Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca dung Jesus ngajar man kalak si nterem, lawes Ia ku Kapernaum.
2 I je lit sekalak perwira Roma; keleng kal atena suruh-suruhenna. Suruh-suruhenna paksana sakit dingen menam mate pe.
3 Sanga ibegi perwira e kerna Jesus, isuruhna piga-piga peminpin-peminpin Jahudi ndahi Jesus guna mindo gelah IpepalemNa suruh-suruhenna e.
4 Emaka idahi peminpin-peminpin ndai me Jesus janah mindo alu meseksek nina, "O Tuhan, tuhu-tuhu patut kal perwira e isampatindu,
5 sabap keleng kal atena bangsanta, janah ibahanna pe sada rumah persembahen man kami."
6 Emaka berkat Jesus ras kalak ndai. Asum lanai ndauhsa Jesus i bas rumah perwira nari, isuruh perwira e teman-temanna ndahi Jesus guna ngataken, "O Tuan, ulanai gia Kam latih. Kuakap labo aku metunggung ngalo-ngalo Kam i bas rumahku,
7 bage pe la kuakap metunggung aku reh njumpai Kam. Emaka katakenlah sengkebabah kal lah gia, tentu malem perajurit e.
8 Sabap aku pe lit nge perwira-perwira si ganjangen asangken aku, lit ka pe si teruhen asangken aku. Adi ningku man bana, 'Lawes!', lawes ia; adi ningku man si deban 'Mari!', reh ia, jadi adi man sekalak suruh-suruhen ningku, 'Bahan bagenda!', ibahanna pe minter."
9 Mamang ate Jesus asum IbegiNa kata e. JanahNa nulih kempak kalak si nterem si ngikutken Ia nina, "Kukataken man bandu: Langa pernah Aku jumpa ras sekalak si bagenda kal belinna kinitekenna. I bas kalak Israel pe langa pernah Aku jumpa."
10 Kenca mulihken kerina si isuruh perwira ndai, idapetina suruh-suruhen e nggo malem.
11 Kenca si e, minter lawes Jesus ku sada kuta, gelarna Nain; ajar-AjarNa ras jelma si nterem ikut ras Ia.
12 Seh kenca Ia i kerabangen kuta e, simbel Ia ras rombongen si ngelanja kalak mate, ndarat i bas kuta e nari. Si mate e sekalak anak perana, e me anak sada diberu balu-balu. Nterem kal anak kuta ikut naruhkenca.
13 Megogo dingen mekuah ate Tuhan Jesus ngidah nande si kepaten e, emaka nina man bana, "Ola kam tangis."
14 Ideheri dingen ijemak Jesus peti mait e, emaka ngadi si ngelanjasa. Nina Jesus, "O anak perana, Kukataken man bandu: kekeken!"
15 Emaka keke si mate ndai janah ngerana ia, jenari ibereken Jesus ia man nandena.
16 Mbiar kalak e kerina, janah ipujina Dibata nina, "Nggo reh nabi si mbelin ku tengah-tengahta! Nggo reh Dibata mulahi BangsaNa!"
17 Emaka berita kerna Jesus mbar ku kerina taneh Judea ras ku daerah-daerah sekitarna.
18 Kerina kejadin e seh man Johanes Peridiken perbahan ituriken ajar-ajarna. Emaka idilo Johanes Peridiken dua kalak ajar-ajarna,
19 jenari isuruhna duana ndahi Tuhan guna nungkun, "Kam kin si ikataken Johanes Peridiken si nggo ndeher kerehenna e, ntah itimai kami denga si deban?"
20 Kenca si dua kalak e jumpa ras Jesus, emaka nina, "Kami isuruh Johanes Peridiken nungkun man BaNdu, 'Kam kin si ikataken Johanes Peridiken si nggo ndeher kerehenna e, ntah itimai kami denga si deban?'"
21 Paksa si e ka, ipepalem Jesus nterem kalak penakiten, si erbage-bage persuina si setanen, janah IpemedakNa kalak si pentang.
22 Emaka erjabap Jesus man persuruhen Johanes Peridiken e, nina, "Mulihlah, janah turiken man Johanes Peridiken kai si nggo idah dingen ibegindu, e me: kalak pentang nggo erpengidah, si pangpangen nggo ngasup erdalan, si gadamen nggo malem, si pasek nggo ngasup erpemegi, si nggo mate nggeluh mulihi, janah Berita Si Mehuli iberitaken man kalak musil.
23 Malem tuhu-tuhu ate kalak si tetap erkiniteken man bangKu."
24 Kenca lawes persuruhen Johanes Peridiken ndai, ibenaken Jesus ngerana man kalak si nterem kerna Johanes Peridiken nina, "Asum idahindu mbaru enda Johanes Peridiken ku taneh si melungun, kai kin min atendu nehenenndu? Atendu kin ngenehen dukut si iole-oleken angin? Tentu lang!
25 Jadi, kai dage nehenenndu? Sekalak si mejile uisna? Tentu lang, sabap kalak si mejile uisna dingen nggeluh mewah inganna i bas istana raja nge.
26 Katakenlah, kai dage nehenenndu? Sekalak nabi? Payo, Kukataken pe man bandu maka si nggo idahndu e lebihen asa sekalak nabi.
27 Sabap kerna Johanes Peridiken nggo isuratken i bas Pustaka Si Badia, 'Nina Dibata: Kusuruh persuruhenKu leben asa Kam, ia kap nikapken dalan man BaNdu.'"
28 Tole nina Jesus, "Kukataken man bandu maka i doni enda la lit pernah manusia belinen sangken Johanes Peridiken. Tapi si kitikna i bas Kinirajan Dibata belinen asangken Johanes Peridiken."
29 Kerina kalak si nterem: pengalo cuke, si megi pengajaren Johanes Peridiken ngikutken pemindon Dibata, dingen nggo pe ialokenna peridin arah Johanes.
30 Tapi kalak Parisi ras guru-guru agama nulak rencana Dibata nandangi dirina, dingen la ia nggit iperidiken Johanes Peridiken.
31 Tole nina Jesus, "Dage alu kai nge banci Kuumpamaken manusia si genduari enda? Ras kai nge ia bali?
32 Kalak si genduari enda bali ras anak-anak si erguro-guro i tengah kesain. Nina sada terpuk man terpuk si deban, 'Nggo ipalu kami gendang guro-guro tapi la kam landek! Nggo iendeken kami lagu tangis-tangis, tapi la kam tangis!'
33 Sabap Johanes Peridiken nggo reh, la ia ikut man-man i bas pesta dingen la inemna anggur, janah ikatakenndu, 'Setanen ia!'
34 Reh ka Anak Manusia si isuruh Dibata, ikut Ia man ras minem i bas pesta, janah nindu, 'Nehenlah! Ia sekalak si rangap dingen peminem-minem; meriah Ia ras pengalo cuke bage pe kalak si nggo terbuang i tengah-tengah jelma si nterem nari!'
35 Tapi amin bage pe, kepentaren Dibata nge si payo. E lit buktina i bas kerina kalak si ngalokenca."
36 Sekalak i bas kalak Parisi nari ngundang Jesus man ku rumahna. Lawes Jesus ku rumah e janah kundul Ia man i je.
37 I bas kuta e lit sekalak diberu perdosa. Ibegina berita maka Jesus sangana man i rumah kalak Parisi e, emaka reh ia, ibabana sada botol marmar minak merim.
38 Tedis ia i pudi Jesus deher NaheNa, tangis ia seh litap pe nahe Jesus ibahan iluhna, jenari isapuina alu bukna. Iemaina nahe Jesus dingen iminakina alu minak si merim ndai.
39 Ngidah si e mecekurak ukur kalak Parisi si ngundang Jesus ndai nina, "Adi tuhu-tuhu kin Ia nabi, tentu IetehNa nge ise diberu si njemak Ia e dingen kalak si kuga kin ia. Tentu IetehNa maka diberu enda kalak perdosa."
40 Emaka nina Jesus man bana, "O, Simon, lit ateKu Kukataken man bandu." Ngaloi Simon, "Katakenlah Guru."
41 Emaka nina Jesus, "Lit me dua kalak rutang man kalak si peraihken duit. Sekalak rutang lima ratus duit pirak sekalak nari rutang lima puluh duit pirak.
42 Duana kalak enda lanai ngasup nggalari utangna e, emaka isasapken perutangenna e utangna ndai. Adi bage, si apai nge i bas si dua kalak enda ndai si lebih erkeleng ate nandangi perutangenna e?"
43 Erjabap Simon, "Kuakap kalak si mbuena utangna isasapken." Ngaloi ka Jesus, "Payo jabapndu e."
44 Emaka erkusur Jesus man diberu e, jenari nina man Simon, "Idahndu kin diberu enda? Reh Aku ku rumahndu, la iberendu lau man pemurihi nahengKu, tapi ia nggo iburihina nahengKu alu iluhna dingen isapuina alu bukna.
45 La iemandu Aku, tapi ia la erngadi-ngadi ngema nahengKu.
46 La iminakindu takalKu alu minak, tapi ia nggo iminakina nahengKu alu minak si merim.
47 Perbahan si e, Kukataken man bandu maka dosana si melala nggo ialemi! Sabap melala icidahkenna kekelengen. Tapi kalak si sitik ialemi tentu kekelengenna pe sitik."
48 Emaka nina Jesus man diberu e, "Dosandu nggo ialemi!"
49 Kalak si deban si ras Jesus kundul i je nungkun i bas ukurna nina, "Ise kin kalak enda maka banci IalemiNa dosa?"
50 Tole nina Jesus man diberu ndai, "Kinitekenndu erbahanca kam terkelin. Mulihlah alu mejuah-juah!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA