Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia to nunnungan nene-Na Puang Isa Almaseh, bati'nai Raja Daud jio mai bati'na Nabi Ibrahim susi tee:

² Nabi Ibrahim njajian Ishak, Ishak njajian Yakub, Yakub njajian Yehuda sola ba'tu pira-pira sile'tona muane,

³ Yehuda njajian Peres sola Zerah (nadisanga Tamar to indona), Peres njajian Hezron, Hezron njajian Ram,

⁴ Ram njajian Aminadab, Aminadab njajian Nahason. Nahason njajian Salmon,

⁵ Salmon njajian Boas (disanga Rahab to indona), Boas njajian Obed (disanga Rut to indona), Obed njajian Isai,

⁶ Isai njajian Raja Daud. Raja Daud njajian Raja Sulaiman (indona pura bainena tomate Uria),

⁷ Raja Sulaiman njajian Rehabeam, Rehabeam njajian Abia, Abia njajian Asa,

⁸ Asa njajian Yosafat, Yosafat njajian Yoram, Yoram njajian Uzia,

⁹ Uzia njajian Yotam, Yotam njajian Ahas, Ahas njajian Hizkia,

¹⁰ Hizkia njajian Manasye. Manasye njajian Amon, Amon njajian Yosia,

¹¹ Yosia njajian Yekhonya sola ba'tu pira-pira sile'tona muane tonna dibawa to to-Yahudi lako tana Babel.

¹² Ia tonna jiomo tana Babel to to-Yahudi, ia to Yekhonya njajian Sealtiel, Sealtiel njajian Zerubabel,

¹³ Zerubabel njajian Abihud, Abihud njajian Elyakim, Elyakim njajian Azur,

¹⁴ Azur njajian Zadok, Zadok njajian Akhim, Akhim njajian Eliud,

¹⁵ Eliud njajian Eleazer, Eleazer njajian Matan, Matan njajian Yakub,

¹⁶ Yakub njajian Yusuf, iamo muanena Maryam, na Maryam njajian Puang Isa to disanga Almaseh.

¹⁷ Sangpulo a'pa' papa'na jio mai kajajianna Nabi Ibrahim ratu lako jajinna Raja Daud. Sangpulo a'pa' papa'na sipammula jio mai Raja Daud ratu lako kamaleanna dipali' to to-Yahudi lako tana Babel. Sangpulo a'pa' papa'na jio mai kamaleanna dipali' ratu lako kajajian-Na Puang Isa Almaseh.

¹⁸ Susi tee to kajajian-Na Puang Isa Almaseh. Maryam, to tangka'na Yusuf, iamo la njajian Puang Isa. Ia tonna te'dapa namamma' sola Yusuf, keba'tangmi. Te'da naissenni Yusuf kumua ia to kakeba'tanganna jajii nasaba' kuasan-Na Roh Allataala.

¹⁹ Ia tee Yusuf madoangngi kamma'-kamma' bang la mpatorroi to kasitangkasanna sola Maryam, nasaba' mesa'i tomelo penawanna na te'da namadoang mpakasiri'i to Maryam jio olona tobuda.

²⁰ Apa ia tonna mangpikkiri' susi joo, mamma'mi namangtindo. Nakitai lan tindona to malaeka'-Na Puang Allataala mpangkadaii nakua, "Ee, Yusuf, bati'na Raja Daud, danggi' mubata sibali to Maryam, nasaba' ia to kakeba'tanganna jajii sanga kuasan-Na Roh Allataala.

²¹ La njajianni mesa' pea muane na la musangai Isa (battuananna "Tomangpasalama'"), nasaba' iamo la mpasalama' umma'-Na jio mai pangpatumangna dosana."

²² Susimi joo najaji to kadan-Na Puang Allataala mangka napau nabi tonna anu' kumua,

²³ "La den mesa' anakdara, to te'dapa nalambanni muane, nakeba'tang, na njajian mesa' pea muane. Nadisanga Imanuel", battuananna "Torroi Puang Allataala ssolanki'."

²⁴ Ia tonna mi'cikmo to Yusuf, napugaukmi to napauanni malaeka', nasibali Maryam.

²⁵ Apa te'dapa namamma' sola ratu lako kakeanakanna. Na ia tonna jajimo joo pea, nasangaimi Yusuf, Isa.

Matius

Video Matius 1

Ikuti Kami:

KONTAK | PARTISIPASI | DONASI