¹ Bian Yesus ki zep etan ahakore zisi dam tasibirki– tuju-pulu enkam, ki zep gubiridaka– dan-dan dan-dankam de e-e san Zenaka ngeirblindan hap, Zena men desan amjanbiridan hap kalang gwekake.
² Ki zep ola gulk sun blaonzimki, “Nga yala awe de obwagana mes mamkam bil gwera, hwena men zen de taran hap dena dan en tangan. In zep Nga Bi naka em abe ta gwen– Zen deka zisi ngana awe de syal ta gwen hap lup gul sone gweka.
³ Dekam sek gwek. Emki eenlala gwen: Ëe domba makare soson srem nakae emsa lup gul soneꞌan– gwe tihi jal-jal ngirin sin dep.
⁴ Dompetna bahem biti tan. Honna hen bahem wewek tan. Sepatuna ala son enna kim em sek gwen. Aha maena bahem kap tan. Men zao debe emsa teisya soneꞌan, bahem oranak yausuk song gwen– aha zi maesa de zertowenkamye.
⁵ “Men zao gola liꞌinka, nonol em en kinin, ‘Dawem. Em Alap mo taha terenake lowe heꞌan.’
⁶ Zao de Alap osan dep de hohle gwen nik gweꞌanka, ki eiwa zao esa Alap mo taha terenak dawemkam lowehe gwer. Kire nik de gwen sremkam, ki emki enbirida gukhan, ‘Ëe mensa nonol emsa enbiridanan, Alap mo taha terenak de sap lowehen hap dena, ki awe molya ki lwak.’
⁷ Men zao gola linni, zao en em en. Tembanena mensa ep golzimdinni, desa en emki olgwenblandan. Sap tembanena in, zen eno nik mo tawa tabin hip de tembane. Ëna iwe de nama ennak, dekon bahem etan aha zi mo gol dawem san dep al ehan.
⁸ Em de enak aptankam, dekon de emsa dawemkam teisya irinni, mensa ep tembanena taiblin gilzimdinni, emki olgwenblandan.
⁹ Hen zewe de zi sang-sang egwenna, emki dawem labin. Deban hen emki anakan aisil eibiridan, ‘Alap angkam man kon gwesik hanaꞌara– teipsinkim de nesa irik ginkimye.’
¹⁰ Hwena aha enak de aptanna, zao de zi de emsa baes gwizimdinni, ora bol san em wet oson, dekon em enbirida gukhan,
¹¹ ‘Eno mae mo ena awe de sonna men zen ano nik mo tana ulpnuk makan gwer, ee ama desa etan taik-tik oso guk halan– em dikim anakan tame gun hup, “Alap angkam man sap kon gwesik hanaꞌara– teipsinkim de nesa irik ginkimye. Hwena em ema desan de ang tan hap baes taꞌan!”’”
¹² Yesus ki zep waulsuzimki, “Ëe ama emsa gubiridaꞌan: Aumwa hap de zisi klis gunnuk, Alap ena insa anakan sa enlala gweblala, ‘Zen orep de ena Sodomk de zisi ekarek gwenkam man kwei-kwik nuk.’ Zep men kirekam Alap orep Sodomk de zisi zere mae mo karek-karek hap heip gulku, hwena ano lup gul sonen zini emsa de lup gul irin srem zini, desa aumwa hap de klis gunnuk serkam tangan sa karek tabiri.”
¹³ “Ëna Korazim hen Betsaidak de zi, em engalap gwen, sap Alap sa emsa serkam karek tabiri. Ë darena Tirus hen Sidonk de zini insa Bian orep heip gulku, zen maka ehalek– owas-owassa de hlaul gwenkamye, an kire owaꞌae eno mae mo ngirinnik syal gwe-gwibiꞌinye. Tirus hen Sidonk de zini maka bunsu de awabin niban kaen karonsa darak dak– dekam de zenaka anakan goletren hap, ‘Ëe ama ehaleꞌan.’
¹⁴ Hwena angkam de e darena, Korazim hen Betsaidak de zini, em an bejen em ehalen! Zen in zep, Alap de aumwa hap zisi klis gunkum, eno mae mo angna sa tangan serkam karek tabiri. Hwena ena Sidon hen Tirusk de zi mo angna, desa de etan karek tabin hip dena sa jahalha gwer, sap zebe mae hap hom Alap golzimki– dekam de ano owas-owas syal gwibinsi hlaul gwen hap denaye.
¹⁵ Kapernaumk de zini, em hen kirekam. Em ema ekil giꞌin, ‘Sap Yesus owas-owasna beyakam neno mae mo enak syal gwe-gwibirida, zep nesa sa Alap ngatan zi mo lang san dep dawemkam kang gul sera.’ Bejen. Emsa hen syauk blanak sa yal gul sera, sap em home Asa laibliblaꞌan.”
¹⁶ Ki zep zere hon de ang ta gwen wenyaka gubiridaka, “Zini men zen emsa salbiridanna, zen hen dekam Asa nasalblaꞌan. Zini men zen emsa baes gwibiridanna, zen hen dekam Asa baes neblaꞌan. Hen zini men zen Asa baes gweblanna, zen hen Bian Alap, men Zen Asa zer sone zaka, Desa hen baes neblaꞌan.”
¹⁷ Tuju-pulukam insa zini lup gul soneka isrip-sri tangan naban lwanda halzak, ki zep Yesussu nenblazak, “Bian, sap dowal-dowal maena, eno bosekame olealsa sone gwibik!”
¹⁸ Ki zep ding gulzimki, “Em kime kirekam syal taꞌak, Ëe ama dowal mo kigisa hla tak. Alap desa man kama san dep hiri ta ineka, dekam zep ngli ang tasik kinin makan zan zaka.
¹⁹ Emki esane gwen! Ëe mese ebe mae hap sosonna golzimk– em dikim wanyasa zaubin hip hen dare-eksa. Ëe hen mese ebe mae hap sosonna golzimk– em dikim neno mae mo jal zini dowal mo kigisa zauk gublu kinin hap. Zep angkam bana hom– emsa de zen karek tabin hip denaye.
²⁰ Hwena bahem anakan eisrip-sri gwen, ‘Dowal-dowala man asa betek neibiridaꞌan.’ Diki mae hap em eisrip-sri gwen: Eno mae mo bosem-sena mes ngatan zi mo langnak ale nuk.”
²¹ Dekam zep Alap mo Enhona Yesussu isrip-srikam ing gwe heblaka, ki zep Alapsa gu soneblaka, “Bian, Em in Zen ngli naban okama naban irik soꞌarake. Ëe ama ep dawemsa golblaꞌan, sap Em ema ere mo irik ginsi de tame gun hup dena enlala blal wenya kip hen sekola sul sonen wenya kip aning gul gwizimꞌira. Hwena sekola srem wenya kip hen enlala betek wenya kip ema goltrei gwizimꞌira. In eiwa, Bian, zen kire tangankam ere mo dwam gwibin sin ki lwaꞌan.”
²² Bian Yesus Zen hen dekam dua-blaskam de zini anakan tawa tabirki, “Tingare okamasa de bi gwibin hip de sosonna mes kitak Bian abe hap golblaka. Zini toton bejen Tane zem Asa tame tan. Zen diki ere mo Bian en Asa tame ta gweꞌara. Hen ano Biansa nara dep? – tame tan naye. Zen diki A ene tame ta gweꞌan. Hen zini men zebe mae habe dekam de ano Biansa tame tan hap dena gol gwizimꞌin, zen zen en angkam tame da gweꞌan.”
²³ Aha yaklakam kim zi beya naban golelowe heꞌanka, dekam zep dua-blas enkam de zini lero gwibiridaka, ki zep desa en gubiridaka, “Em heꞌho gwibinnike lowehe gweꞌan, sap em ema ano syala ansa hla kul gwenan.
²⁴ Ëe ama emsa gubiridaꞌan: Abare sremnak Alap mo olsa de ayang gul gwizimdin hip de zini hen orep de teipsin-teipsin wenya beya nik sap hlaun hup edwam gwe-gwek– em an desae hla kul gweꞌanye. Hwena zen hom tol hla nul gwek. Zen man sap esane gwen hap edwam gwe-gwek– em an desae esane gwe-gweꞌanye. Hwena zen hom tol esane gwe-gwek. Zep em heꞌho gwibinnike lowehe gweꞌan.”
²⁵ Musa mo titi tabin olsa de tawa ta gwibin zini ki zep Yesussu de akasiblin hap hata zaka, ki zep takensiblika, “Bian, ee basa asa syal gwibir? – ee dikim hendep de gwen hap denaka gul irin hipye.”
²⁶ Yesus ki zep hwena takensiblika, “Mensa Musa zere mo titi tabin olak ale gulku, em banakarekame desa dam gulsuꞌura?”
²⁷ Zini in ki zep ding gulbluka, “‘Bian Alapsa em ensa lwa gweblan– tingare enho naban, enlala naban, soson naban, hen tim niban.’ Ahana hen, ‘Zi bose omka em kwasang gwibirida gwen– san de enaka de kwasang gweblanna kiye.’”
²⁸ Yesus ki zep ding gulbluka, “In eiwakame ding guluda. Zen kire enkam syal gwe-gwe, dekam esa hendep denaban gwe gwera.”
²⁹ Hwena zini in man dwam gweꞌanka– dekam de aha zi gublun hap, “Zini in eiwa airis.” In zep etan Yesussu takensiblika, “Ki ano wal bose walya endanna– ee de desa en ensa lwabirida gwen hapye?”
³⁰ Yesus dekam zep desa de goltreblan hap ola gulk sun blaonblaka, “Yahudi walya man Yerusalem kon Yeriko san dep tineꞌanka, hwena oranak zep te-ala hap de easas-asas gwe-gwen zi karek dak. Kire-kirena man kitak alal dablak– hendep pakean mae naban, zao zep dangolek, hendep sap-sap naka zep ze hli dak.
³¹ Hwena ki zep hen Alap mo golak de syal gwe-gwen zini orana in san tamanꞌan zaka. Zao zep zini insa hla ta zaka, hwena alp san le tabla ine kinika.
³² Etan ahana zini orana in desan song gweꞌan zaka– Lewi Bak mo ausu nakorena. Zi ausuna in sap hen Alap mo golak de syalak mas ta gwenan, hwena kim zini insa hla ta zaka, ki zep hen alp san le tabla ine kinika.
³³ Hwena Samaria walya ki zep hen desan tamanꞌan zaka. Zen sap Yahudi walsya hom, hwena kim ze zini insa hla taꞌan zaka, mam tangankam kwasang gweblaka.
³⁴ Ki zep golek de ta zaka, wei-weina anggur hokam ngan tasibir-blin daka, hen minyakkam dra tan daka. Ki zep tahalebir-blika. Dekam zep zere mo keledainak drene seka, ki zep te-alakam de bohe ta gwen ni tan gol san dep zersong gweka– zewe de etan mas gweblan hap.
³⁵ Kaꞌankam zep gol bina in hap te-alana seratus ribu enkam golblaka, hen deban gubluka, ‘An dekam mas gwebla. Hen an de sowehen sremkam, ee asa lwahal zankam ep mas gulblul.’”
³⁶ Yesus ki zep Musa mo olsa de tawa ta gwibin zini insa takensiblika, “Eno dam gulsunkum, zi dan-aharena in kon, nara wal bose zem makan enna lwablaka– zini in zen oranak karekna goltowekaye?”
³⁷ Ki zep ding gulbluka, “Zini in zen kwasang tola ban mas gweblaka, zen zen.” Yesus ki zep ding gulbluka, “In eiwa. Zep em hen kirekam syal gwe-gwe.”
³⁸ Yesus dekon kim zere hon de ang ta gwen wenya ban golesek gweka, enak zep yaing gwek. Zao wenya bosena Marta oso zem Maria han Yesussu zere nik mo gola kon eirink. Maria zen Yesus mo alp nakon nikinꞌik– dekon de zeno tawa tabinsi sane gwen hap.
³⁹ (10:38)
⁴⁰ Hwena aya zem Marta man tangan syala taha-taha gwibiꞌik– tembane maesa de syal gwibir-zimdinkim. Ki zep Yesussu gubluzak, “Bian, em ba habe ze Mariasa kara guꞌura? Ëe an zebe a-en hwena syala taha-taha gwibiꞌin. Em gubin– asa deka mas gwibirzik.”
⁴¹ Bian ki zep ding gulbirki, “Marta, Marta, em ema enlalana men-san an-sankam beya gweꞌara.
⁴² Hwena sap dwam gwibin tanganna aha-en. Maria mes zen dawem wenyaka iti-ti gilsil, zep Ëe molye gubik– desa de hli yun hupye.”