Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Itadingken Jesus ingan e, mulih ia ku KutaNa. Ikut pe ajar-AjarNa.
2 Sanga wari Sabat ibenaken Jesus ngajar i bas rumah persembahen. Kalak si nterem si megi PengajarenNa kemamangen, nina, "I ja nari nge PemetehNa e? Kepentaren kai nge si lit i bas Ia? Kuga banci tanda sengget si bagenda jadi arah TanNa?
3 Ma kin Ia tukang kayu, anak Maria, senina Jakup, Joses, Judas ras Simon? Ma i jenda kin TurangNa pe?" Emaka itulak kalak ndai Jesus.
4 Nina Jesus man kalak e, "Sekalak nabi ipehaga i japa pe, tapi adi ikutana, i tengah-tengah keluargana ras i tengah-tengah jabuna, lang."
5 I Nasaret e, Yesus la erbahan sada tanda sengget pe, seakatan pepalem piga-piga kalak sakit alu namaken TanNa ku babona.
6 Mamang kal ate Jesus sabap la lit kiniteken kalak ndai. Jenari lawes Jesus ngajar ku kuta-kuta sekelewet Nasaret.
7 IdiloNa ajar-ajar si sepulu dua, janah IsuruhNa dua-dua kalak sendalanen. IberekenNa man ajar-ajar e kuasa pelawesken setan,
8 janah IpedahiNa nina, "Ola kai pe baba i bas perdalanndu seakatan ciken. Ola baba roti, ntah gajut-gajut, ntah duit i bas kantongndu.
9 Banci kam erselop, tapi ola dua lapis bajundu."
10 Tole nina Jesus, "Adi i bas sada kuta ialo-alo kalak kam kesilang i bas rumahna, i jelah kam ngayak kam berkat ka ku kuta si deban.
11 Tapi adi i bas sada ingan la kam ialoken kalak ntah la kam ibegikenna, tadingkenlah ingan e, janah apusi pe abu si leket i bas nahendu. Enda pagi sada tanda bukti si jadi saksi man bana."
12 Emaka lawes ajar-ajar ndai, iberitakenna man kalak si nterem gelah jera kalak si nterem i bas dosa-dosana nari.
13 Melala setan ipelawesna janah nterem kalak sakit isapukenna alu minak pepalemca.
14 Raja Herodes pe megi berita kerna Jesus, sabap ku japa pe nggo terberita GelarNa. Piga-piga kalak ngatakenca, "Johanes Peridiken nggo keke i bas si mate nari, emaka ngasup Ia erbahan tanda-tanda sengget."
15 Nina ka kalak si deban, "Ia me Elia." Bage pe lit ka ngatakenca, "Ia sekalak nabi, bali ras nabi-nabi si gelgel e."
16 Sanga ibegi Herodes kerna perbahanen Jesus nina, "Ia kap Johanes Peridiken, si nggo kusuruh gelah itampul kerahungna. Tapi genduari nggo nggeluh mulihken."
17 Herodes enda me si nuruhsa mbaruenda maka Johanes Peridiken itangkap, igariken janah ipenjaraken erkiteken Herodias. Herodias ndehara seninana Pilipus, si nggo ibuatna jadi ndeharana.
18 Herodes pernah iajarken Johanes Peridiken nina, "La patut iempoindu ndehara seninandu!"
19 Perbahan e nembeh ate Herodias janah ibunuhna pe atena Johanes Peridiken. Tapi la surung perbahan Herodes engkawali ia.
20 Herodes mbiar ngenehen Johanes Peridiken sabap ietehna Johanes Peridiken kalak bujur ras badia. Meriah pe ukurna megiken pengajaren Johanes Peridiken, amin gia megati ia terpukul ibahan isi pengajaren e.
21 Sanga peringeten wari tubuh Herodes, ibahanna pesta, janah iundangna pegawai-pegawaina, puanglima-puanglima ras pembesar-pembesar i Galilea nari.
22 Kesempaten enda ipergunaken Herodias. Sanga e meriah kal ukur raja ras temue-temuena perbahan landek sekalak anak Herodias si diberu. Emaka nina Raja man anak ndai, "Kai sura-surandu kataken man bangku, maka kubereken."
23 Ersumpah pe Herodes nina, "Kai pe ipindondu kubere, aminna gia setengah i bas kerajanku enda!"
24 Emaka ndarat diberu ndai nungkun man nandena nina, "Kai dage kupindo nande?" Erjabap nandena, "Pindo takal Johanes Peridiken."
25 Minter mulihken diberu ndai ngadap man raja nina, "Ateku maka genduari iberekenndu man bangku takal Johanes Peridiken tare pinggan."
26 Ceda kal ate raja, tapi la ia pang nulak pemindon enda, nginget sumpahna i lebe-lebe temuena.
27 Minter isuruhna sekalak juak-juakna ngelegi takal Johanes Peridiken. Emaka lawes juak-juak ndai ku penjara, itampulna kerahung Johanes Peridiken,
28 jenari ibabana takal e tare pinggan, janah iberekenna man diberu ndai. Ibereken diberu e ka takal ndai man nandena.
29 Kenca ibegi ajar-ajar Johanes Peridiken kerna si e, reh ia ngelegi maitna, jenari ikuburkenna.
30 Mulih ka kerina rasul-rasul ndahi Jesus. Iturikenna man Jesus kai si nggo ibahanna ras kai si nggo iajarkenna.
31 Perbahan nterem jelma rehen, lanai sempat Jesus ras ajar-AjarNa man. Emaka nina Jesus man ajar-AjarNa, "Ota kita ku ingan si teneng, gelah banci kam istirahat kentisik."
32 Jenari berkat ia kerina tare perahu ku ingan si melenget.
33 Tapi sanga i bas perdalanen, nterem jelma ngidahsa. Itandai kalak pe Jesus. Emaka i bas kerina kuta nari berkat kalak erdalan ku ingan si i tuju Jesus, janah leben pe kalak si nterem seh asa Jesus.
34 Kenca nusur Jesus i perahu nari janah kenca IdahNa jelma si nterem, mekuah AteNa sabap jelma si nterem e bali ras biri-biri si la lit permakanna. Emaka ibenaken Jesus ngajari jelma si nterem alu erbage-bage pengajaren.
35 Sabap wari nandangi gelap, emaka reh ajar-AjarNa ndahi Ia nina, "Ingan enda melenget, janah wari pe nggo nandangi ku gelapna.
36 Suruhlah kalak enda lawes, gelah banci itukurna nakanna i kuta-kuta sekelewet enda."
37 Ngaloi Jesus nina, "Kam lah mereken nakanna." Nina ka ajar-AjarNa, "Pala lawes kami nukur nakan alu erga dua ratus duit pirak guna kalak enda?"
38 Emaka isungkun Jesus ajar-AjarNa nina, "Piga lit roti i bas kam? Cuba nehen!" Kenca inehen ajar-ajar ikatakenna man Jesus nina, "Roti lima ngkibul, janah ikan dua."
39 Jenari ikataken Jesus man ajar-ajar, gelah kerina kalak si nterem kundul erterpuk-terpuk i bas mbalmbal si meratah e.
40 Emaka kundul kerina erterpuk-terpuk, lit seratus, lit lima puluh kalak sada terpuk.
41 Kenca bage IbuatNa roti si lima ras ikan si dua ndai, ertoto Ia IkatakenNa bujur man Dibata. Emaka icepik-CepikNa roti e, IberekenNa man ajar-AjarNa gelah ielaken man kalak si nterem. Ikan si dua ndai pe IberekenNa man kalak e.
42 Maka man me kerina seh besur.
43 Kenca elah man, ipepulung ajar-ajar roti ras ikan si iba, buena lit sepulu dua sumpit.
44 Teremna dilaki si man ndai kira-kira lima ribu kalak.
45 Kenca bage, minter isuruh Jesus ajar-AjarNa nangkih perahu gelah leben berkat ngepar ku Betsaida. Jelma si nterem pe IsuruhNa mulih.
46 Kenca berkat ajar-AjarNa lawes Ia ku sada uruk-uruk janah ertoto Ia i je.
47 Kenca wari nggo gelap, perahu ndai nggo seh i tengah-tengah dano, tapi Jesus sisada i daraten.
48 Idah Jesus maka mesera iakap ajar-ajar engkayuhken perahuna ngelawan angin si nungsang perahu e, emaka kira-kira jam telu erpagi-pagi reh Jesus erdalan i babo lau ndahi ajar-ajar; menam ibentasi Jesus kalak ndai.
49 Tapi sanga idah ajar-ajar Ia erdalan i babo lau, iakapna begu,
50 emaka serko ia kerina perbahan biarna. Sabap kerina ia ngidahsa emaka sengget kal ia. Minter ngerana Jesus nina, "Tetapkenlah, ukurndu! Aku nge enda, ola kam mbiar."
51 Emaka idatasi Jesus perahu ndai, janah angin pe ngadi. Mamang kal ate ajar-ajar,
52 sabap kerna roti ndai pe langa iangkana janah la ia ngasup ngukurisa.
53 Seh me ia i lepar, i Genesaret. I je itambatkenna perahu e.
54 Asum berkat nadingken perahu, minter itandai kalak Jesus.
55 Kiam kalak si nterem ngelegi keluargana si penakiten janah ilanjana tare tilam. Ku ja Jesus lawes ku je me ibabana.
56 Ku ja pa pe Jesus reh, ku dusun-dusun, ku kuta-kuta, ntah ku kota-kota, nterem kalak si penakiten itaruhken kade-kadena ku pasar-pasar janah ipindona alu mesangat man Jesus gelah kalak si sakit e banci ndadap UisNa lah gia. Janah kerina kalak si ndadap uis Jesus jadi malem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA