Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sewaktu jelo Sabat sampun liwat, Mariam Magdalena, Mariam inaqne Yakub, dait Salome lumbar beli ramuan-ramuan jari minyakin jenazah Deside Isa.

² Masih aru gati sewaktu baruq tiwoq jelo, lẽq jelo Ahad, ie pade lumbar ojok makam.

³ Lẽq tengaq langan ie pade bebase sopoq kance saq lainne, "Sai gen ngalihang ite batu pengimpet lawang makam?" Sẽngaq batu nike belẽq gati. Laguq sewaktu dateng lẽq derike ie pade serioq batu nike sampun ngalih.

⁴ (16:3)

⁵ Beterus ie pade tame ojok dalem makam nike. Lẽq dalemne lẽq sedi kanan, ie pade serioq sopoq dengan bajang saq ngengadu jubah putẽq kenyeke melinggih, dait ie pade tinjot.

⁶ Dengan bajang nike bebase, "Ndaq takut! Tiang taoq side pade boyaq Deside Isa dengan Nazaret saq sampun tepakuq lẽq kayuq salib nike. Ie ndẽq araq lẽq deriki. Ie sampun idup! Silaq serioq, niki taoq Ie tesarẽang siq ie pade.

⁷ Mangkin silaq lumbar, kabarang tipaq pengiring-pengiring-Ne, dait Petrus ẽndah. Pade badaq, 'Ie sampun senjuluq side pade lumbar ojok Galilea. Lẽq derike side pade gen serioq Ie, maraq saq sampun Ie manikang lẽq side.'"

⁸ Beterus ie pade sugul lẽman makam nike terus pelai lantaran tinjot dait takut. Ie pade ndẽq bebase napi-napi lẽq sai juaq lantaran takut. Secare singket ie pade nyampẽang selapuq pesen nike tipaq Petrus dait batur-baturne. Sesampun nike Deside Isa mẽsaq siq perantarean pengiring-pengiring-Ne beriteang lẽman Timuq ojok Bat berite saq suci dait saq ndẽq bau tebinaseang mengenai keselametan saq kekel nike.

⁹ Sesampun Deside Isa idup lẽman ninggal, masih aru gati lẽq jelo ahad, penembẽq gati Deside Isa nyatayang diriq tipaq Mariam Magdalena. Lẽman Mariam nike Deside Isa sampun nyugulang pituq roh jahat.

¹⁰ Make Mariam Magdalena lumbar badaqang peristiwe nike tipaq dengan-dengan saq tetep ngiring Deside Isa, saq kenyeke bedukecite dait nangis.

¹¹ Laguq sewaktu ie pade dengah bahwe Deside Isa sampun idup dait bahwe Mariam sampun serioq Ie, ie pade ndẽq percaye.

¹² Sesampun nike Ie nyatayang diriq siq rue saq lain tipaq due dengan lẽman ie pade, sewaktu deduaqne dalem kelampan ojok luah kote.

¹³ Jari ie pade tulak dait badaq hal nike tipaq saq lain-lainne. Laguq ie pade ndẽq percaye.

¹⁴ Ahirne Deside Isa nyatayang diriq lẽq solas pengiring-Ne sewaktu ie pade kenyeke bekelor. Ie pade teperinget siq Deside Isa sẽngaq ie pade kurang iman dait pagah gati sehingge ndẽq percaye lẽq dengan-dengan saq sampun serioq mẽsaq bahwe Deside Isa idup.

¹⁵ Beterus Deside Isa bemanik lẽq ie pade, "Silaq lumbar ojok seantẽro dunie dait beriteang Kabar Solah lẽman Allah tipaq selapuq mahluk.

¹⁶ Dengan saq percaye dait tebaptis gen selamet, laguq dengan saq ndẽq percaye gen tehukum.

¹⁷ Sebagẽ bukti bahwe ie pade percaye, dengan-dengan nike gen sediq roh jahat kadu aran Tiang; ie pade gen ngeraos kadu macem-macem base saq ndẽq ie pade kenal.

¹⁸ Lamun ie pade negel ulah atao nginem racun, ie pade ndẽq gen celake. Lamun ie pade noloq imene lẽq atas dengan-dengan saq sakit, dengan-dengan nike gen selah."

¹⁹ Sesampun Junjungan Saq Mulie Deside Isa bebaos kance ie pade, Ie kerangkatan ojok sorge. Lẽq derike Ie mrẽntah bareng kance Allah.

²⁰ Make pengiring-pengiring-Ne lumbar dait nyampẽang Kabar Solah lẽman Allah ojok mbẽ-mbẽ. Dait Tuhan ẽndah bekarye bareng kance ie pade, dait tebuktiang siq tande-tande ajaip bahwe berite saq ie pade sampẽang nike mule kenaq.

Markus

Video Markus 16

Ikuti Kami:

KONTAK | PARTISIPASI | DONASI