauq dengan-dengan sakit lẽq atas tipah ojok Deside Isa. Lamun ie pade dengah bahwe Deside Isa araq lẽq sopoq taoq, ie pade jauq dengan-dengan sakit ojok derike.

⁵⁶ Lẽq mbẽ juaq Deside Isa rauh -- timaq lẽq kampung, lẽq kote atao lẽq dẽse -- lẽq derike dengan tetep dateng dait noloq dengan-dengan sakit lẽq peken-peken. Ie pade tunas adẽq dengan-dengan sakit nike teijinang kintur jubah Deside Isa, timaq cume potone. Selapuq saq kintur poton jubah-Ne jari selah.

Markus

Video Markus 6

Ikuti Kami:

KONTAK | PARTISIPASI | DONASI