Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun tutuq manikang hal-hal nike lẽq dengan luwẽq, Deside Isa lumbar ojok Kapernaum.

² Lẽq derike araq prewire Roma saq bedowẽ pelayan saq ie tunah gati. Pelayan nike sakit parah dait gen milinang.

³ Lẽq waktu prewire nike dengah mengenai Deside Isa, utusne pire pemimpin dengan Yahudi lumbar ojok Deside Isa jari tunas adẽq Ie rauh dait nyelahang pelayanne.

⁴ Sewaktu dateng lẽq Deside Isa, sanget siqne tunas siq dengan-dengan nike adẽq Deside Isa kayun nulung prewire nike. Ie pade matur lẽq Deside Isa, "Prewire niki patut Pelungguh tulung,

⁵ sẽngaq ie ngasihin bangsente dait sampun miaqang tiang pade balẽ ibadah."

⁶ Make Deside Isa lumbar bareng-bareng kance ie pade. Sendẽqman Deside Isa rauh lẽq gedẽng prewire nike, prewire nike ngutus batur-baturne jari matur tipaq Deside Isa, "Sampunang Pelungguh rẽpot-rẽpot, tiang nẽnten patut nerimaq Pelungguh lẽq balẽn tiang.

⁷ Malahan tiang mẽsaq nẽnten patut ngadep Pelungguh. Silaq Pelungguh bemanik doang adẽq pelayan tiang selah.

⁸ Sẽngaq tiang ẽndah bedowẽ atasan dait tiang harus taat lẽq ie. Dait lẽq bawaq tiang ẽndah araq prajurit-prajurit saq harus taat lẽq prẽntah tiang. Lamun tiang suruq sopoq prajurit, 'Lalo!' ie pasti lalo. Dait lamun tiang suruq saq lain, 'Dateng!' ie pasti dateng; dait lamun tiang prẽntah pelayan tiang, 'Laksaneang!' pasti ie laksaneang."

⁹ Deside Isa bengaq pirengang hal nike. Deside Isa nyereminang andang dengan luwẽq saq kenyeke ngiring Ie dait bemanik, "Tiang badaq side, iman sebelẽq niki ndẽq uwah Tiang ndait lẽq antare dengan Israel."

¹⁰ Sewaktu dengan-dengan saq teutus nike tulak ojok gedẽng prewire nike, pelayan nike sampun selah.

¹¹ Ndẽq ngonẽq sesampun nike, Deside Isa lumbar ojok kote Nain. Pengiring-pengiring-Ne dait dengan luwẽq pade milu ngiring Deside Isa.

¹² Sewaktu Deside Isa rauh lẽq dẽkẽt jebak kote, araq dengan-dengan saq kenyeke lẽmbah jenazah ojok luah kote. Saq milinang nike kanak mame, bijene bebalu, ie anak nunggal. Luwẽq penduduk kote milu ngatong bebalu nike.

¹³ Sewaktu Deside Isa, Junjungan Saq Mulie cingakin bebalu nike, Ie periak lẽq bebalu nike terus bemanik, "Inaq, ndaq nangis!"

¹⁴ Beterus Deside Isa ngerapetin kurung batang jenazah nike dait tegelne. Make dengan-dengan saq ngelẽmbah kurung batang nike mentelah. Deside Isa bemanik, "Nune, Tiang bemanik lẽq side, silaq ures!"

¹⁵ Terune saq sampun milinang nike ures, terus tokol dait mulai ngeraos. Make Deside Isa nyerahang ie ojok inaqne.

¹⁶ Selapuq dengan jari takut dait mulieang Allah. Ie pade bebase, "Sopoq nabi saq belẽq sampun rauh lẽq tengaq-tengaq ite! Allah sampun rauh jari nyelametang umat-Ne!"

¹⁷ Kabar mengenai Deside Isa niki nyebar lẽq selapuq wilayah Yudea dait lẽq daẽrah sekiterne.

¹⁸ Waktu Yahya mauq kabar lẽman pengiring-pengiringne mengenai selapuq peristiwe nike, ie ngempoh due pengiringne

¹⁹ terus ngutus ie pade lumbar ojok Junjungan Saq Mulie Deside Isa jari metakẽn, "Napi Pelungguh dengan saq gen rauh menurut janji Allah, atao tiang pade harus ngantih dengan saq lainan?"

²⁰ Kedue pengiring Yahya nike lumbar ojok Deside Isa, dait matur, "Yahya Pembaptis ngutus tiang pade metakẽn lẽq Pelungguh, napi Pelungguh dengan saq gen rauh menurut janji Allah, atao tiang pade harus ngantih dengan saq lainan?"

²¹ Waktu nike, Deside Isa nyelahang luwẽq dengan, dait sediq roh jahat dait miaq luwẽq dengan bute tao nyerioq.

²² Jari jawab Deside Isa, "Tulak tipaq Yahya dait badaq napi saq side pade dengah dait serioq: dengan bute tao nyerioq, dengan kẽpaq tao lampaq, dengan sakit kuste selah, dengan kedok tao dedengah, dengan ninggal teidupang malik, dait Kabar Solah lẽman Allah tesampẽang tipaq dengan-dengan miskin.

²³ Bahagie dengan saq ndẽq ragu-ragu lẽq Tiang."

²⁴ Sesampun utusan-utusan Yahya nike lumbar, Deside Isa mulai bebaos lẽq dengan luwẽq mengenai Yahya, manik-Ne, "Side pade lumbar ojok padang gurun jari serioq napi? Napi terẽng buloq saq tetiup siq angin?

²⁵ Side pade lumbar jari serioq napi? Serioq dengan saq bekelambi solah? Dengan-dengan saq bekelambi maraq nike dait saq idup mẽwah ndot lẽq istane!

²⁶ Jari, side pade sugul serioq napi? Jari serioq nabi? Tetu, malahan ie lebih lẽman nabi.

²⁷ Sẽngaq Yahya nike saq temaksut dalem ayat Kitab Suci niki, 'Serioq, Tiang suruq utusan Tiang, juluan lẽman Deside, ie gen nyiepang Deside langan.'

²⁸ Tiang badaq side: Lẽq dunie niki ndẽq uwah araq dengan saq belẽqan lẽman Yahya Pembaptis. Laguq dengan saq paling kodẽq lẽq dalem Kerajaan Allah, belẽqan lẽman Yahya."

²⁹ Selapuq dengan -- termasuk ẽndah penagih-penagih pajek -- dengah Deside Isa manikang hal nike. Ie pade ngakuq kebenaran Allah sẽngaq ie pade sampun tebaptis siq Yahya.

³⁰ Laguq dengan-dengan Parisi dait ahli-ahli Taurat ndẽq mẽlẽ nerimaq rencane Allah tipaq ie pade. Ie pade ndẽq mẽlẽ tebaptis siq Yahya.

³¹ Beterus Deside Isa bebaos malik, manik-Ne, "Napi kance Tiang bandingang dengan-dengan jaman niki? Napi kancene bau tepadeang?

³² Ie pade maraq kanak-kanak saq tokol lẽq peken; sekelompoq bekuih tipaq saq lain, 'Tiang pade nyanyiang side pade lagu gembire, laguq side pade ndẽq mẽlẽ ngigel! Tiang pade nyanyiang lagu sedih, laguq side pade ndẽq nangis!'

³³ Yahya Pembaptis dateng -- ie puase dait ndẽq nginem anggur -- dait side pade bebase, 'Ie tekuasein siq sẽtan!'

³⁴ Bije Manusie rauh -- Ie medaran dait nginem -- terus side pade bebase, 'Serioq dengan nike! Melak, girang bowos, batur penagih pajek, dait batur dengan bedose!'

³⁵ Timaq maraq nike, hikmat Allah gen nyate mule kenaq lẽq dalem kehidupan dengan-dengan saq tepimpin siq hikmat nike."

³⁶ Araq dengan Parisi, aranne Simon, pesilaq Deside Isa medaran. Deside Isa lumbar ojok gedẽngne dait melinggih medaran.

³⁷ Lẽq kote nike araq ẽndah dengan nine saq idup dalem dose. Waktu ie dengah bahwe Deside Isa kenyeke medaran lẽq gedẽng dengan Parisi nike, ie dateng jauq sopoq botol pualam berisi minyak sengẽh.

³⁸ Ie nganjeng lẽq mudi Deside Isa dẽkẽt cokor-Ne dait nangis sambil basaqang cokor Deside Isa siq aiq penentengne. Beterus usapne cokor Deside Isa siq bulune jangke gero terus sidukne dait teminyakin siq minyak sengẽh nike.

³⁹ Sewaktu dengan Parisi saq pesilaq Deside Isa serioq hal nike, ie bebase dalem angenne, "Seandẽne Ie niki nabi, pasti Ie wikanang sai dengan nine saq kintur Ie, sẽngaq dengan nine nike dengan bedose!"

⁴⁰ Beterus Deside Isa bemanik lẽq Simon, "Simon, araq sopoq hal saq mẽlẽ Tiang sampẽang lẽq side." Atur Simon, "Silaq Pelungguh manikang."

⁴¹ Deside Isa bemanik, "Araq due dengan saq berutang lẽq dengan saq nyinggaqang kẽpẽng. Saq sopoq berutang lime ratus kẽpẽng perak, dait saq sopoqne malik sẽket kẽpẽng perak.

⁴² Deduaqne ndẽq bau ngelunasin utang nike, make ihlasangne utang ie pade. Nah, lẽq antare deduaqne sai saq belẽqan kasihne tipaq dengan saq nyinggaqang kẽpẽng nike?"

⁴³ "Menurut tiang dengan saq paling luwẽq teihlasang utangne!" jawab Simon. "Kenaq pendapet side," jawab Deside Isa.

⁴⁴ Beterus Deside Isa cingakin andang dengan nine nike dait bemanik lẽq Simon, "Side serioq dengan nine niki? Tiang dateng ojok balẽnde, dait side ndẽq sadangang aiq jari persiq naẽn Tiang; laguq dengan nine niki sampun persiq naẽn Tiang kadu aiq penentengne, dait usapne kadu bulune jangke gero.

⁴⁵ Side ndẽq nyambut Tiang siq sidukan, laguq dengan nine niki ndẽq engkah-engkahne nyiduk naẽn Tiang mulai lẽman Tiang dateng ojok deriki.

⁴⁶ Side ndẽq minyakin ulun Tiang siq minyak, laguq dengan nine niki sampun minyakin naẽn Tiang siq minyak sengẽh.

⁴⁷ Keranaq nike Tiang badaq side: Lantaran dosene saq luwẽq sampun teampunin, make ie luwẽq nyatayang kasihne. Laguq dengan saq teampunin sekediq, ie ẽndah gen sekediq nyatayang kasihne."

⁴⁸ Beterus Deside Isa bemanik lẽq dengan nine nike, "Dose-dosende sampun teampunin."

⁴⁹ Dengan-dengan lain saq tokol ngiring Deside Isa medaran mulai bebase sopoq kance saq lain, "Sai dengan niki jangke Ie bau ngampunin dose?"

⁵⁰ Laguq Deside Isa bemanik lẽq dengan nine nike, "Lantaran side percaye lẽq Tiang make side jari selah, silaq lumbar dalem damẽ!"

Lukas

Video Lukas 7

Ikuti Kami:

KONTAK | PARTISIPASI | DONASI