¹ Zao kim lwa seꞌak, dekam zep baptis ta gwibin zini Yohanis Alap mo olsa de ayang gul gwenkam kon gwesik hanaꞌanka. Zen zi srem nakon syal gweꞌanka– Yerusalem mo aha enak de eik nikon. Sane tan hap kim ze zini yaing gwe-gwek, dekam zep ola ayang gul gwizimki,
² “Ere mae mo karek-karek nakon em ehalen. Sap angkam Alap Zena man kon gwesik hanaꞌara– teipsinkim de nesa irik ginkimye.”
³ Yohanis zen orasa de sal tablan hap de zini men zebe hap Yesaya Bak Alap mo olak hamal hap anakan ale gulblukake, “Zini sa zi srem lang nakon taken gwera, ‘Haen, nere mae mo Teipsin Zi hip nen orasa hamal ta gublun! Hen nen dam-dam ta gublun!’”
⁴ Yohanis in Alap mo ol ayang gul gwen zini Elia Bak mo kim hen gwe gweka, zep unta ala nakore bajuna zeno kim hen ala so gweka. Takna hen Elia mo kim tweran sopkam denaka daul gweka. Tembanena hen zeno kim tembane gwe-gweka, zep ekasna twenblanda gweka, hen sobwal hona otde gweka.
⁵ Dekam zini zebon dep beya tangan nik weyana Yordan san dep sek gwe-gwek– tingare Yerusalem mo lang nakon, hen weyana Yordan mo alp san de e-e nakonye. Zewe zen nonol zere mae mo kirekam karek-kareksa damnak ekira-kla gwe-gwek. Ki zep hwena Yohanis baptis ta gwibirki.
⁶ (3:5)
⁷ Farisikam de gubirida gwen wenya hen Sadukikam de wenya zen hen zewe beyakam sane tan hap yaing gwe-gwek. Hwena Yohanis kim desa hlauluda guku, dekam zep gu-gubiridaka, “Em an gwe makare enlalana! Em ema eenlala gweꞌan, ‘Asa de baptis tabinkim Alap molya asa karek tabirki.’ Hwena em home ehaleꞌan. Alap mo jala kon molye eheya-hya gwek.
⁸ Zen in zep, em de Alap mo jala insa goltowen srem hap, em ere mae mo lowehen karekna insa wet gulsun– dekam de emsa anakan tame tabin hipye, ‘Zen eiwa mes ehaler.’
⁹ Em bahem anakan ekil gil gwen, ‘Ëe an Abraham mo auyan-aza nakore nakake, zep asa molya Alap karek tabirki.’ Sap Alap maka eno mae mo weinak dep kaso-kasona ansa Abraham mo auyan-aza hap yang tabiꞌira.
¹⁰ Sap Alap mo zer sonen Zini in Zen ano lure nakon hataꞌan zala, Zen mes hlala hohle gulu– dekam de tesya lu ta gwen hapye. Tenya men zen de eini ete srem gweꞌak, desa sa ausu ennak lu tala, hendep ki sa tinsik gwen srem syauk hi-hitinnik yal ta sera.
¹¹ Ëe weyakame emsa baptis ta gwibiꞌin– dekam de em enaka anakan goletre gwen hap, ‘Ëe mese ere mae mo karek-karek nakon ehaler.’ Hwena ano lun kon Zen hataꞌan zaka, Zen Alap mo Enhokam sa emsa baptis ta gwibiri, hen syaukkum. Zen abon onakon teipsin tanganna, zep zeno sepatu maesa de einblihan mae hap, ee hen toton bejene.
¹² Zen joksa zirensiꞌira– dekam de lensa len hap. Dangnak dena, desa yunak sa biti tala. Hwena syaena men zen dang alp san altiꞌik, desa tinsin srem syauk bla san dep sa yal ta sera.”
¹³ Dekam zep hen Yesus Galilea kon weyana Yordan san dep song gwe zaka, zao zep Yohanissi abe ta zaka, “Asa hen emki baptis tan.”
¹⁴ Hwena Yohanis man baes gweꞌanka– Yesussu de baptis tan hap. Man ze gubluka, “Bian, diki dawemna Em de asa baptis tankam bap. Hwena Em ba habe abon hatanan zala? – ee de Emsa baptis tan hapye!”
¹⁵ Yesus ki zep hwena ding gulbluka, “Em sap esa angkam Asa baptis tala. Sap zen dekam esa Alap mo dwam gwibinni kitak su kul sonera.” Ki zep hendep baptis taka.
¹⁶ Yesus kim dekon zil heꞌan zaka, mumuk ennak zep nglina hlang ne hanak. Yesus ki zep Alap mo Enhona hlaul guku– kim mawana ohola mo kim Zebon dep ati gwe ineꞌan zaka.
¹⁷ Dekam zep hen Alap mo ola esalsek, “An ere mo Tane– ere mo dang tininak de tanganna. Ëe ama tangan sam gwesik gweblanan.”