Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu yau mangalijak tana etu. Ia liu mandoo nja’u kota-kota pasi kampu-kampu to nja’u ria. Tempo Ia liu mandoo nja’u lipu-lipu etu Ia mampakarebaka resi tau kareba matao mangkonong ewa wimba i Pue Allah mawali Makole nto lino. Pasi anaguruNya to sampuyu pei dua yau seja mangalulu Ia ri raya mpalinjaNya etu.
2 Pasi re’e bara sawei mba’a tau we’a to mangalulu seja Ia. Tau we’a etu tempo ruyu re’e to masaki pasi re’e to naposuak measa, pei sira roomo napakatao muni i Yesu. Tau we’a etu samba’a i Maria to rato’oka Magdalena. I Maria etu seore naposuak measa pitu mba’a pei measa etu roomo mampiyaika ia.
3 Pasi samba’a wo’u tau we’a etu sanganya i Yohana, indo nu ana i ngKhusa. I Khusa etu ia tau to mampasilonga banua i Herodes. Wali re’e seja i Susana pasi boros wo’u tau we’a to mangansawang i Yesu pasi anaguruNya. Sira mangansawang i Yesu pasi anaguruNya mangampake kasugi to si sira.
4 Wali boros kojo tau to ma’i mangampago i Yesu yako nja’u kotakota. Tempo tau boros etu siromu, i Yesu mangansaritaka sira samba’a rapa.
5 Ia manganto’o, “Re’e samba’a to panawu, wali to panawu etu ia yau mangansawu liano nja’u nawunya. Tempo ia mangansawu liano etu, liano to sawunya etu, re’e to kono ri jaya. Wali to kono ri jaya etu nalombu ntau pasi natungku yau ntonsi.
6 Pasi re’e seja liano etu to kono ri tana to ri rapa mbatu. Wali liano etu tuwu pei taa masae mawali malau yau sampe mate yau apa taa gana ue ri tana etu.
7 Panewa re’e seja liano to nasawu to kono re’e tana to nja’u waka njunju ndui. Wali liano etu tuwu pei rui etu tuwu seja muni, panewa roo see nangi yau liano. Rui etu to langa-langan, see naka liano taa mawali kojo apa kaoung.
8 Panewa re’e seja liano etu to kono ri tana to maboko. Wali liano etu magaya kojo tuwunya panewa rata temponya mawua ia mampowuaka wuanya satu ngkani kaborosinya yako to rasawu.” Wali ojo karoonya i Yesu manganto’o rapa etu Ia maroso looNya manganto’o, “I sema to nadonge ntalinganya, padongeka kojo.”
9 Wali yako etu anaguru i Yesu mampotanaka resi Ia, sira manganto’o, “Kesaa batuanginya rapa to nuto’o ngKomi etu?”
10 Wali i Yesu manganto’oka sira, “Komi rawaika mangansani anu to tawa rapaponsanika resi sa’e mangkonong temponya i Pue Allah mawali Makole ri lino. Pei ane tau to yusa, ojo rapa to rapotundeka resi sira. Wali sira mangabanang gombo i mPue Allah to natulis yami nto pantuntu tuntuNya tempo owi. Tempo etu to pantuntu tuntu i mPue Allah etu mangantulisika yami sira, to’onya, ‘Komi damangalo’a-lo’aka pei komi taa damangansani batuanginya palaong to nukita ngkomi etu. ‘Komi mandudu ngkani damangandonge pei komi taa damangansani batuanginya gombo to nudonge ngkomi etu.’” Etu semo gombo to ratulisika yami tau to bo’onya mampodongeka etu.”
11 Wali yako etu i Yesu manganto’oka wo’u anaguruNya, to’oNya, “Si’i semo batuanginya rapa to Aku manganto’o etu. Wali liano etu batuanginya tuntu i mPue Allah.
12 Pasi ane liano to rasawu kono ri jaya, jaya etu batuanginya tau to mangandonge tuntu i mPue Allah. Pei roo see ma’i i Kepala nto pantipu pei mangoko yau kareba etu yako ri pampobuuka nsira naka ne’e sira mangaya pei rapalaes.
13 Wali ane liano to kono ri tana to ri rapa mbatu, tana etu batuanginya tau to mangandonge tuntu i mPue Allah etu pasi ndende raya nsira mangantima. Pei pangaya nsira ri tuntu i mPue Allah etu ewa liano to taa maroso kalenya apa sira taa maroso pangayanya. Wali tempo sira rasoba, taa masae sira mamposaka yau pangaya nsira etu.
14 Panewa re’e wo’u liano to kono re’e tana to nja’u junju ndui. Wali tana to nja’u junju ndui etu batuanginya tau to mangandonge tuntu i mPue pei sira taa mangaluluka kojo apa sira ojo moru-moru mampobuuka katuwunya ri lino si’i, pasi sira mampobuuka kojo kasugi pasi anu to yusa to mampakasanang raya nsira. Wali pangaya nsira ri tuntu i mPue ewa pinumuya to taa mawua.
15 Pei ane liano to rasawu kono ri tana to maboko, tana etu batuanginya tau to matao pasi manoto to mampodongeka kojo tuntu i mPue Allah pei mampalaika. Wali tau etu tare pandoonya mangalulu tuntu i mPue Allah etu see naka pangaya nsira raporapaka ewa pinumuya to mawali kojo wuanya.” Wali ewa wetu nato’o i Yesu mampakanasaka anaguruNya batuanginya rapa mangkonong liano etu.
16 Wali ojo karoonya i Yesu mampakanasaka sira mangkonong rapa etu, Ia rani sira mangansani matao ane tuntu i mPue Allah rapakarebaka resi sa’e. Wali Ia mangaligi sira, Ia manganto’o, “Tau ane mangantuni pansona, ia taa mangabombongika yau ember pasi taa seja mamposaka la’u ara ngkoi. Ia mamposaka ri tampa to masipato rapamposaka pansona etu see tau to masua ri raya banua etu maya mangkita remenya.
17 Wali ri katawanya pansona etu ratuni, anu to ri raya banua etu tawa maya rakita apa mawuri. Pei ojo pangantuni pansona etu panewa samparia maya rakita. Pasi ewa see seja tuntu i mPue Allah. Apa samparia to rawuni ri tempo si’i, to etu darapakarebaka. Pasi samparia to tawa ransani ri tempo si’i, samparia etu darapaponsanika pasi darapakanasaka.
18 “Wali padongeka kojo samparia tuntu i mPue Allah to rapotundeka resi komi, apa tau to mampodongeka kojo tuntu i mPue Allah, tau etu daradugangika kapandenya see ia damangansani wo’u. Pei tau to taa mampodongeka, tau etu nempo ia mampobuuka ia re’e sangkodi kapandenya, kapandenya etu daraoko yau see ia tamo damangansani.”
19 Wali yako etu indo pasi tua’i i Yesu ma’i mangampago Ia, pei sira taa nakurang mampomosuk Ia apa saba tau boros kojo.
20 Wali re’e tau to yau manganto’oka i Yesu, to’onya, “Re’e indoMu pasi a’iMu ri sambali banua. Sira rani magombo resi Komi.”
21 Pei i Yesu manganto’oka tau boros etu, to’oNya, “Tau to mampodongeka tuntu i mPue Allah pasi mampolengkoka, tau etu seja rato’oka indongKu pasi a’ingKu.”
22 Wali re’e seore i Yesu manganto’oka anaguruNya, “Yaumo kita njo’u sambote ndano.” Wali sira mapone ri bangka panewa sira malayag.
23 Tongonya sira malayag etu, i Yesu yore yau. Wali tempo Ia yore, kodi majoli rata ngoyu marimbo kojo nja’u rano etu, see naka bombang mawali bose kojo. Bombang etu masua ri raya bangka nsira wali bangka etu dabukemo ue, mosu datondu.
24 Wali anaguru i Yesu mangampago Ia pei mangalike. Sira manganto’o, “Guru, Guru! Kita damate!” Wali i Yesu mambangu pei mamporentang ngoyu pasi bombang bose etu. Wali ngoyu pasi bombang etu mandoo yau, pasi rano etu mawali lindu muni.
25 Roo see i Yesu manganto’oka anaguruNya, “Maka pei komi taa mansarumaka Aku?” Wali anaguruNya etu meka pasi ipu kojo raya nsira pei masipotanaka samba’a pei samba’a, sira manganto’o, “Gete, sema kamonsonya tau si’i maka sakowa ngoyu pasi bombang Ia mamporentang panewa sira mampalaika seja Ia?”
26 Wali yako etu i Yesu pasi anaguruNya dongka nja’u lipu nto Gerasa. Lipu etu sambote ndano yako ri propinsi Galilea.
27 Wali ojo kadongka nsira nja’u ria, i Yesu mana’u yako ri bangka panewa Ia natomu ntau to tempo ruyu maroo ri kota nto Gerasa. Ngkai to mangantomu Ia etu, ia naposuak measa. Wali masaemo ia tare mangampake baju pasi taa seja maroo ri raya banua. Ia jamo marooroo nja’u oyo nu dayo.
28 Pasi mandudu ngkani measa etu mamposuak ia, see naka tau mangampunguka rante pale pasi witinya pasi mangajagai kojo ia. Pei nempo ewa see, ia ojo mangarapas yau rante etu pei napakasaaka measa yau njo’u lipu to tare tau mangkaroos. Wali tempo ngkai etu mangantomu i Yesu, tempo etu i Yesu mamporentang measa to mamposuak ia etu see measa etu damasuwu yako resi ia. Pei ngkai etu kaboo pei mambokotu ri tangoNya. Ia maroso loonya manganto’o, “O Yesu, Ana i mPue Allah anu makuasa kojo, kesaa ma’i Nupali resi aku? Kuporapika resi Komi, ne’e mangansesai aku!”
29 (8:28)
30 Wali i Yesu mampotanaka resi ia, “Sema sangamu?” Wali ngkai etu mangansono, “Sangangku Legiun.” Wali Legiun batuanginya boros tentara, see naka ia rato’oka Legiun apa boros kojo measa to mamposuak ia.
31 Wali nja’u rapa mpantana etu, re’e boros wawu ntau mangaliwu pangkoni. Wali measa etu mamporapika kojo resi i Yesu naka ne’e Ia mampokau sira lo’u wayau to taa ransani ungka ngkayombunya. Sira mamporapika resi i Yesu see Ia mangabiaka sira malimba damasua ri wawu etu, wali Ia manganto’oka sira, “Intamo.”
32 (8:31)
33 Wali tempo etu measa nasuwumo yako ri tau etu panewa masua ri wawu boros. Tempo wawu etu naposuak measa, sira maripo yau lo’u woto mpantana rata la’u raya ndano. Wali wawu etu malodong yau samparia.
34 Wali ojo pangkita nto pangkampang wawu palaong to mawali etu, sira miyai. Sira maripo lo’u kota. Rata la’u ria sira mampakarebaka resi tau nja’u ria pasi resi tau to ri kampu-kampu to ri awe ngkota etu mangkonong samparia palaong to nawali etu.
35 Wali ojo pangandonge ntau kareba to nato’oka nto pangkampang wawu sira, sira yau mangampago mangalo’a palaong to nawali etu. Ojo karata nsira resi i Yesu, sira mangkita tau to napiyaikamo measa etu matunda nja’u ria ri tango mbiti i Yesu. Sira mangkita matao muni apa sira mangalo’a masilonga muni pampobuukanya pasi sira mangkita re’e muni pakenya. Wali sira meka rayanya mampobuuka bae kojo kuasa i Yesu.
36 Pasi tau to matamanasa mpalaong to naika i Yesu etu, sira mangansaritaka wo’u tau to rata mangkonong ewa wimba naika i Yesu mampakatao muni tau to naposuak measa etu.
37 Wali bae kojo kameka ndaya ntau to maroo ri lipu nto Gerasa etu. See naka sira samparia paka mamporapika resi i Yesu see Ia damiyai yako ri lipu nsira. Wali i Yesu pasi anaguruNya mapone muni ri bangka pei malayag mawolili muni njo’u sambote ndano.
38 Tempo sira tawa yau etu, ngkai to napiyaikamo measa mamporapika resi i Yesu see ia seja damangalulu, pei i Yesu taa mangabiaka ia yau. Ia manganto’oka tau etu, to’oNya,
39 “Inta njo’u lipumu pei pakarebaka resi tau mangkonong samparia to naika i mPue Allah resi korom.” Wali ngkai etu yau muni njo’u lipunya pei mangansaritaka juku ri kota etu mangkonong samparia to naika i Yesu resi ia.
40 Wali ojo kadongka i Yesu pasi anaguruNya nja’u sambote ndano, boros tau to masanang rayanya mangantomu i Yesu, apa sira samparia mangampeas Ia.
41 Wali tempo etu ma’i samba’a tau tu’a nto Yahudi, ma’i mangampago seja i Yesu. Ngkai etu sanganya i Yairus. Wali ia ma’i mambokotu ri tango Yesu pei mamporapika resi Ia yau ri banuanya,
42 apa ananya damatemo. Ojo samba’aja see ananya, ia ana we’a to bara sampuyu pei dua nto’umo. Wali i Yesu yau mangalulu i Yairus etu. Pasi boros kojo tau to yusa to kangguyu-ngguyu mangalulu i Yesu, see naka sira mangajuju Ia.
43 Pasi re’e samba’a tau we’a ri oyonya tau boros etu ia sampuyumo pei dua nto’u tare pandoonya mansabe wuya. Tau we’a etu puramo kasuginya mangabayar yau dokter pei tare pasi samba’a sira to nakurang mampakatao muni ia.
44 Wali tau we’a etu ia mampago i Yesu yako ri payuNya panewa ia mampotaka ri wii mpake i Yesu. Tempo ia mampotaka etu, panyaki etu mansaka mandoo.
45 Wali i Yesu manganto’o, “Sema to nampotaka Aku?” Pei tau boros etu samparia paka manganto’o, “Si’a kami.” Wali see naka i Petrus manganto’o, “Pa’a Guru, boros kojo tau mangajuju Komi, maka pei Komi mampotanaka wo’u tau to mampotaka?”
46 Pei i Yesu manganto’o, “Re’e pu’u tau to mampora-rayaka mampotaka Aku, apa Aku mangepe kuasa to masuwu yako resi Aku.”
47 Wali tau we’a to nampotaka Ia etu, ia mangansani ia taa maya mangawuni palaong to inikanya etu. See naka ia yau mambokotu ri tango i Yesu tongo ngkarongko-rongkonya. Panewa ri tango ntau boros ia mampakanasaka resi Yesu sabanya naka pei ia re’e mampotaka Ia. Pasi ia mangansaritaka seja mangkonong panyaki etu mansaka roo muni tempo ia mampotaka i Yesu etu.
48 Wali i Yesu manganto’oka ia, “A’ingKu, inta ri kasanang ndaya. Apa korom mansarumaka Aku, see naka korom matao muni.”
49 Wali tongo-tongonya i Yesu mampogomboka tau we’a etu, ratamo tau yako banua i Yairus, tau tu’a nto Yahudi etu. Tau to rata etu manganto’oka i Yairus, “Anamu matem. Tamo re’e batuanginya komi mangantalas Pa’a Guru apa ana ngkomi matem si’i-si’i.”
50 Tempo i Yesu mangandonge gombo ntau etu, Ia manganto’oka i Yairus, to’oNya, “Ne’e bata-bata rayamu. Ojo sarumaka Aku pei anamu damatao muni.”
51 Wali yako etu sira rata nja’u banua i Yairus. Rata nja’u ria i Yesu masua ri raya banua pei Ia taa mangabiaka tau mangalulu Ia kasimbalinya yako i Petrus, i Yohanes, i Yakobus pasi pa’a pei indo nu ana we’a etu.
52 Wali samparia tau to nja’u nja’u banua etu paka tumangimangi mangantangis ana we’a etu. Wali i Yesu manganto’oka sira, “Ne’e tumangi. Ana etu taa mate, ia ojo yore.”
53 Pei tau boros etu ojo mampogeleka pasi mangkaengas Ia apa sira mangansani ana etu matemo.
54 Roo see i Yesu mampaposuwu yau tau boros etu panewa Ia mangoko pale nu ana to matem etu pei manganto’oka ia, “Ana, pambangumo!”
55 Wali tonii nu ana etu mawolili muni ri koronya panewa ia mansaka makore. Roo see i Yesu manganto’oka tau tu’anya, “Waika ia pangkoni.”
56 Wali tau tu’a nu ana etu ipu kojo rayanya mangkita palaong to naika i Yesu etu, pei i Yesu manganto’oka sira, “Ne’e kojo mangansaritaka sa’e mangkonong palaong to si’i.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA