¹ Zao kim Yesus asa golelowe heꞌanka, ee dua-blaskam de wenya dekam zebe ze lakensiblizak, “Alap mo irik ginnik, abon mae onakon nara sa teipsili?”
² Yesus dekam zep walas tola haen gweblaka, ki zep ano mae mo nwenak de zaun hup gubluka,
³ ki zep hwena asa gubiridaka, “Eiwa denakae emsa gubiridaꞌan: Em de ere mae mo gwensa wet gulsun sremkam dekam de walas bete-tek mo kim lowehen hap, em molye Alap mo irik ginnik biti gwek.
⁴ Zini men zen zere mo enlalana walas betekna an mo kim betek taꞌanka, zen zen sa Alap mo irik ginnik teipsili.
⁵ Hen zini men zen de ano bose hap aha zisi mas gweblaꞌanka– sap anakare walas tol maesa, Ëe asa desa enlala gweblal, ‘Zen Asa mas gweblaꞌara.’
⁶ “Men nara Asa de taibliblan zisi, sap hen anakare walas betek maesa, karek san dep zertoranna, zen dikim hwena Asa hli tan hap, kire zini Alap serkam tangan sa karek tala. Diki dawemna, zen maka zertoran sremnak karekkam de tinsi hlaulku. Kaso dohon-honsa de holenak hule soneblan naban de hi tateknak keing gwen maekam, ki Alap molya karek taꞌanam.
⁷ Kareksa de gon hap de enlalana eiwa ki okamanak awe hata gwizimnira, hen zini zep Asa de taibliblan nakon ealtil gwenan. Zen zep sa lamkam tingare zi mo karek-karek hap okamana ansa Alap olo gulu. Hwena zini men zen zi bose zemka Asa dikim hli tan hap noleton gwenan, zen zen sa serkam de karekna noltower.
⁸ “Emsa de ere mo aha taha ahaksa tana anakan titi da gweꞌanam, ‘Haen, karekna ansa nen on,’ diki dawemna em blansin nika hiri son. Sap eme dare taha naban ahaksa tana naban zigweꞌanka, ki esa hendep Asa hli tala. Ki hwena tinsin srem syauknuk dep sa emsa hiri daser. Blansinkim ki emaka sam gwesiꞌira– aha-ere taha naban ahaksa tana naban de Alap onak gwe gwen hapye.
⁹ Hen kirekam, emsa de ere mo aha nwe titi ta gwenna, ‘Haen, nen karekna wakinsa karatda un,’ ki em nwena insa alsin nika hiri son. Sap eme dare nwe naban zigweꞌanka, ki esa hendep Asa hli tala. Ki hwena tinsin srem syauknuk esa hendep denaban gwe gwera. Alsinkim emaka sam gwesiꞌira– aha-ere nwe naban de Alap onak gwe gwen hapye.
¹⁰ “Bahem Asa de taibliblan anakare walas bete-tekna anakan enlala gwibirida gwen, ‘Zen aban apdenak hom.’ Emki sap eenlala gwen: Alap mo dam taha nakore zini man kire walasna aha-en aha-enkam kara da gwibirin, hen walas zem in de kareksa goltowenkam, dekam man Alapsa dang nitil gweblanan.
¹¹ (18:10)
¹² “Zep ansa emki esane gwen. Em wehe dam ulsuꞌuk? Ebon mae onakon, ahanik mo domba zaho de 100 enkam lowe heꞌanam, hwena aha tolik de jek-jak gweblaꞌanam, zen banakan maka gweꞌara? Zen 99kam dena insa kwatapnak maka sonak hli yuludaꞌara– dekam de jek-jak gwen zini insa teblan hap.
¹³ Eiwa denakae emsa gubiridaꞌan: Zen kim de dombana insa hla taꞌanka, zeno zebe hap de isrip-srina sa tangan taman kinil. 99kam de wenya in hap de isrip-srina sa lwalaher.
¹⁴ Zen hen kirekam– ere mae mo ngatan zi mo langnak de Bian naye. Zen hom dwam gweꞌara– aha mae nik de hendep de egwe gwen san dep de ora nakon syalhen hapye, sap anakare walas betek.”
¹⁵ “Asa de taibliblan zi bose uk de ebe hap kareksa golblanna, emki zebon osan song gwen– dekam de ze-erenak anakan gublun hap, ‘Em ema anakan asa karek taka.’ Sowekam em e-en tap ulsun– aha de emsa tawa gwizimdin sremkam. Zen de emsa salblankam, anakan de emsa gublun naban, ‘Bahem ano karekna insa enlala gwibin,’ ki mese etan umlae enda– san de ere mo iyena kiye.
¹⁶ Hwena zen de kirekam emsa salblan sremna, emki ahanaka kwang tan, ahaksa dan kwang son– deban mae de tap gulsun hup. Sap Alap mo olak man lwak: ‘Bahem zini na-en karek tan– aha-ere zi de anakan gublunkamye, “Zen man karek gweka.” Diki zini dan, ahaksa dan-ahare zi de kirekam gublunkam, “Zen man eiwa karek gweka,” dekam karek gwen zini insa em karek tan.’ Zep aha zisi em kwang son– zen de tap gunnuk ang en hap hen eno olsa soson un hip.
¹⁷ Hwena emsa de karek tan zini in de nama eno mae mo olsa san sremkam, dekam jematnak de tagal gwennak em zeno karekna insa kira gulblun. Hen zini in de etan jemat mo dwam gwibin sin ang gwen sremkam, dekam tangan tingare jematna em zini insa langa tasin– men kirekam Israel zini Alapsa de tame tan srem zini neibirida gwenanke. Dekam sap esa zini insa langa lasil– men kirekam Israel zini pajak te-ala alal ta gwen zisi neibirida gwenanke.
¹⁸ “Ëe eiwa denakae emsa gubiridaꞌan: Em Abon de biti gwen wenya, em esa ngatan zi mo langnak de Bian mo dwam gwibin sin okamanak de zi hip anakarekam klis ul gwizim, ‘Kirekam de egwenna zen Alap mo nwenak karek,’ hen ‘Kirekam de egwenna zen Alap mo nwenak kareksa hom.’
¹⁹ “Hen Ëe ama etan emsa gubiridaꞌan: Ebon mae onakon de aha dare nik okamanak awe olsa anakan aha-en uꞌinam, ‘Nen kirekam esa Alapsa abe la gwera,’ ano Bian sa kirekam de abena dokwak gul gwera, hen sa kirekam syal gwe-gwibir-zimdi.
²⁰ Sap em men zewe ano bose hap dan-dan, ahaksa dan-ahare zi mae tagal gwenna, Ëe dekam hen asa eno mae mo ngirin klesnak dum gwehe gwezal.”
²¹ Petrus ki zep Yesussu takensibli zaka, “Bian, ano wal bose de abe hap etan-etankam kareksa gol gweblaꞌanam, beyana banakare ennak de zaunnuk amaka eititi gwibir-bli zaheꞌan? San ha tuju ennak amaka golzausuꞌun? Dekorena molye eititi gwibir-blik.”
²² Yesus ki zep ding gulbluka, “Tuju ennak bahem. Diki 700 ennak zen hendep zaun– emsa de karek ta tine gwen naye.
²³ Sap Alap zere mo irik ginni zen gulk sun de ol blaoranna an kiye: Teipsin zini man zere mo te-alana aitblika. Dekam te-alana mensa zere mo taha tri so gweblan zi hip bohe tazimnira gweka, desa man etan dwam gweblaka. Ki zep gubiridaka, ‘Ap etan kap lablak.’
²⁴ Dekam zep jana zi zem ahanaka ner halzak– men zeno bonna miliar-miliarkam lwablakake.
²⁵ Hwena zen man teipsin zini insa gubluka, ‘Ano te-alana hom sowe heꞌara– desa de etan sowe henkam ebe hap zerblan hapye.’ Dekam zep hwena teipsin zini in jana zi zemka gubiridaka, ‘Dekam balk lak. We wal walas zemka hen lahyok. Te-ala hap zeno mae mo timsi lirak labik. Zen dikire aha zi mo tana iltikinnik ebabu gwe-gwek. Hen zeno gola hen zewe de kire-kirena kitak te-ala hap lirak labik. Te-alana desa abe hap kap lablak– zeno bon yala insa dikim ber-ber gun hupye.’
²⁶ “Zini in kim kirekam salblaka, dekam zep teipsin zini in mo nwenak ik gwehe zaka, dekon zep anakan abe ta seka, ‘Bian, sap ki asa eissibli. Ëe asa kitak hendep ep golblal.’
²⁷ Teipsin zini in dekam zep dawemkam kwasang gweblaka. Dekam zep jana zi zemka gubiridaka, ‘Bahem banakan mae gweblan.’ Hen anakan gubluka, ‘Ëe mese kitak eno bon yala insa ep eititi gwibir-blinan.’
²⁸ “Hwena teipsin zini in mo gola kon kim te soka, zen hwena dekam zep wal bose zemka zertoweꞌanka. Zini in hen teipsin zini in hon de syal gwe-gwenna. Zen hwena mes zebon 900 ribu enkam bohe taka. Zen hwena man tol wal bose zem insa balk taka, hen holenak jak tasiki, deban zep gubluka, ‘Mensa abon te-alana bohe taka, angkam em hendep ap zerblan.’
²⁹ Wal bose zem in sap ki zeno nwenak anakare ola ban ik gwe heka, ‘Sap ki asa eissibli. Ëe asa kitak hendep ep golblal.’
³⁰ Hwena wal bose zem in man eissinkim dep baes gweka. Zen zep hwena jana zinik klak taka. Zen zep bwinak tak daink, hen anakan zeno ola ayang nulblik, ‘Kim de te-alana etan zebe hap golblaꞌanka, yaklana dekam esa wet sola.’
³¹ “Teipsin tangan zini in hon de syal ta gwen bose wal zem kim kirekam esak, zen man tangan enlalana edowe hanak. Dekam zep zen teipsin tangan zini insa anakan nenblak, ‘Wal bose zik desa kirekam karek taꞌara.’
³² Teipsin zini in dekam zep gubiridaka– zere mo taha tri son zi jal-jala insa de etan kwang ta halzan hap, wal bose zem insa klak takake. Kim ner halzak, zao zep gubluka, ‘Em an jal-jal tanganna! Em kime eissin hip asa abe taka, ee ama hwena eno bon yawal tanganna insa kitak ep ngan gulsubluk.
³³ Ki em san ha bejen em wal bose omka kirekam kwasang gweblan? – men kirekame ee emsa kwasang gweblakye.’
³⁴ Teipsin zini in man tangan jal gweblaka, zep jana zi zemka bwinak de tak ta irin hip anakare ola ban gubiridaka, ‘Emki mwin-mwankam lek-lek ta gwen– hendep de ano te-alana mensa bohe taka ap kitak zerblak.’”
³⁵ Yesus dekam zep aisili insa anakan ap waulsuzimki: “Ngatan zi mo langnak de ano Bianna hen kirekam sa emsa karek tabiri– em de wal bose wal uk mo kareksa enho nakon eititi gwe-gwibir-zimdin sremkamye.”