¹ Yesus kim zere hon de ang ta gwen wenya ban etan but srem golak golebiti gwe zaka, hwena zini hen zao gweꞌanka. Aha tahana mes sak gweblaka.
² Hwena Yesus mo kareksa de hlaulblun hap de zini hen zewe lowe heꞌak. Zep kara daꞌak, “Zen wehe neno mae mo syal tan srem yaklana an hap dena ngip guꞌunka– zisi de dawem tankamye?”
³ Yesus ki zep taha sak zini insa gubluka, “Haen, ano mae mo dang gwenna a dekon emki zauzun.”
⁴ Ki zep hwena takensibiridaka, “Musa mo titi tabin olak, nen basa de Hari Sabatkam gol gwen? Hari Sabatkam san ha nen kareksa zi hip gol gwizimdin? San ha dawemsa nen gol gwizimdin? Hari Sabatkam san ha nen zisi ngaya ta gwibin? San ha nen tamera gwen?” Hwena zen man nasalsiblik.
⁵ Yesus ki zep jala ban nwekam amjanbirki, hwena man hen kwasang gwibiridaka, sap zen nol drak-drak enna. Ki zep hwena zi taha sakna insa gubluka, “Tahana insa emki inin gilsin.” Ki zep hendep inin gilsiki, dekam zep hendep tahana in etan dawem gweblak.
⁶ Farisikam de gubirida gwen zini in ki zep hendep but srem gola in kon te so gwek, hendep dekam zep Raja Herodes hon de biti gwen zi niban tagal gwesik. Man ze olsa ahaꞌen nuꞌik– Yesussu de tan hap denaka.
⁷ Yesus kim zere hon de ang ta gwen wenya ban Ho Gutuna Galilea san golesek gweka, zi trana lun kon zep nertrozak– langna Galilea kore zini hen tingare Yerusalem mo lang nakore zini. Ahakon Idumea mo lang nakon, hen weyana Yordan mo yakla hatase gwezan nakon, hen e darena Tirus hen Sidon mo lang nakon. Zen kitak Yesus onak dep yaing gwezak, sap zen mes zebe hap dena esane gwe-gwek– Zen mensa syal gwe-gwekaye.
⁸ (3:7)
⁹ Zini in beya tanganna. Yesus zep zere hon de ang ta gwen wenyaka gubiridaka, “Ap bulu hamal ulblik– zewe aka sewesek, dekon aka tawa tabik. Kama nakon Asa sa klasam dasil.”
¹⁰ Sap yaklana inkam Zen mes zi sang-sangna beyakam dawem tabirki, zen in zep hwena ahakore zi sang-sangna atata da gwibiꞌinzak– dekam de Yesussu golek de tan hap hen olk tan hap.
¹¹ Hen dowal-dowal mo tilbiridan wenya Yesussu de hla tankam zep eik gwehe gweꞌanzak, dekon zep anakan eherhese gweꞌak, “Em in Alap mo Tane.”
¹² Hwena Yesus ki zep jala ban dowal-dowala insa gubiridaka, “Asa bahem kira tan. Balkkam em sek gwen.”
¹³ Yesus ki zep kwatap teknak hata seka, dekon zep hwena zini mensa dua-blas enkam Zena dwam gwibiridaka, desa en gu sonebiridaka. Kim yaing gwezak, zao zep zere hon de ang ta gwen hap anakare ola ban gubiridaka, “Ëe ansa emsa gu sonebiridal, em eka Asa ang e gweblak, hen emsa aka gubirida gwek– ano olsa de gol halada gwen hap.
¹⁴ (3:13)
¹⁵ Hen Ëe asa ebe mae hap ere mo sosonsa golzim– em ekakim dowal-dowalsa olealsa sone gwibik.”
¹⁶ Dua-blas enkam de zini in mo bosem-sena an zen: Simon– mensa hen Yesus “Petrus”kum bose taka.
¹⁷ Hen Zebedeus mo walas darena Yakobus ne Yohanis ne. Desa hen Yesus zere mae mo olkam “Boanerges”kam bose soka. Zeno enlalana, zeno nik mo ola jal enkam yawala– ngli glung makan.
¹⁸ Ahana Andreas, Pilipus, Bartolomeus, Matius, Tomas, Yakobus– zen Alpeus mo tane, Tadeus, hen ahana Simon Bak– men zen nonol Israel dikim Roma mo irik gin nikon eze-en gwen hap de easas gwennak ang gwekake,
¹⁹ hen Kariot walya Yudas Bak– men zen hendep Yesussu zergukuke.
²⁰ Yesus ki zep zere mo gwe gwen san dep lwa halka, hwena zi trana ki zep etan yaing gwezak, zep Yesus hendep zere hon de ang ta gwen wenya ban bawalkam dep? – goletembane tan naye.
²¹ Hen ahakon dekam man Yesussu nen gweblaꞌak, “Zen mes mamak gwera.” Iye zem kim kirekam esak, dekam zep yaing gwezak– kwang tahan hap.
²² Hwena Musa mo titi tabin olsa de tawa ta gwibin zini mes hen Yerusalem kon yaing gwezak, hen zen man anakan nen gweblaꞌak, “In dowal mo kigina Beelzebul Bak bi gweblaka. In zep zeno sosonkam syal gwe-gweꞌara– dekam de aha dowal-dowalsa zeralsa sone gwibin hipye.”
²³ In zep Yesus zi beyam-byana insa kwang guludan hap gubiridaka, dekam zep anakan ola gulk sun blaonzimki, “San ha dowal mo kigi mo aha hlikna maka dowal bose zemka nolealsa sone gwibiꞌin? Kina ki bejen.
²⁴ Hen kirekam, aha irik gin nik de hliweꞌanam, etan zen de eijan hap, dekam irik ginni in molya etan etatete gweꞌanam. Maka hendep esekwak gweꞌan.
²⁵ Hen kirekam, zenaka de gil-gil gwibiridan nakon de aha-ere golak dinik hliweꞌanam, zen maka hendep sekwak gweꞌan.
²⁶ Zep hen kirekam, dowal mo kigi mo irik gin nik de hliweꞌanam, etan zenaka de goleeijan hap, zen molya eholo gweꞌanam. Nabakam maka hendep denaban altiꞌin. Zep dowal mo kigi mo aha hlikna, zen molya zenaka nolealsa sone gwibiꞌinam.
²⁷ “Sap Ëe dowal mo kigi mo bi gwibin kire-kire dawemsae jal zi mo kim alal ta gweblaꞌan. Zi jal-jal de zere mo golsa kara taꞌanam, zebe hap de jal zini na-en molya tiꞌin zanam. Diki zini insa de nonol balk tankam hen tahalenkam, dekam zeno kire-kirena maka alal tablaꞌara.
²⁸ “Eiwa denakae emsa gubiridaꞌan: Alap maka zi mo kirekam-kirekam karekna tingan tap gulsuk gwizimꞌira, hen sap Zenaka de lamang tanna, desa hen maka tap gulsuk gwizimꞌira. Diki aha-en:
²⁹ Zi de Alap mo Enhosa lamang tankam, desa Alap bejen tangan tap gulsublun. Kirekam de karekna zen mes hendep denaban makan gweblanan.”
³⁰ Yesus mae hap ki kirekam gubiridaka: Insa Zenaka nenblakke, “In dowal tilblika.”
³¹ Yesus mo anena ki zep oso wal zeban Yesussu de zertoran hap goleyaing gwezak. Zisi zep nenbiridak– zen de Yesussu gublun hap. Zena e nakon nesblaꞌak.
³² Hwena Zen zi ngirinnik nikinꞌinka. Zao zep nenblak, “Bian, eno anena oso wal oban e nakon emsa ziesblaꞌanon. Zen man edwam gweꞌan– emsa de zertowen hap.”
³³ Yesus ki zep ding gulzimki, “Hwena nonol Ëe anik emsa gubiridak, ano anena hen oso-walya, zen diki a kirekam de zisi moye:”
³⁴ Ki zep hwena zini men zen zere mo alp nakon teinikinꞌik, desa nwekam amjanbirki, ki zep hwena gubiridaka, “Diki an zen lowe heꞌan, zen zen– ano anena hen oso walyaye!
³⁵ Sap Alap mo ol san men zen ang ta gwenan, zen diki zen tangan– ano anena, oso walya hen somol walyaye.”