¹ Yaklana inkam Yesus ki zep gola kon asa golewet so gweka, ho gutu alpnak zep nikin aneka.
² Zao zep hwena zi beyam-byana tagal neblazak, hendep man ze dot dasizik. Dekam zep buluk sewe seka– dekon de nikirinkim tawa tabin hip. Zi trana in hwena ho alp san ki ezaundak.
³ Zao zep Yesus gulk sun de ol blaon gwizimdinkim tawa ta gwibiꞌinka. Nonol man ze gubiridaka, “Zini man orep gandum dansa de hling gilsin hip song gweka.
⁴ Kim hling gilsiki, hwena ahakon oranak altink. Mawana ki zep ze yaing gwezak, zen zep hwena gandum danna insa dwensiblindak.
⁵ Ahakon kaso-kasonak altink– kama bebeknak. Gandum danna in nabakam zep sap esip gwek, sap kamana in bebek tanganna.
⁶ Hwena yaklana kim sal-sal gweka, sipni in dekam zep eboneng gwek, hendep esasan gwek, ki zep tol hendep juwek. Sap sana ba san dep? – olk san de ehas gwesin niye.
⁷ Hen ahakon dokot te ngi-ngi ausunak altink. Kim sap tol esaltik, hwena dokot te ngi-ngina in zep nabakam eblal-blal gwek. Zen zep dahalebik, hendep eini hom teka.
⁸ Hwena ahakon kama dawemnak altink. Zen en dawemkam zep esip gwek, hendep dawemkam zep hataka, hendep dawemkam teka. Aha-ere timni zeno dan beyana ahakon 30 enkam, 60 enkam, hen ahakon 100 enkam.”
⁹ Ola insa kim tonsuku, ki zep gubiridaka, “Em dwan i nibanke. Em esal gwen!”
¹⁰ Ëe zere hon de ang ta gwen wenya ki zebe e-erenak lakensiblik, “Bian, em ba habe kirekam zi beya hap gulk sun ola blaon gwizimnira?”
¹¹ Ki zep ap ding gulzimki, “Abon de ang ta gwen wenya ebe mae hap Alap mes golzimki– em dikim zere mo irik gin hip denaka tame gul gwen hap denaye. Hwena aha zi hip hom kirekam golzimꞌira.
¹² Sap men zen Alap mo irik gin nika de tame gun hup ehohle gweꞌan, zebe mae en hap sa etan Alap dekam de tame gun hup de enlala blala sowe henkam ing ta sone gwizimdi. Hwena men zen ehohle gwe srem gweꞌan, zebon mae men zen sap tame gun hup de enlalana betek enkam lwazimꞌira, desa sa hwena Alap al tazimdi.
¹³ Zen in zebe zi beyam-bya naban de goletorankam ola gulk sun blaon gwizimnin, sap ‘zen nwekam ki sap hla nul gwenan, hwena man egwe gwenan– san de hlaun sremna. Hen zen sap man esane gwe-gwenan, hwena san de esane gwen sremna hen tame gun sremna.’
¹⁴ Zen in zep Alap mo olsa de ayang gul gwen zini Yesaya Bak orep ola anakan ayang gulzimki, ‘Alap man guku, “Zen sap sa esane gwe tine gwer, hwena molya tame nul gwek. Hen sap sa karatda nul tine gwer, hwena anakan molya dam nulsuk gwek, ‘Kirekam sa lwal.’
¹⁵ Sap zeno mae mo enlalana mes tangan joblo-top gweka. Zere mae mo ini mes tangan mat dasibik. Nwena hen mes dimin dabik. Zen mae hap ki egwek: Dekam de nwekam hlaul gwen srem hap, ikim de esal gwen srem hap, hen enlalakam de tame gul gwen srem hap, Abon osan dikim etan lwanda halzan srem hap. Diki zen de etan Abon osan dep lwanda haꞌan zanam, ki Ëe amaka ngaya tabiꞌin.”’”
¹⁶ Yesus ki zep etan abe mae en hap ayang gulzimki, “Em an isrip-sri gwibinnike lowe heꞌan. Sap emsa ama golete gwenan, zebe nwekam dawemkam hla kul gwenan hen ikim esane gwe-gwenan.
¹⁷ Emki sap eenlala gwen: Abare sremnak Alap mo olsa de ayang gul gwizimdin hip de zini hen Alapsa de betek gwe-gweblan zini beya nik sap hlaun hup serkam edwam gwe-gwek– ano owas syal gwe-gwibinni ansa em angkam hlakul gweꞌanye. Hwena orep de zi dawem-dawemna in zen hom tangan hla nuk. Ësane gwen hap hen serkam sap edwam gwe-gwek– em ansa angkam esane gwe-gweꞌanye. Hwena zen hom mae esane gwek.”
¹⁸ Yesus ki zep etan asa gubiridaka, “Emki esane gwen: Angkam ama ebe mae hap gandum dan hling gilsinkim de ol blaonzimdinni insa srip gulsuzimꞌin.
¹⁹ Oranak de gandum dan altirinni, zen zini men zen sap Alap Zen de irik gin hip de ola esane gwe-gwenan, hwena ola in mo eini hom tame nul gwenan. Dowal mo kigina dekam zep hata gwenan zala, insa esane gwenna, desa de zeno mae mo enhonak al gul gwizimdin hip.
²⁰ Men zen kaso-kasonak altirinni, zen ahakon men zen Alap mo ola insa esane gwe-gwenan. Zen nabakam zep sap enlala isrip-sri naban nulin gwenan.
²¹ Hwena ola in bejen zeno mae mo enhonak sa gwen, zep bejen ze holokam lwan. Zen kim de karek maena hla nuꞌik, ahaksa ol dawemna in hap de jal hap karek dabiꞌik, zen hendep dekam sa Alapsa hli dal.
²² Men zen dokot te ngi-ngi ausunak altirinni, zen zini men zen sap Alap mo ola insa esane gwe-gwenan, hwena angkam de okamanak awe de anakare enlala naban siri nul gwenan, ‘Ëe babe tahalhakam gwe gwen,’ hen anakan de hole-hle gwe-gwen naban, ‘Diki te-ala beya naban amaka gwe gweꞌan.’ Kirekam de enlalana in zep Alap onakare ol dawemna insa zeno mae mo enhonak hule gwenan. Zep hendep dawemkam eini ete srem gwe-gwenan.
²³ Hen men zen kama dawemnak altirinni, zen zini men zen Alap mo ola insa esane gwe-gwenkam dawemkam lik nei gwibirin. Zen zen zep eini dawemkam ete gwenan. Zeno ei beyana, ahakon 30 enkam, 60 enkam, hen ahakon 100 enkam.”
²⁴ Yesus in kim nama bulu kon tawa tabiꞌinka, zao zep etan zi beyam-byana in hap ola gulk sun blaonzimki, “Alap mo irik gin hip dena, zen san de zi de nganak gandum dan dawem-dawemsa hling gilsinni kiye.
²⁵ Hwena zeno kam, tingare zi mo truwe guk hannak, dekam zep hwena nganak iwe jal zi sowekam endang dansa etan hling nilsik.
²⁶ Gandum danna in kim esip gweꞌak, hendep eeis gweꞌak, endang sipni in dekam zep hen eblal-blal gweka.
²⁷ Zao zep hwena nga bina in hon de syal ta gwen zini dakensiblizak, ‘Bian, em dwan gandum dan dawem-dawem ensa em-am ap kap tazimki– nganak iwe de hling gilsin hipye. An hwena ba hap ze endangna hataka?’
²⁸ “Nga bina in ki zep ding gulzimki, ‘In jal zi ze sowekam hling gilsik gik halka.’ “Hwena ki zep etan dakensiblik, ‘Bian, ee wehe endangna insa lamalsiꞌik?’
²⁹ “Hwena man ding gulzimki, ‘Bejen em tamalsin, ki hwena gandumnu in han esa apdenak lamalsil.
³⁰ Sap sa endangna in han apdenak esaltil– hendep gamdumnu insa de taran hap denak de zauꞌuk. Ëe asa taran hap de zini insa gubiridal, “Nonol endangna insa blom lasik, desa tagal tan naka tatak-tatak labik, desa de syauknuk tru tasin hip. Ki hwena gandum danna insa gamdum dan kang ta gwen golak tagal lasibik.”’”
³¹ Yesus ki zep etan zi beyam-byana in hap ola gulk sun blaonzimki, “Alap mo irik ginni an kirekame ola ebe mae hap blaonzimꞌin: Zini man rica dansa nganak eiyas taka.
³² Rica danna in tingare tetan dan nakon, zen zen– betek tangan wenyaye. Hwena kim esaltil gwenan, dekam zep tingare obwaga nakon eblal-blal gwe-gwenan, hendep te makan emam-mam gwe-gwenan. Mawana zao zep yaing gwe-gwenanzal– zeno hli-hlinak de golsa tauk gweblan hapye.”
³³ Ki zep hen etan ahana mas gulzimki, “Alap mo irik ginni, zen a kirekam moye: Zen ragi makan. Wenya man tepungna aha-ere sak naka mang-mang guk. Zao zep ragisa betekkam mas guk. Ragina in sap betek tanganna, hwena dekam zep rotina in dawemkam hop gwek.”
³⁴ Yesus kirekam-kirekam gulk sun de ol blaonzimdinkim tawa tabirida gweka. Zeno tawa tabinni hom– gulk sun de blaon gwizimdin sremkamye.
³⁵ Kirekam kim tawa ta gwibirki, zen dekam zep zauk– men kirekam Alap mo ol ayang gul gwen zini Yesus hup de ola hamal hap anakan ale gulkuye, “Ëe gulk sun de ol blaon gwizimdinkim asa aisil gwibirida gwer. Hen mensa auhu-kamana ansa de yang gulsun nukon tawa neibir srem gwek, zen dekam asa tawa ta gwibir.”
³⁶ Yesus kim zi beyam-byana insa hli yuludaka, ki zep gol san song gweka. Hwena ee zere hon de ang ta gwen wenya ki zebe ze du keblazak, zao zebe lakensiblizak, “Bian, abe mae hap emki srip gulsuzimdin– insa gandum nuban de endang naban aha-erenak nasaltin hip dena ap gulk sun blaonzimdike.”
³⁷ Yesus ki zep ding gulzimki, “Gandum dan dawemna men Zen hling gilsiki, Zen Ëe an Zen– ngatan zi mo lang nakore Zi Tangan naye.
³⁸ Hwena ngana, zen auhu-kama yawala an zenke. Gandum dan dawem-dawemna, zen zini men zen Alap mo irik ginnik biti gweꞌanke. Hwena endangna, zen zini men zen dowal mo kigi hon biti gweꞌanke.
³⁹ Jal zini men zen endangna insa sowekam eiyas ta gwenda, zen dowal mo kigi. Taran hap de zaunnu, zen Bian mo klis gun hup de yaklanak de zaun hup dena. Taran hap de zini, zen Alap mo dam taha nakore zi.
⁴⁰ “Zep in kirekam endangsa de tagal tan naka syauknuk tru ta senkam lwak, zen kirekam sa hen lwal– Bian mo klis gun hup de yaklanak de zaunkumye.
⁴¹ Dekam ngatan zi mo lang nakore Zi Tanganna Ëe asa ere mo dam taha nakore zisi desa de tingan tagal gulsun hup gubiridal– men zen aha zisi karek san dep titi da gwibirin, hen men zen karekna syal nei gwibirinke.
⁴² Desa sa syauk bla hi-hitinnik yal nulser– men dekon zi mo angna yusyustin niban gona ta gwenanke, hen sang-sang hap ekna ngalk-ngalk da gwibirinke.
⁴³ Hwena zini men zen enlala dam-dam enkam lowehe gwenan, zen Alap mo irik gin kama esenak sa zere mae mo Bian hon lowehe gwer, hen zen zao sa yakla mo kim ezil ane gwer. Em dwan i nibanke. Em esal gwen!”
⁴⁴ “Alap mo irik ginnik de tin hip dena, zen a kirekam moye: Zini man song gweka, zao zep aha zi mo kamanak emas yawalsa hlaulku. Kama hulak lwaꞌak, hen yawal tanganna. Zen zep hwena kama hula insa ber-ber gulku. Zena dekam zep isrip-sri naban zere mo golak de kire-kirena kitak tangan te-ala hap lirak tabirki. Te-alana dekam zep kamana insa golka– hendep emas aning gunnu in han.
⁴⁵ “Alap mo irik ginnik de tin hip dena, zen hen a kirekam moye: Kire-kire beya zini man gwe gweka. Zen te-alakam kire-kirena lirak ta gwibirki. Hwena mensa tangan dwam-dwam gwe-gwibirki, zen kaso lilingtin yawalsa.
⁴⁶ Zen kim serkam de dawem tangan wenyaka hlaulku, zen dekam zep zere mo golak de bi gwibin kire-kirena kitak te-ala hap lirak tabirki, dekam zep hwena kaso lilingtin yala insa golka.”
⁴⁷ “Alap Zen de irik gin hip dena, zen hen a kirekam moye: Zini man hinak jaringkim kirekam-kirekam nwe-mase hogwesa dahyok.
⁴⁸ Hendep kim jaringni in suwek, dekam zep zini in ho alp san dep il nilhak. Zao zep hwena teinikirinkim hogwena insa hli nik– dan nabare hogwena sren, ei hogwena sren. Dawem-dawemna, zen honnak biti dak. Karek-karekna, desa man yal dak.
⁴⁹ Zen kirekam sa hen lwal– Alap mo yakla yawalak de zaunkumye. Zere mo dam taha nakore zini dekam sa hen yaing gwezal– dekam de dawem gol gwen zi nikon karek-karek gol gwen zisi hlil irin hipye.
⁵⁰ Zen dekam sa karek-karek gol gwen wenya insa kals yalak de syauk blanak yal nulser– men dekon zi mo angna yusyustin niban gona ta gwenanke, hen sang-sang hap ekna ngalk-ngalk da gwibirinke.”
⁵¹ Ki zep hwena asa takensibiridaka, “Em san mese kitak dam ulsul? – ola insa gulk sun blaon gwizim sinye.” Ëe dekam zebe ding ulblik, “Ëe mese, Bian.”
⁵² Ki zep hwena etan asa gubiridaka, “Zep Alap mo olsa de tawa tabin hip de zi dawemna, zen diki zen Alap mo irik gin hip de epba ola ban hen ano ol esena an han tame son. Zeno tawa tabinni dekam sa lwa gwer– san de gol bi nik de gola kon zere mo kire-kiresa aha zi hip goletrei gwizimdinni kiye, epba erlwa gwen wenya ban, ese kap tan wenya ban.”
⁵³ Yesus kim kirekam de gulk sun ol blaon gwizimdinkim hya gwesibiridaka, dekam zep kon dua-blaskam de zini asa en golelwanda halka–
⁵⁴ zere mo ena Nazaret san dep. Zewe but srem golak zep tawa tabiꞌinka. Zini men zen ze sane daꞌak, man tangan denggwanblaꞌak. Zep ze hwena donsubluꞌak, “Zini an endawe sekola gweka? – zep kil giꞌira, ‘Ëe asa tawa tabir.’ Hen owas-owassa de syal gwe-gwibin hip de sosonna endawe sa gul iri?
⁵⁵ Zen dwan gol syal gwe-gweblan zini Yusup Swe mo tane sake! An zem Maria. Oso wal zem, zen Yakobus, Yusup, Simon, hen Yudas. Zen kitak awe de zi sike!
⁵⁶ Somol wal zem awe am hen tingan lowehe gweꞌan. Zep zini an ba hap kil giꞌira? – ‘Ëe asa Nazaretsa tawa ta gwibir.’”
⁵⁷ Sap zen mes kirekam tame dak, zep baes neblak. Ki zep hwena gubiridaka, “Zini kirekam egwe gwenan: Men-kore men-kore e nakon, Alap mo ol ayang gul gwen hap de zini man blikip neisibirida gwenan. Hwena zere mo iye, ahaksa zere mo e nakore nik de kirekam ayang gul gwizimdinkim, desa hom tangan blikip neisibirida gwenan.”
⁵⁸ Zen in zep Yesus zewe owas-owasna beyakam syal gwibir-zim srem gweka, sap zen hom daibliblak.