Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Na mio ratnan ineh, idi Yésus nenalan libut-libut bawang idi ruma' ineh, idi nemada' Bala luk Do' ratnan Imet Allah. Idi pulu' dueh anak sekola' ineh nemaya' Neneh.
2 Idi teh inan tuda'-tuda' decur luk pangeh dino'Neh ratnan ada', luk nemaya' Neneh, ieh ineh Mariam (luk titen Magdalina), luk pangeh pinuit ratnan tudu' ada',
3 idi teh Yohana awan Kusa lun luk ngasa' binaweh Herodés, Susana, idi mula' decur baken teh luk nengasa' Yésus idi anak-anak sekola'Neh ku binawehdeh sebuleng.
4 Lun mula' megéi' amé' nan Yésus rat anid-anid bawang. Idi kareb lemulun pelaba ula', Ieh nemada' luk pinginud ini:
5 "Inan selemulun luk iné ngisak padé pimaraneh; idi kareb ieh nengisak, sebuang padé ineh nebpeh iring dalan, idi ridu'-ridu' lemulun, pad suit-suit nekuman ineh.
6 Idi inan teh luk nebpeh luun gura' batu; idi kareb ieh mulun, idi ieh mekarang peh, ngaceku na meba'.
7 Idi inan teh luk nebpeh arang tabpa'; idi tabpa' ineh netemubu' pad-pad dengan ineh pad ieh pelaba apet, idi na mulun do'-do'.
8 idi inan teh luk nebpeh luun tana' luk mebaleng, idi mulun pad macing nengeruat bua' meratu ula'neh." Idi kebala Yésus, "Lemulun luk inan lalid miak ninger, do' ieh ninger!"
9 Idi anak-anak sekola' Yésus nengitun ilung luk pinginud ini.
10 Idi kebala Yésus nedeh, "Pangeh biré nemuyuh do' kali' bala luk inalum ratnan Imet Allah, iamo' kuan lemulun luk baken ineh dengan luk pinginud, pelé kareb ideh nier, na luk sinierdeh, idi kareb ideh ninger pana' na ideh kali' ilungneh."
11 "Idi ini ilung pinginud ineh: idi ilung padé ineh bala Allah.
12 Idi luk nebpeh iring dalan, ieh ineh lemulun luk pangeh neninger, iamo' muci Iblis macing ngalap bala ineh rat bang niatdeh, pad lemulun ineh na manu idi uen ngulun peh.
13 Idi luk nebpeh luun gura' batu ineh, ieh ineh lemulun luk pangeh neninger, idi nengalap bala dengan mawang niat; iamo' lemulun ineh na uat idi ideh manu segageh mo', idi kareb luk nutun macing, petacu ideh lemubed.
14 Idi luk nebpeh arang tabpa' ineh, ieh ineh lemulun luk pangeh neninger. Iamo' ideh mesabeng ku rapang idi mula' binaweh idi luk do' bang tana' ini, pad ideh na ngeruat bua' dengan meriput.
15 Iamo' luk nebpeh luun tana' luk do' ineh, ieh ineh lemulun luk pangeh neninger bala ineh, idi nengimet meraben bang niat luk mesiri idi do', idi ngeruat bua' dengan mulai niat.
16 "Na luk idi seburur pana' luk nutud ilu', idi ngakeb neneh ku gatang, kian ngerareng neneh pa liang bitaran, iamo' ieh ngerareng neneh luun dawan, pad lemulun luk semuet miak nier acang ineh.
17 Sebuleng pana' na miak uen ngapung luk na miak uen ngegala', idi na luk idi luk inalum luk na miak kali' lemulun idi miak megala' peh.
18 "Ngaceku ineh ngerawé kudeng apeh muyuh ninger, ngaceku idé-idé luk inan anun-anun, idi kuanneh miak barén teh, idi idé-idé luk na luk idi anun-anun, idi luk tirawéneh inan kuanneh miak lapen rat neneh."
19 Tinan idi kinanak-kinanak Yésus pian amé' matun Neneh, iamo' na ideh miak amé' muneng Neneh ngaceku pelaba ula' lemulun.
20 Kebala seburur lemulun Neneh, "Tinan idi kinanak-kinanakMu tuped déi' liang sikal papu' Namu."
21 Iamo' kebala Yésus nedeh, "Tinan idi kinanak-kinanakKu, ieh ineh luk ninger idi maya' bala Allah."
22 Idi bang seaco Yésus dengan anak-anak sekola'Neh netemaleb bang aceh alud, idi kebala Yésus nedeh, "Do' tau guta amé' déi' dipar takung ineh." Idi ideh nenalan.
23 Iamo' kareb uneddeh maya' alud, idi Yésus nerudap, idi netemurun aceh barui luk rayeh déi' bang takung ineh, idi alud ineh pana' lélé mepanu' ku abpa', pad ideh pelaba susa'.
24 Idi ideh iné' matun Yésus, idi nengalat Neneh, keburi'deh, "O Tuhan! O Tuhan! Tau lélé maté." Idi Yésus netumui idi nengagka' barui idi ribut ineh, pad ieh melitong peh.
25 Idi keburi'Neh nan anak-anak sekola'Neh, "Iapehké anu muyuh?" Iamo' ideh mawa idi matot, kebaladeh seburur dengan seburur, "Idéké lemulun ini luk mebpeng barui idi ribut, pad ideh maya' balaNeh?"
26 Ideh nemaya' alud iné' tana' lun Gerasa, luk petutup ku Galilia.
27 Kareb Yésus numak déi' tangeb, idi Ieh nepapu' seburur lemulun luk rat bang bawang ineh, luk sinuet ada'. Idi pangeh tuda'-tuda' io lemulun ineh na luk idi ayung, idi na tudo bang ruma' teh, iamo' bang lengutan mo'.
28 Kareb ieh nenier Yésus, idi ieh nengitang idi netekeradung pa kiungNeh, kebalaneh, "Anunké luk pianMu negku, O Yésus Anak Allah luk Meluun Dita'? Ui mutuh, aleg Iko ngedereh negku."
29 Ieh nepebala kudeng ineh ngaceku Yésus nengecuk ada' ineh remuat rat bang bururneh. Mula' kua' ada' ineh nengimet neneh; idi sagan tu pana' ieh pinatar lemulun, pad ieh kiling idi pipang; iamo' amung-amung kaling ineh nabud pinututneh, idi ieh pinasut ada' amé' su luk ali-ali.
30 Idi Yésus nengitun neneh, "Idéké ngadanmu?" Idi keburi'neh, "Baweh," ngaceku mula' ada' pangeh nesemuet bang bururneh.
31 Ada'-ada' ineh nemutuh Yésus na ngecuk nedeh semuet bang lubang luk na miak uen nari kidalemneh.
32 Idi inan barek luk mula' uned nakap akan déi' luun surud; idi ada'-ada' ineh pana' nemutuh Yésus, pad Ieh nima' nedeh semuet bang burur barek ineh. Idi Ieh nenima' nedeh.
33 Idi ada'-ada' ineh neremuat rat bang burur lemulun ineh idi nesemuet bang burur barek-barek ineh. Barek-barek ineh nupun musul maya' irang pegkung ineh idi nubpa bang abpa' rayeh. Idi ideh naté nened.
34 Kareb lemulun luk matar barek ineh nekali' luk kudeng ineh, idi ideh neburo, idi nemada' nelun bang bawang ineh idi bang lati'-lati' teh.
35 Ideh neremuat amé' nier luk pangeh nangun ineh, idi iné' matun Yésus, idi nepapu' lemulun luk inan ada' neremuat ineh tudo iring kukud Yésus. Ieh pangeh nengayung, dengan na meruden, pad ideh palaba tot.
36 Idi lemulun luk pangeh nenier luk kudeng ineh nemada' nedeh, ratnan kudeng apeh lemulun luk sinuet ada'-ada' ineh pangeh dino'.
37 Idi amung lemulun luk rat libut bawang Gerasa nemutuh Yésus buro rat nedeh, ngaceku ideh palaba tot. Idi Yésus netemaleb bang aceh alud, idi Ieh nenalan.
38 Lemulun luk inan ada' neremuat ineh nemutuh Yésus, pad ieh miak maya' Neneh. Iamo' Yésus nengecuk neneh nalan, keburi'Neh,
39 "Muli' iko, idi mada' kudeng apeh rayeh luk inau' Allah kuanmu." Idi lemulun ineh pana' iné', idi nemada' libut-libut bawang ineh, kudeng apeh rayeh luk pangeh inau' Yésus kuanneh.
40 Kareb Yésus nelemubed, idi Ieh tinawar lun mula', ngaceku amung-amungdeh nganét Neneh.
41 Idi seburur lemulun luk ngadanneh Yairus, ieh ineh seburur lun rayeh ruma' sembayang nacing idi netekeradung iring kukud Yésus, mutuh Neneh amé' ruma'neh.
42 Ngaceku inan aceh anak decurneh luk sebuleng luk lélé pulu' dueh lak ulunneh, idi ieh lélé maté. Uned Yésus nalan idi lun mula' pana' nengerieng Neneh.
43 Idi inan seburur decur luk mét mirat dara' pangeh pulu' dueh lak kinioneh, idi sagan pana' ieh nengabud binawehneh kuan lun ngubat, iamo' seburur pana' nateh nengedo' neneh.
44 Idi decur ineh nacing rat pa keted idi nengakem kuyu' Yésus, idi petacu dara'neh nugka'.
45 Idi kebala Yésus, "Idéké luk nengakem Negku?" Idi lun mula' nengena, idi kebala Pétrus, "O Tuhan, lun mula' ngeperi' idi ngerieng Namu!"
46 Iamo' Yésus nepebala, "Inan seburur lemulun pangeh nengakem Negku; ngaceku Ui nekali' sebuleng lalud neremuat rat Negku."
47 Iamo' kareb decur ineh nekali' ieh na miak sigapung, idi ieh nacing dengan megegker, idi netekeradung pa kiung Yésus idi nemada' pa kiung amung-amung pupu ineh, ratnan ieh pangeh nengakem kuyu' Yésus, idi ratnan kudeng apeh ieh petacu nedo' peh.
48 Idi kebala Yésus neneh, "O anakKu, anumu pangeh nengedo' namu, nalan iko dengan awang."
49 Kareb Yésus uned pebala, idi seburur lemulun nacing rat ruma' lun rayeh ruma' sembayang ineh, keburi'neh, "Anakmu pangeh naté, aleg ngesusa' Guru teh."
50 Iamo' Yésus neninger bala ineh, idi Ieh nengor neneh, "Aleg matot, manu mo', pad ieh miak mulun."
51 Kareb Ieh nacing bang ruma' ineh, idi na Ieh nima' seburur pana' semuet denganNeh, iamo' Pétrus, Yahya, Yakub, idi taman-tinan anak ineh mo'.
52 Idi amung-amung lemulun pana' nangi' idi temido neneh; iamo' keburi Yésus, "Aleg nangi', baken ieh naté, iamo' rudap."
53 Idi ideh meriruh idi nesitunga Neneh, ngaceku ideh kali' neneh pangeh naté.
54 Iamo' Yésus nengimet ticu' anak ineh idi nengitang, kebalaNeh, "O anak decur, tumui iko."
55 Idi niatneh pana' nelemubed, idi petacu ieh netumui, idi Yésus nengecuk maré luk kenen kuan anak ineh.
56 Idi taman-tinanneh mawa; idi Yésus neperiteteng nedeh, "Aleg mala ratnan ini kuan seburur lemulun pana'."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA