Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda in no'italibdon singgai in Sabat, ki Maria Magdalena, ki Maria ki inaí i Yakobus bo i Salome minayak notaḷui kon ramuan mita sim poḷana kom mayat i Yesus.
2 Totokpa in subuh kon singgai dungkuḷ kon diminggu tatua mosia minayak ing kubur.
3 Kon daḷan mosia nosiliboían, "Ki ine im motuḷung ko'inaton molilid kom batu inta pinolingkop kong kubur?" Sin noḷoben totok im batu tatua. Ta'e no'iyaputmai ing kubur tatua indoianmai batu inta pinolingkop kom bubuí ing kubur nolitoidon.
4 (16:3)
5 Bo mosia sinumu'ot kom bonu ing kubur tatua. Kom bonu ing kubur dotaí ing koḷanan inontong monia tobatuí tayamobiag inta nogi jubah nobudoí ilimituí makow, bo no'italikokog im mosia.
6 Ta'e tayamobiag tatua noguman ko'i monia, "Dika mo'ondok! Kinota'auankubií kom mo'ikow motayak ko'i Yesus intau Nasaret inta ain pinopopakuí kong kayu pinoyotalempang. Diaíbií in Sia kon na'a. Sia ain nobiag! Indoiaidon na'a in tampat pinogulidan monia ko'i Yesus.
7 Daí bayakdon tana'a makow bo pota'au in habar tana'a kom murií-Nya mita, termasuk ko'i Petrus. Poguman nana'a, 'Sia inumunadon ko'i monimu minayak ing Galilea. Bain kon tua bo ontongon monimu in Sia, naí inta aim pinoguman-Nya ko'i monimu.'"
8 Daí iḷumuaidon mosia nongkon kubur tatua bo noribatuk lantaran no'italikokog bo no'ondok. Mosia diaíbií nongonguman ko'i inekadon lantaran no'ondok.
9 [Bobay mita tatua minayak ko'i Petrus bo kon yobayatnya mita bodongka nongonguman notoyong kom bayongan inta aim pinota'au ko'i monia i intau tayamobiag tatua.
10 Nopaḷut makow kon tua, pinongin murií-Nya mita ki Yesus nopota'au pinangkoi kom pomuka'an nopobayak in toyopan. Sia nopota'au in habar inta mosuci bo mononoi soaḷ kasaḷamatan inta mononoi.
11 Ta'e naonda ing kinodongogan monia kong ki Yesus nobiag, bo ki Maria noko'ontongdon ko'i-Nia, diaíbií im mosia nopirisaya.
12 No'idudui kon tua ki Yesus nokipogontong kom murií-Nya doyowa takin cara tolaeng. Tua nobalií wakutu im murií-Nya doyowa tatua koyogot nopobayak kon tobatuí lipuí.
13 Daí nobui im mosia bo nopota'au in soaáḷ tatua ko murií mita i Yesus ibanea. Ta'e diaí im mosia mopirisaya.
14 Pangabisannya, ki Yesus nokipogontong kom murií-Nya mita mopuḷuh bomitaí tatua, wakutu im mosia koyogot monga'an. Sinoruían-Nya im murií-Nya mita tatua sin diaí totok mopirisaya bo motogat totok ing gina sahingga in diaí mopirisaya kon intau mita inta ain noko'ontong kong ki Yesus nobiagdon bui.
15 Guman i Yesus ko'i monia, "Bayakdon im bayongan dunia na'a bo pota'audon in Habar Mopia nongkon i Allah kom bayongan intau.
16 Intau inta diaí mopirisaya hukumon. Ta'e intau inta mopirisaya bo binaptis im posaḷamaton.
17 Na'a in tanda mita inta moyotakin ko'i monia inta mopirisaya, mosia moguntun kon dimukud mita mora'at podoyon kon tangoi-Ku; mosia mosingog kom bonu im bahasa inta diaí kinota'auan monia.
18 Aka mosia mokadai kon uḷag andeka monginum kon rasum, diaíbií mobodito im mosia. Bo aka kadaian monia intau mita motakit yo mongopia."
19 Naonda ing ki Yesus nopaḷut nongonguman monia, Sia sinintakdon minayak in soroga. Kon tua Sia momarentah takin i Allah.
20 Daí murií-Nya mita minayak nopota'a-ta'au makow in habar nongkon i Allah. Bo mosia sinakinan i Tuhan kom bonu im binaya-baya'an makow monia. Tua pinonyata i Tuhan kon oaíid mita inta mokoherang kon totu'ubií im pinota'au monia tua.]
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA