Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pomaoma-omasa ma Wange 'ipasakau de ngo Maria Magdalena, ngo Maria 'o Yakobus ma 'esa, de ngo Salome yotagi 'okia sonaa ma bounu yaowa-owa yo'ija ma ngale yosidausu 'o Yesus wi songene.

² Kayaika 'ikinitara 'o wange ma di-disiraka ma 'Ahadi ge'ena, de 'ona yotagi 'o bo'osuika.

³ 'O ngekomika de yomakadongose 'ato, "Nago'ona dua 'inariwo 'o teto 'o bo'osuku ma ngoranoka 'isitato-tatokino yaloloko?" sababu 'o teto ge'ena ko ma dingoonuwa. Ma ge'enaka yototarika 'ena ma teto ge'ena 'ilolokokau.

⁴ (16:3)

⁵ Ge'enaka de yowosanga ma bo'osuku ma dodaka, de yomalega 'o giniraika 'ena 'o dogu'uru wimoi wi baju 'i'are-'arese wogogerie, so yakitodokana.

⁶ 'O dogu'uru gu'una kawongosekau, "'Uwa nimodongo!Ngoi tanako ngini wininonu 'o Yesus 'o Nazaretino, gee wisidelokau 'o salipoka. 'Una kowi'iwau ne'enaka. 'Una womomiokau! Ngaro nialega gee winoa-noaka.

⁷ Kone'enasi niotagiou, niositotara 'o habari ne'ena to 'una wi do-domoteika, ge'ena la 'o Petrusika mita. Niosidemo 'ato, ''Una wosirakau 'o Galileaka, so kadoka 'asa deika winimake 'una, 'isoka gee wosidemokau nginika.'"

⁸ So 'ona yokokisupu de yoowara, sababu yakitodokana de yakimodongo. So koyosikademowa ka moika ma sababu yakimodongo ma sala.

⁹ ['O nge-ngeweka go'ona yotagi 'o Petrus de wi ma-manaika. Ge'enaka de yosijarita kayositipokono 'iodumu gee 'o dogu'uru gu'una wakisidemo-demoka.

¹⁰ Ge'ena 'ipasa de 'o Yesus ma sirete wosihabari 'o habari 'itebi-tebini de 'ika-kakali ma ngale 'o laha kaisi'ado-'adonika, ma ngekomo 'awi do-domoteke, dina 'o wange ma siwaroka de daioko 'o wange ma dumunoko.]

¹¹ Gee yo'isenoka 'ato 'o Yesus wowangokau de ngo Maria mimakekau, ma koyongakuwasi.

¹² Ge'ena 'iduangino, de 'o Yesus womasidumutu 'awi do-domoteke yamididika, ma lugo 'ireguoli. Ge'ena 'idadi ma 'orasi 'o do-domoteke yamididi go'ona yotagi 'o soana moika.

¹³ So 'ona yolio de yosidemo manga ma-manaika, ma 'ona koyongakuwasi.

¹⁴ 'O Yesus womasidumutu ma du-du'uruokau ge'ena 'awi do-domoteke yamogiooko de moika, ma 'orasi 'ona yo'odomo. 'Una wakitawanono sababu 'ona manga ngo-ngaku koikuatuwa de kaifoloi yo'opini so ngaro 'o nyawa gee 'ona ma sirete wimakekau 'ato 'o Yesus wowangokau, ma 'ona koyongakuwa.

¹⁵ Ge'enaka de 'o Yesus kawongosekau 'onaka, "Niotagi 'o dunia niakiloliti, niositotara 'o Habari ma Owa ma Jo'oungu ma Dutuno ge'ena 'o nyawa 'iodumika.

¹⁶ 'O nyawa gee koyongakuwa 'asa yakihukumu. Ma 'o nyawa gee yongaku-ngaku de yaki'osiki, 'asa yakisilaha.

¹⁷ Ma nyo-nyata 'ato 'ona ge'ena yongaku, 'ona 'asa 'o tokata yoginiiki de to ngoi 'ai ronga; 'ona 'asa yobi-bicara de 'o demo-demo gee 'ona koyanakowa.

¹⁸ De ngaro 'o ngia ya'ao bolo 'o bo-bokusu ya'okere, ma koyoboditowa, de mita nako yaki'ao 'o nyawa yopa-panyakeka, ge'ena dua manga panyake 'i'aiki."

¹⁹ Ma Jou Yesus wobicara 'iduanga, de wisidoa 'o sorogaade. Ge'enaka 'una wopareta de wokuasa de ma Jo'oungu ma Dutu.

²⁰ So 'awi do-domoteke yotagi yositotara 'o habari ma Jo'oungu ma Dutuno kiaka naga bato. De ma Jou mita womanarama de de 'ona, de ma nyo-nyata 'ato yositota-totara ge'ena ma goungu, ge'ena la 'o no-nako 'ihera-herangi.

Markus

Video Markus 16

Ikuti Kami:

KONTAK | PARTISIPASI | DONASI