Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasano koito'ingowa de 'o Yesus wotagi 'o kota-kotaka de 'o soa-soanika ma ngale wosihabari 'o Habari ma Owa 'ato ma Jo'oungu ma Dutu wacobou wopareta ma ngale wokoana. 'Awi do-domoteke yamogiooko de modidi wimoteke.

² Koge'enali mita 'o nge-ngeweka yamuruo naga gee woginiikokau 'o tokata yakido-dongosamuku, de wosi'aikokau manga panyake. 'Ona ge'ena 'o ngo Maria gee misironga ngo Magdalena 'o tokata 'o ngai tumudiingi wosisupuokau munaka;

³ de ngo Yohana 'o Khuza ma wekata. 'O Khuza 'una 'o Herodes wi kadatoka yoma-manarama manga balusu; 'o ngo Susana de manga gudaiosi 'o nge-ngeweka 'iregu. Ka to 'ona ma sirete manga kia sonaa yakisiriwo 'o Yesus de wi do-domoteke.

⁴ 'O nyawa manga gudai naga 'o kota-kotano koitoa-toakuwa kayotuonou yoboa 'o Yesusino. Gee manga gudaiokau yomatoomuno, de 'o Yesus wakidajarita 'o 'ade-'ade koneda:

⁵ "Wopai-pairi wimoi wotagi 'o fini wopiakoro. Gee wopiakoro, de munuka 'itotaka 'o ngekomuku so 'o nyawa yadoko-doko de 'o namoro ya'odomo yabootoka.

⁶ Munuka 'itotaka 'o ngii 'iteto-tetoku gee ma tonaka ka ma etaka. Gedagee ma go'oo 'isupu de kaimaaioka sababu ma tonaka 'iroto.

⁷ Naga munuka 'itotaka 'o sisika ma sigoronaku. Ma sisika ge'ena 'imasidefero de ma joro, de yapilatu so ma joro ge'ena 'isongenoka.

⁸ Ma de ma 'ena mita 'itotaka 'o tonaka 'irewo-rewoku, so 'igo'oo de 'isowoko 'iliono 'o ratusu moioka." 'O Yesus wosijaritaka 'o 'ade-'ade ge'ena, de kawongosekau, "Nako de nia ngaukoka de nio'isenika!"

⁹ 'O Yesus wi do-domoteke yosano 'unaka 'o 'ade-'ade ge'ena ma ngale 'okia.

¹⁰ 'O Yesus wosango, "Ngini tinikulakau 'o co-catu ma ngale niasahe gedagee 'o nyawa koyanako-nakowasi ge'ena la kokia ma Jo'oungu ma Dutu wopareta. Ma 'o nyawa 'iregu takisidotoko de 'o 'ade-'ade. La 'ona yodi-diriidi ma koyanakowa ma ngale; de yo'isene ma koyasahewa."

¹¹ "Koneda 'o 'ade-'ade ge'ena ma ngale: 'O fini ge'ena 'isoka ma Jo'oungu ma Dutu 'awi demo.

¹² 'O fini gee 'itotaka 'o ngekomuku ge'ena 'isoka 'o nyawa gee yo'isenokau ma Jo'oungu ma Dutu 'awi demo ma 'o Tokata ma Koana 'iboa de ya'oraka ge'ena to 'ona manga singinaka, la 'uwa yongaku de 'uwa yakisilaha.

¹³ 'O fini gee 'itotaka 'o tonaka 'iteto-tetoku, ge'ena 'isoka 'o nyawa gee yo'isenoka 'o demo ge'ena, de yadawongo de manga singina 'isa-sanangi. Ma 'o demo ge'ena koimasingutukuwa manga singinaka. 'Ona yongaku ka 'o 'orasi moi, ka gee yakitaili de koyongakuwau.

¹⁴ 'O fini gee 'itotaka 'o sisika ma dodaku, ge'ena 'isoka 'o nyawa gee yo'isenoka ma Jo'oungu ma Dutu 'awi demo ge'ena, ma yododato ma ngale manga 'ahu, yomau yokaya de kayosanangi 'o duniaka ne'ena. Ge'ena 'iodumu yakipilatu sigado koyosisupuwa ma sowoko 'isure-sure.

¹⁵ 'O fini gee 'itotaka 'o tonaka 'irewo-rewoku, ge'ena 'isoka 'o nyawa gee yo'isenoka 'o demo ge'ena de yaga-gaonou manga singina 'iti-tiaioka, de yotongosono sigado ma sowoko 'isupu."

¹⁶ "Komoiwa 'o silo yatuuika de 'o pa'udi yositamunuku, bolo yanoaku dau 'o dangiri ma timioka. Ma 'ena ma raiokau dua yatamide ma ngiioka la 'o nyawa gee yowosama 'o woaka 'idadi yamake ma siwara.

¹⁷ Koi'iwa gee 'isigi-gi'iunika 'asa koisupuwa, de koi'iwa gee 'isipongo-pongonino 'asa 'o nyawa koyanakowa.

¹⁸ Ge'enau so niosi-singina 'okia naga gee nio'isenokau. Sababu to nago'ona de ma 'enau, 'ona 'asa yakikula 'ifoloisi 'ikudai. Ma to nago'ona koi'iwa, 'asa ya'eseka mita 'onaka 'okia naga gee 'ona yamaoku de ma 'ena."

¹⁹ 'O Yesus 'awi 'esa de 'awi riaka dodoto yaika 'o Yesusika, ma 'o nyawa kaifoloi yokudai so koyototaruwa 'unaka.

²⁰ So wimoi wongose 'o Yesusika, "'Aba, 'ani 'esa de ni riaka dodoto doka ma dudunoka. 'Ona yomau nimakamake de de ngona 'Aba."

²¹ Ma 'o Yesus wongose 'onaka, "'O nyawa gee ma Jo'oungu ma Dutu wi demo yo'isene de yodomoteke, 'ona ge'ena to ngoi 'ai 'esa de 'ai riaka dodoto."

²² Ma moi ge'ena 'o Yesus de 'awi do-domoteke 'o ngo'otiruku yoparene de kawongosekau 'awi do-domoteika, "Nou, ngone posikaisa 'o talaga ma songonasa!" So 'ona mita yotagi.

²³ Gee yosidetika de 'o Yesus wonisuku so woma'iduokau. De ino ma rato ma talagano ge'ena sigado 'o 'akere 'iwosama manga ngo'otiri ma dodaku so yokokiboditou tanu.

²⁴ Ge'enaka de 'o Yesus wi do-domoteke 'o Yesus witomanga kayongosekau, "'Aba Guru, potorouoka ngone!" 'O Yesus womomiki de wodorofu 'o rato de 'o moku-moku 'ila-laagomo ge'ena, so 'o rato de 'o moku-moku ge'ena 'imaogoroka. De ma talaga ge'ena 'isoka 'o gooorou 'ipoade.

²⁵ Ge'enaka de 'o Yesus kawongosekau 'awi do-domoteika, "'Ido'oa so koningakuwa ngoino?" 'Ona yoherangi ma de yakimodongo. De yomakadongose moi de moi, "Tei 'o nyawa nu'una posironga de wi kuasaka. 'O rato de 'o moku-moku wasuloko 'imaogoro de 'ena mita wisingounu!"

²⁶ 'O Yesus de 'awi do-domoteke yongo'otiri sigado 'o Gerasa ma nyawa manga daeraaka 'o Galilea ma talaga ma songonasa.

²⁷ Gee yototarisau 'o Gerasa ma daeraaka so 'o Yesus wo'uti 'o dudungisa de wimoi 'o tokata widongosamuku waino 'o Yesusino. 'Una ge'ena 'o kota ma nyawa. 'Una kowomabajukuwa de wooluku womanoa 'o woaka so womau ka 'o bo'osuku ma 'aru-'arukoka.

²⁸ Gee wimake 'o Yesus de woma'orese deika wosuba 'o Yesus wi bionoka de kawongosekau waamo-amokie, "Ee Yesus ma Jo'oungu ma Dutu wokuru-kurutie 'awi Ngowaka! Nodo'oau ngoino? Tanu 'uwa noisikisaa!"

²⁹ 'O nyawa gu'una koge'ena wongose sababu 'o Yesus wosuloko 'o tokata ge'ena 'isupu 'unaka. 'Una kaijaga widongosama 'o tokata ge'ena, sigado ngaro wi giama de wi dou yapusuoka de 'o rate de wijaga kowipidilikawa, duga ma rate ge'ena kawatoaoka de ma tokata wi'asakau 'o daeraa 'irii-riidika.

³⁰ 'O Yesus wosano 'o nyawaka gu'una, "Ngona 'ani ronga 'okia?" 'Una wosango, "To ngoi 'ai ronga, 'o Kudai." Sababu 'o gudaiokau 'o tokata widongosamuku.

³¹ 'O tokata ge'ena 'imadabaja 'o Yesusika, la 'uwa woginiiki 'o sangisara ma ngiiku.

³² Ge'ena ma dateoka 'o juku 'o gudaioka 'iti-timiono ma 'inomo 'imadononu 'o gigie ma agaroka. 'O tokata ge'ena 'imadabaja 'o Yesusika la wosidabi 'ikokiwosama 'o juku 'iku-kudaika ge'ena. De 'o Yesus womodeke.

³³ So 'o tokata ge'ena 'ikokisupu 'o nyawaka gu'una de 'iwosanga 'o jukuka ge'ena, ge'enaka de ma juku ge'ena 'ikokiowara de 'imatebulu ge'ena ma babawata ma 'uruoka de daukuku 'o talagaku, so 'ikokilutuoka.

³⁴ Ma juku yopi-piara go'ona yamake 'okia naga 'idadiokau, de kayoowa-owara yosikademo 'o kotaka de 'o soa-soanika gee ge'ena ma date-dateoka.

³⁵ Ge'enaka de 'o nyawa-nyawa yokokisupu ma ngale yalega 'okia naga 'idadiokau gee. 'Ona yaika 'o Yesusika de wimake 'o nyawa gee 'o tokata wikokipidilokau wogogerie 'o Yesus 'awi dou ma dateoka. 'Una womabajukou, womanakonou de 'awi di-dibangi 'itiainokau. So 'ona yakimodongo.

³⁶ 'O juku yopi-piara gee 'onau ma sirete yamake-make 'okia naga 'idadiokau ge'ena, yosijarita 'o nyawa-nyawaka kokia witoka-tokata gu'una 'o Yesus wisilaha.

³⁷ Ge'enaka de 'o Gerasa ma nyawa yoodumu yoga'asoko la 'o Yesus wamadakau manga daeraaka ge'ena, sababu 'ona yakimodongo ma sala. So 'o Yesus 'o ngo'otiruku woparene ma ngale wolio 'o Galileako.

³⁸ 'O nyawa gee 'o tokata wimada-madakau womadabaja 'o Yesusika la 'una 'idadi womoteke, ma 'o Yesus kowisidabiwa. So kawisuloko wongose 'ato,

³⁹ "Noliou ni woaka de nosikokijarita 'okia naga ma Jo'oungu ma Dutu wodiaiokau ngonaka." So 'o nyawa gu'una wotagi wosikademo 'o kota wakilolituku 'okia naga 'o Yesus wodiaiokau 'unaka.

⁴⁰ Gee 'o Yesus wolio 'o talaga ma songonako, de 'o nyawa manga gudai wisibusuku sababu 'ona wida-damaau.

⁴¹ De wimoi woboa 'awi ronga 'o Yairus, 'una ge'ena ge'enaka dau manga lo-lomu ma woa ma balusu. 'Una wotalibukuku wosuba 'o Yesus 'awi bionoka, womadabaja la 'o Yesus waika 'awi woaka;

⁴² ngano 'awi ngowaka kamomatengoka mi 'umuru 'o taunu mogiooko de modidiou rekeni mosongenoka. 'O Yesus 'awi do-dagioka wosikaika 'o Yairus 'awi woaka, 'ena 'o nyawa manga gudai wisikabe'eto.

⁴³ Ge'enaka dau mimoi mita 'o taunu mogiooko de modidiou mopanyake mokokopoa. Muna 'ami harataa matagi mabootokau sababu momasouru 'o doterika, ma komoiwa ya'aiki.

⁴⁴ 'O ngeweka gumuna momasisori 'o Yesus 'awi dudunino, de matigi 'awi juba ma barenika. Kage'ena de 'ami 'aunu 'itagi 'itogumokau.

⁴⁵ 'O Yesus wosano, "Nago'ona 'ai jubaka yatigi?" Ma komoiwa yomadongose. Ge'enaka de 'o Petrus kawongosekau, "'Aba, 'o nyawa manga gudaioka nisigilolitino; 'ona nisibe-be'etoro monga 'Aba!"

⁴⁶ 'O Yesus wongose, "Ma naga 'o nyawa 'itigi. Ngoi tanako, sababu naga 'o guata 'isupu ngoioka."

⁴⁷ 'O ngeweka gumuna manako 'ato 'okia naga modiai ge'ena yanakokau, so muna motirineka maika mobukuku mosuba 'o Yesusika. De muna mosijarita 'o nyawa yoku-kudai manga bionoka, 'ido'oa so matigi 'o Yesus 'awi juba, de kage'ena matigioka de 'ami panyake ge'ena 'i'aikokau.

⁴⁸ 'O Yesus kawongosekau munaka," 'Ai ngowaka, noingaku so nolahakau. 'Uwau ni singina 'itubuso!"

⁴⁹ 'O Yesus kawobicarasi, de 'o Yairus 'awi su-suloko 'awi woa ma dodaku wimoi woboa. 'Una wosidemo 'o Yairusika wongose 'ato, "Bereki, 'ani mosolese mosongenokau. So 'uwau woni'asoko ma Guru gu'una."

⁵⁰ 'O Yesus wo'isenoka ge'ena de kawongosekau 'o Yairusika, "'Uwa nimodongo. Kanongaku bato, de dua 'ani ngowaka molahali!"

⁵¹ 'O Yairus 'awi woaka ya'adonika, de 'o Yesus ka moi ma kowakisidabiwa yowosama de de 'una mosonge-songene mi ngiika, duga ka 'o Petrus, 'o Yohanes, 'o Yakobus, de 'o ngowaka ge'ena ma 'esa de ma dea.

⁵² 'O nyawa yoodumu yo'ari ma de yoto-tora ma gu-gudaioka ngano 'o ngowaka gumuna mosongenukou. Ma 'o Yesus kawongosekau, "'Uwa nio'ari. 'O ngowaka numuna komosongenuwa kamoma'iduoka!"

⁵³ 'Ona wirisela 'o Yesus, sababu 'ona yanako 'o ngowaka gumuna mosongenukou.

⁵⁴ Ge'enaka de 'o Yesus wa'ao 'o ngowaka gumuna 'ami giamika de kawongosekau, "Ee ngowaka, nomomikie!"

⁵⁵ So 'o ngowaka gumuna mowango, de kamomomikokau. Ge'enaka de 'o Yesus wongose 'ato, "Tagi 'o 'inomo minikula."

⁵⁶ 'O ngowaka gumuna 'ami balusu yoherangi ma sala. Ma 'o Yesus kowosidabiwa yosikademo 'okia naga 'idadiokau ge'ena ka moika ma.

Lukas

Video Lukas 8

Ikuti Kami:

KONTAK | PARTISIPASI | DONASI