Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nopaḷut makow ing ki Yesus nosingog kon tayowon intau moaíntoí tatua, Sia minayak ing Kapernaum.
2 Kon tua oyuíon in tobatuí porwira in Rum inta kobobantung. Bobantungnya tatua, totok ing kotabinya ta'e dodai intua notakit moyoyiga dongkadon oḷaton.
3 Naonda im porwira tatua nokodongog kom bayongan inta inaidan i Yesus, sia nopotabaí kon tongonumai itoi mita in Yahudi mayak ko'i-Nia bo mopo'igum simbaí ki Yesus mamangoipa mongundam kom bobantungnya tatua.
4 Mosia minayak ko'i Yesus, bo naonda in no'iyaput ko'i Yesus, mosia nopo'igum totok simbaí Sia mo'ibog mamangoi motuḷung kom porwira tatua. Mosia noguman nana'a, "Porwira tatua patusbií tuḷungan i Amaí,
5 sin sia tua im motabibií kom bayongan intau naton bo sia doman tua inta nokiposindog im baḷoi pososambayangan nami."
6 Daí ki Yesus minayak noyotakin monia. Ta'e naonda in nodiugdon im mosia kom baḷoi porwira tatua, porwira tatua nopotabaí bui kon yobayatnya mita sim moguman nana'a ko'i Yesus, "Tuang dona'aidon ki Tuang rumorigamai mamangoi im baḷoiku sin diaíbií patus in aku'oi motarima ko'i Tuang kom bonu im baḷoiku.
7 Bo aku'oi in diaí doman patus mamangoi mokipodungkuḷ ko'i Tuang. Ta'e poyaputdon in singog-Mu tongaíkabií totontagaí daí mopiabií in simpaḷku tatua.
8 Sin aku'oi na'a in tobatuí doman bawahan bo kolimonagku oyuíon doman im prajurit. Aka aku'oi bo moguman kom prajurit tobatuí, 'Bayak!' Daí sia im mayakbií doman, bo aka tobatuí ing kainako, 'Igai!' daí mamangoibií doman in sia, andeka aku'oi moguman kom bobantungku, 'Aidai in na'a!' Aidannyabií doman intua."
9 Nokodongogmai kong koyow tatua, noherang totok ing ki Yesus. Sia nobobui kon intau mita inta dinumudui ko'i-Nia bo poḷat nosingog, "Pirisaya naímai na'a ing koḷoben diaípa dodai onda in no'ulií-Ku kon sigad in intau Israel!"
10 Naonda intau mita inta pinotabaí im porwira tatua norobuidon kom baḷoi, kinobayaíanmai monia nopiadon im bobantung im porwira tatua.
11 Diaí no'onggot kon tua, ki Yesus minayak kong kotaí in Nain. Dumodudui-Nya mita bo intau moaíntoí minayak noyotakin-Nya.
12 Naonda im mosia nodiugdon kon ngara ing kotaí tatua. Mosia noyodungkuḷ in intau mita inta nobulig kom minatoi sim poḷuai ing kota. Intau minatoi tatua adií ḷoḷaki, adií totobatuí in intau inta dongkadon boba-bobay. Nobarong intau in nongkon kota tatua in dinumudui ko'i inaí in adií tatua.
13 Naonda ing ki Yesus noko'ontong kon intau boba-bobay tatua noliai ing ginanya sin tabi-Nya. Daí Sia noguman nana'a, "Dona'aidon mongombaḷ!"
14 Bo Sia dinimiug kom buligan tatua bo kinadaian-Nya. Daí intau mita inta nobulig sinumogon bo Sia noguman, "Hoi Ule, Aku'oi moguman ko'inimu pobangondon!"
15 Daí nobangondon in tayamobiag tatua bo ilimituí nongonguman. Onda intua pinopodiugdon bui i Yesus ko'i inaínya.
16 Intau kon tua noíondok komintan bo nodayow ko'i Allah poḷat noguman, "Tobatuí nabi inta moḷoben na'adon kon yuaí-yuaík naton, bo ki Allah namangoidon moposaḷamat kon umat-Nya."
17 Habar tatua no'ibaya-bayakdon makow kom bayongan lipuí kon Yudea bo kon diugeamai.
18 Dumodudui mita i Yohanes nongonguman ko'i Yohanes kom bayongan inta ain nobalií tatua. Daí ki Yohanes nogoinií kon dumoduduinya doyowaí
19 bodongka pinotabaínya mayak moliboí ko'i Yesus, "Ki Tuangdon degaí inta pinodandi mamangoi tua, andeka mogoḷatpa ing kami kon intau ibanea?"
20 No'iyaputmai ko'i Yesus in taya dua, mosia noguman, "Ki Yohanes Mobobaptis nopotabaí ko'inami mamangoi bo moliboí ko'i Tuang, mongo ki Tuangdon degaí inta pinodandi mamangoi, andeka mogoḷatpa degaí ing kami kon intau ibanea?"
21 Ko wakutu intua ki Yesus nongundam kon norupa-rupamai in takit bo roriga kom moaíntoí intau bo noguntun doman kon dimukud mita mora'at, bo nongundam kon intau mita bilog sahingga im mosia noko'ontongdon.
22 Daí ki Yesus noguman kon dumodudui i Yohanes tatua, "Bayakdon bui ko'i Yohanes bo o'umandon onu inta ain inontong bo dinongog monimu: Intau bilog moko'ontong, intau lempeng moko'bayak, inta pinanyaki kusta mopia, intau bongoḷ mokodongog, intau matoi mobiag, intau bogaí pinopoyaputan in Habar Mopia.
23 Kosanangdon ing gina in intau inta umuran motantuí ing gina ko'i-Nakoí."
24 Naonda intau mita inta pinotabaí i Yohanes nobuidon minayak, ki Yesus noginsilang kon intau mobarong kon tua mongo ki ine ing ki Yohanes, kai-Nia, "Onu im bayaían monimu indoian kom padang gurun? Mo'indoi degaí kon aog inta inirup in tompot po'uik po'untag?
25 Mo'ikow mayak mongonu? Mo'indoi degaí kon intau inta nogiḷambung mogagah? Intau inta nogiḷambung mogagah bo inta nobiag no'oyuíon tampatnya in tuabií kon istana!
26 Daí aka natua yo onu im bayaían monimu indoian? Mo'indoi degaí kon nabi? Totuíu, sedang no'iliubií kon tobatuí nabi in sia.
27 Sin sia tua inta aim pinais kom bonu im Buk Mosuci, 'Indoiaikah na'adon in totabaí-Ku,' 'Sia pinotabaí-Ku inumuna ko'i-Nimu, simbaí sia im momontang kon daḷan baya'an-Mu!'"
28 "Baí poguman-Kudon ko'i moniumu, 'Kon sigad monia inta pinolahir im bobay diaíbií tobatuímai no'iliu ko'i Yohanes, ta'e inta totok im mo'intok kon sigad in umat i Allah. Siabií tua im mokawa-kawasa nongkon i Yohanes Mobobaptis.'"
29 Komintan intau inta kon tua nokodongog kon onu inta siningog i Yesus tatua, intau doman inta mononagih kom pajak, mosia tua inta ain dinumudui kon onu im pinarentah i Allah bo inta aim binaptis i Yohanes.
30 Ta'e intau mita im Parisi bo mototunduí kon agama doiíbií notarima kon roncana i Allah ko'i monia. Mosia tua in doiíbií binaptis i Yohanes.
31 Ki Yesus nosingog bui nana'a, "Onu degaí im mota'au-Ku popo'umpama'an kon intau mita masai na'a, naí onu degaí im mosia tua?
32 Mosia tua naíonda bo mongoaídií mita inta ilimituí kom pasar bo mosipomaḷuían nana'a, 'Aim pinogirupan nami kom bansií im mo'ikow, ta'e mo'ikow doiíbi momanari! Pinomanyanyian nami im manyanyi inta mokopongoibu, ta'e mo'ikow doiíbií doman mongombaḷ!'
33 Ki Yohanes Mobobaptis namangoi -- sia diaí noka'an kon roti bo diaí doman nonginum kon anggur -- ta'e kai monimu: 'Sia tua kinotoḷongan in dimbuḷoí!'
34 No'iduduimai kon tua, Adií Intau namangoi -- Sia tua nonga'an bo nonginum -- ta'e siningog monimu: 'Indoiaikah, intau tatua! Totok in turak bo motoyang monginum, yobayat im mononagih kom pajak bo intau mita baradosa.'
35 Umpakahbií natua, ta'e hikmat i Allah in inaíku bidon im bayongan inta notarima kon tua."
36 Tobatuí intau im Parisi namangoi nogoinií ko'i Yesus monga'an kom baḷoinya, daí ki Yesus minayak ilimituí bo nonga'an doman kom baḷoinya.
37 Kon lipuí tatua oyuíon im bobay inta aing kinota'auan totok in intau moaíntoí kon sia tua binaradosadon totok. Naonda ing kinota'auan im bobay tatua kong ki Yesus in yogot monga'an kom baḷoi intau im Parisi tatua, daí namangoi in sia kom baḷoi tatua takin kodia-dia im botoḷ inta mogagah totok inta kobonu-bonu in ḷana mobondu.
38 Ko'omba-ombaḷ sia namangoi sinimindog kon diug in si'oḷ i Yesus, sahingga si'oḷ i Yesus nobuntad in ḷuaínya. Ta'e kon dodaipa doman tatua si'oḷ i Yesus iningkagannya im bu'oknya tontanií, bodongka inayokkannya in si'oḷ i Yesus bo binutakkannya in ḷana nobondu inta kodia-dianya tatua.
39 Naonda in inontong intau im Parisi inta nogoinií ko'i Yesus nonga'an, sia nosingog kom bonu ing ginanya, "Aka Sia na'a bo totu-totu'u nabi, yo tantuí kota'auan-Nyabií doman kom bobay tatua intaubií inta totok im binaradosa!"
40 Daí ki Yesus noguman nana'a kon intau im Parisi tatua, "Simon, oyuíon im poguman-Ku ko'inimu." Daí kai Simon doman, "O'o, gumandon Pak Guru."
41 Daí kai Yesus doman, "Oyuíon intau doyowa, taya dua tua in tumpaḷa koboli kon intau inta mopopoḷuan in doit. Intau tobatuí koboli kon lima nogatut doit perak. Inta tobatuí doman koboli kon lima nopuḷuh in doit perak.
42 Lantaran taya dua tua diaídon mokopobui kon doit tatua, daí pinopatandon in intau tatua im boli nayadua tua. Aka natua yo liboíon-Ku ko'i monimu, ki ine ing kon sigad nayadua tua im motabi-tabi kon intau inta nopoḷuan in doit tatua?"
43 Daí kai'n tubag doman i Simon, "Tantuí intau inta mobayong im bolinya!" Kai Yesus, "Totu'u in tubagmu nion."
44 Onda intua ki Yesus nobobui kom bobay tatua bo noguman ko'i Simon nana'a, "Inontongmu im bobay tana'a degaí? Aku'oi im moguman ko'inimu: Aku'oi namangoi im baḷoimu, ta'e diaí inogoianmu in tubig pondaritan-Ku kon si'oḷ, ta'e bobay tana'a ain nondarit kon si'oḷ-Ku takin ḷuaínya, onda intua iningkagannya bui im bu'oknya tontanií.
45 Ikow in diaíbií notomu nongayok ko'i-Nakoí, ta'e bobay tana'a in diaíbií mogoga-gogai im mongayok kon si'oḷ-Ku pokoaíngoi-Kupa in na'a.
46 Diaíbií pinakeíanmu in minya in uḷu-Ku, ta'e bobay tana'a aindon nopoḷana in ḷana nobondu kon si'oḷ-Ku.
47 Poguman-Kudon ko'inimu, tabinya inta moḷoben tatua moponyata kon taḷaínya inta noaíntoí aindon inampungan. Intau inta tongaí inampungan topilik in taḷaínya, tabinya in tongaí doman topilik."
48 Onda intua ki Yesus noguman kom bobay tatua, "Taḷaímu mita aindon inampungan."
49 Intau mita inta nonga'an noyotakin-Nya, norai kom bonu ing gina monia nana'a, "Degaí ki inebií in intau tana'a sim mota'aubií mongmpung kon taḷaí mita?"
50 Ki Yesus bui noguman kom bobay tatua, nana'a, "Pirisayamu ain nokosaḷamat ko'inimu, bayakdon ikow takin saḷamat!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA