¹ Yesus dekam zep etan tawa tabinni ayang gulzimki, “Em de Alap mo bose hap tahalha zisi mas gwibirida gwenkam, ahaksa Alap hap de aha syal maekam, zi mo nwenak bahem golada gwen– dekam de emsa gublun hap, ‘Zen dawemna.’ Kirekam de syal gwenkam, ki hwena ngatan zi mo langnak de Bian molya syala in hap de dawemna ebe hap golblaka.
² Zep em de tahalha zisi Bian mo bose hap mas gwibiridankam, bahem aha zisi hamal hap gu-gubiridan– tagal gwennak de emsa hla tan hap. Bahem but srem golak ahaksa etagal gwen maenak anakan gubiridan, ‘Ëe kime mas gwibiridan hap hataꞌak, em dekam terya ban asa hut lu ane guk– dekakim zi beya asa hla dak, “Zen man angkam mas gwibiridan hap hataꞌara.”’ Men zen ek enkam Alap mo nwenak dikim esam gwesin hip de syala nol gwenan, zen kirekam egwe gwenan. Hwena eiwa denakae emsa gubiridaꞌan: Sap desa mes zere mae mo tahalha zisi de mas gwibirida gwen nakon boltere da gwibik, zep zebe mae hap Bian Alap molya lamkam zere mae mo syala in hap de dawemna golzimki.
³ Hwena em de tahalha zisi mas gwibirida gwenkam, sowekam emki mas gwibiridan– aha zi de emsa tawa gweblan sremkam.
⁴ Aningkim em aha zi hip dawemna gol gwizimdin. Sap neno mae mo ngatan zi mo langnak de Bianna, Zen zi mo aning gun syala man hlaul gwizimnira, hen Zen sa hwena ebe mae hap dawemna gol gwizimdi.”
⁵ “Em de Alapsa gu sone gweblankam, zi mo nwenak bahem– zi de emsa hla tan hapye. Men zen kire enlala naban nen sone gweblanan, zen zi beya mo ngirin nikon nen sone gweblanan– sap but srem golak, hen sap etagal gwen maenak. Men zen ek enkam Alap mo nwenak dikim esam gwesin hip de syala nol gwenan, zen kirekam esam gwesik gwenan. Hwena eiwa denakae emsa gubiridaꞌan: Sap desa mes zere mae mo Biansa de gu sone gweblan nakon boltere da gwibik, zep Bian Alap molya lamkam kire syal hap de dawemna golzimki.
⁶ Hwena em de Alapsa gu soneblankam, gol mwanak em tin, hen lilikinni em solhlasin. Dekon em aningkim gu soneblan. Sap neno mae mo Bian, hla ta gwen srem Zini Alap, Zen zi mo aning gun syala man hlaul gwizimnira, hen Zen dekam sa hwena ebe mae hap dawemna gol gwizimdi.”
⁷ “Em de Alapsa gu soneblankam, bahem aha-ere abena etan gollwa halasen gwen– men kirekam Alapsa de tame tan srem wenya egwe gwenanye. Sap zen man ekil gil gwenan, ‘Abesa de mam blalkam gollwa hala serankam, ki sa ano abena dokwak gulu.’
⁸ Hwena kirekam waba hap. Zep em zeno mae mo kim bahem. Sap Bian Zen mes eno dwam gwibinni tame gulku– em de nama abe tan sremnak.
⁹ “Zep em a kirekam em gu sone gweblan: Bian, ngatan zi mo langnak de Zini, dikire eno bosena teip nulsuk gwek.
¹⁰ Diki okamanak awe Em hen irik gin– in kirekam hen ngatan zi mo langnak irik giꞌirake.
¹¹ Namen dep de tembanena ap golzim.
¹² Ano mae mo karek-karekna ap tap gulsuk gwizim– ee men kirekame hen aha zi mo karekna eititi ei gwibirin, men desa ap nol gwizimninke.
¹³ Asa de akasibirida gwennak bahem nwe enkam asa kara ta gwibin. Hwena dowal mo kigi mo taha nakon asa alal gul gwe.”
¹⁴ Etan ki zep gubiridaka, “Men nara wal bose zik mo zebe hap de karek golblansa eititi gwibir-blinkam, ki ngatan zi mo langnak de Bian sa hen zeno karekna eititi gwibir-blira.
¹⁵ Hwena em de wal bose uk mo ebe hap de karek golblansa eititi gwibin sremkam, ki Bian hen molya eno karek-karekna ep tap gulsubluka.”
¹⁶ “Em de Biansa dikim enlala zon tasiblin naban abe ta gwen hap tembanesa elwa gwenkam, nwe-masena bahem edowe hana gwen. Sap men zen ek enkam Alap mo nwenak dikim esam gwesin hip de syala nol gwenan, zen kirekam egwe gwenan. Zen son maesa nawa gwibirin– dekam de zi anakan tawa gwibiridan hap, ‘Zen an Alap hap tembanesa elwaꞌan.’ Eiwa denakae emsa gubiridaꞌan: Sap desa mes zere mae mo tembane lwan nakon boltere da gwibik, zep Bian Alap molya lamkam kire syal hap de dawemna golzimki.
¹⁷ Hwena em de Biansa dikim abe tan hap tembanesa lwankam, nwe-masena em ngan tasik gwibin hen nol alana em sisir ta gwibin.
¹⁸ Bap zen aha zi emsa anakan tame tabin, ‘Zen Biansa dikim dawemkam abe tan hap tembanesa elwaꞌan.’ Sap neno mae mo Bian, hla ta gwen srem Zini Alap, Zen zi mo aning gun syala man hlaul gwizimnira, hen Zen dekam sa hwena ebe mae hap dawemna gol gwizimdi.”
¹⁹ “Auhu-kama ennak awe bahem kire-kirena ebeya gwen. Awe hwena sa ekalse gwer hen winim sa blom da gwibir, hen sowe zi sa dekam de kap tan hap eno gola insa dre dal.
²⁰ Diki dawem tanganna ngatan zi mo langnak em kang ta gwen. Zewe molya ekalse gwek, hen winimni molya ze blom dabik, hen sowe zini banakan molya kap dak.
²¹ Sap men zewe eno kire-kirena erlwa gwenna, eno enlalana hen zewe sa lwa gwera.”
²² “Nwena zen tim hip de lilikin– enho dikim ngatan gwen hap. Nwe nik de lalak nenna, dekam enhona hen ngatanna. Eno gwe hanna dekam, san de ngatan san de song gwenna.
²³ Hwena em de nwekam men-san an-sankam hir-hir gwe naserankam, dekam bute hala seran makan esa gwe gwera. Hen eno nwe nik de hai nenkam, dekam kawesin tangannak esa gwe gwera.”
²⁴ “Zini bejen dare teipsin zisi dawemkam babu gwizimdin. Zen hwena aha-en naka sa dawemkam kwasang gwe-gweblala hen blikip gwesik gweblala. Aha zini insa molya. Zep em hen kirekam: Em bejen em syala dan son– Alap mo syala ban, te-ala beya gwen hap de syala banye.
²⁵ “Zen in zep, em bahem anakan engalap gwe-gwen, ‘Ëe banakan asa gwer? Ëe basa asa twin gwibir hen otde gwibir? Hen ee basa asa ala so gwer?’ Emki eenlala gwen: Eno gwenna zen tembane en nakon hom lwa gwenan, hen timni ala so gwen hap de en nakon hom lwa gwenan.
²⁶ Em ba hap de kirekam engalap gwe-gwen hap? Emki mawasa enlala gwibiridan. Zen hom ba maena eiyas nil gwenan, hen hom dan gwenan, hen zeno mae mo gudangna hom– zewe de tarankam ba maesa kang ta gwen hapye. Hwena zen mes ki tame nuk, ‘Ngatan zi mo langnak de Bianna ki tembanena ap gol gwizimnira.’ Zep emki hen dam gulsuk gwen, ‘Ëe Bian mo nwenak mawa betek mo kim hom.’
²⁷ Em de ere mo gwen hap ngalap gwenkam, san ha em emaka ere mo gwenna insa engka en mae langa gulsuꞌura? Bejen.
²⁸ “Zep em ba hap de anakare hap enlalana ebeyam-bya gwen hap, ‘Ëe basa asa ala so gwer?’ Emki sap sona ok eiꞌi enlala gwibiridan. Zen hom syal ta gwenan, hen pakeanna hom dayal gwibirin.
²⁹ Hwena Ëe ama emsa gubiridaꞌan: Sap teipsin zini Salomo Bak, zen hwena hom ok eis nwe-awes makare pakeanna akeka– desa de zere mo te-ala beyakam teisyan hapye.
³⁰ Em in Biansa de taibliblanna tawa naka hom! Ok eis mo ehultunnu tihis tanganna, sap zen namen de enwe-awes gwenkam, hwena kaꞌan de ejek-jak gwen. Zen sap eiwa kirekam, hwena Alap ki desa kara ta gwibirida. Zep emki Biansa anakan taibli gweblan, ‘Zen molya asa ala so gwen hap denakim da tasiki.’
³¹ “Zep em bahem anakare hap engalap gwe-gwen, ‘Ëe basa asa twin gwibir hen otde gwibir? Hen ee basa asa ala so gwer?’
³² Sap Alapsa de tame tan srem zini zen kirekam engalap gwe-gwenan. Hwena neno mae mo ngatan zi mo langnak de Bianna, Zen anakan tawana, ‘Ano walasna an kiresa tahalha gwibiꞌira.’
³³ Hwena kitak ere mo tahalha gwibinni insa esa hla kul gwer– anakare enlala de eno mae mo enhonak bol-zaun gwenkamye, ‘Diki Bian Zen nabakam nesa irik gilzin, hen ee anik zeno dwam gwibin en san ang tak.’
³⁴ Bahem kaꞌan dep dena kip anakan engalap gwe-gwen, ‘Ëe kaꞌan basa asa jogwaher gul?’ Sap namen de tahalha hap dena, zen sren. Kaꞌan de tahalha hap dena, zen hen sren. Bahem kaꞌan de tahalha hap dena namen enlala gwibin. Dikire eno enlalana namen en dep dena kip lwak. Ngein sin dep de tahalha hap bahem engalap gwe-gwen.”