¹ Yesus in kim Yordan kon lwahal zaka, Alap mo Enhona dekam mes bi gweblaka. Dekam zep zi srem lang san dep zersong gweka.
² Zewe zep dowal mo kigina akasik gwebla zaka– hendep orapna man empat-pulu gwek. In kim ze gwe gweka, Zen tembanesa lwa gweka. Hendep aumwa hap denak usakna mes sabak gweka.
³ Zao zep dowal mo kigina in gublu zaka, “Em san Alap mo Tanesa hom? – zebe usak naban gweꞌaraye. Kasona ansa emki gubin– roti hap de jowen hap.”
⁴ Yesus ki zep hwena ding gulbluka, “Alap mo olak man lwak, ‘Zini tembane en nakon hom lowehe gwenan.’”
⁵ Dowal mo kigina in ki zep kon kwatap yawal san dep zersong gweka, ki zep tingare auhu-kamanak de irik ginni ansa hluwesik kinzinnak goltreblaka.
⁶ Ki zep gubluka, “Alap mes tingare irik ginni insa abe hap golblaka, hen zewe de kire-kire dawemna hendep kitak– ee de hwena ahana kip golblan hap, mensa Aena enlala gweblaꞌakye. Hwena eme bokle kom soblan naban asa boltere taꞌanka, ki ebe hap asa kitak golblal.”
⁷ (4:6)
⁸ Yesus ki zep ding gulbluka, “Alap mo olak man lwak, ‘Bian Alap ensa em boklena kom so gweblan, hen Desa en em blikip gwesik gweblan.’”
⁹ Hwena ki zep kon etan owaskam Yerusalem san zersong gweka, Alap mo gol bolak zep drene seka. Ki zep ze gubluka, “Em san Alap mo Tanesa hom? – ki emki heya gwe inen.
¹⁰ Sap Alap mo olak ebe hap dena anakan lwak, ‘Alap zere mo dam taha nakore wenyaka sa emsa de dawem enkam kara ta gwen hap gubiridala.
¹¹ Zeno mae mo taha tere san esa tenda gwera, zep em molye ba karek maena goltoweka.’ Zep em san ema Alap mo ola insa taiblibiꞌira? Ki emki heya gwe inen.”
¹² Yesus ki zep ding gulbluka, “Alap mo olak man hen ale nuk, ‘Bian Alapsa totoresa bahem anakare hap akasiblin, “Wehe asa mas gweblaꞌanka?”’”
¹³ Dowal mo kigina in kim akasik gweblanna hya gwesiblika, ki zep ze hli taka, hwena dekam zep etan de akasiblin hap eissiblika.
¹⁴ Yesus ki zep langna Galilea san dep lwa halka, hen Alap mo Enho nakore sosonna Zebon lwa gwek, hendep ki zep zebe hap de ola tingare e-e san etawa gwendak.
¹⁵ Zen dekam zep but srem gol-gol san tawa tabirida gweka. Tingare zini man nen gweblak, “Zini in dawem tanganna.”
¹⁶ Yesus ki zep etan Nazaret san dep lwa halka– men zewe Zena mam gwekake. Hari Sabatkam ki zep but srem gol san dep song gweka– men kirekam Zena gwe gwekake. Ki zep ze Desa dam dasik– Zen de ngein nikon Alap mo olsa baca gulzimdin hip.
¹⁷ Alap mo ol ayang gul gwen zini Yesaya Bak mo ol tataksa zep nolblak, ki zep er gulsuku, hendep hlaulku– men desa baca gulzimdin hip dwam gwibirkike. Ki zep hendep anakan baca gulzimki,
¹⁸ “Bian mo Enhona man asa bi gweblaka, sap Zen mes asa dam tasiki– ol dawemsa de tahalha wenya kip gol gwizimdin hip, hen bwinak de wenyaka dikim anakan tonbirida gwen hap, ‘Bian sa emsa gwis gwe sonera,’ hen zi nwe dimin dikim nwe nik ekara gwen hap, jap gul sonen wenyik dikim luk tan hap,
¹⁹ hen ol dawemna ansa dikim anakan tonbirida gwen hap, ‘Angkam mes hatanan– Bian de nesa dawem gun hup denaye.’”
²⁰ Yesus ki zep etan bukuna insa obon gul kinika, ki zep etan, men zen zewe syal gwe-gweka, zebe hap golblaka. Zena ki zep nikin aneka. Dekam tingare zini nwena Zebon en lwazimꞌinka– dekam de dawem enkam zeno tawa tabinni insa esane gwen hap.
²¹ Zen dekam zep gubiridaka, “Alap mo ola insa esane gwenan mes ki abe hap dakastilblinan.”
²² Zen man zenaka don sonebirida gweꞌak, “O zeno ola dawem tanganna, hen zini in dawem tanganna.” Dekam zep tenggwanblan hap eguk, “O san ha man zenaka kil tiꞌara, ‘Ëe an Alap mo dam tasin zi?’ An Yusup mo tane sake!”
²³ Hwena Yesus mes zeno mae mo enlalana tame tazimki, ki zep gubiridaka, “Ëe tawana: Ëpba gulk sun de ol blaoranna em anakan esa Asa enblal, ‘Eme eiwa dokter gweꞌanam, ere mo timni emaka dawem guꞌura.’ Zep esa Asa anakan jakal eblal, ‘Ëe an ere mo tim makan am lowe heꞌan. Bahem asa da tasibin.’ Zep anakan esa Asa en gweblal, ‘Ëe ama esak– em Kapernaumk owas-owassae syal gwe-gwibir-zimki. Aha zi mo lang ennak bahem kirekam syal gwe-gwibin. Diki ere mo ena awe em hen ap syal gwe-gwibir-zimdin.’
²⁴ Hwena Ëe eiwa denakae emsa gubiridaꞌan: Zini hom zere kore wal de Alap mo olsa ayang gul gwizimdin hip de zini nasal gweblanan. Zep em molye Asa asal gweblak.
²⁵ Emki esan: Alap mo ol ayang gul gwen zini Elia Bak hen kirekam gweka. Zen kim gwe gweka, ona hom il ti gweka– holona tahunna dan-ahan, ahana ngirin ngam sonnak zauk. Tingare Israel mo langna dekam sasan gwek, dekam zep mamkam eusak gwek. Dekam we wal sem-semna beya tangan nik Israelk awe etahalha gwek.
²⁶ Hwena Alap hom Eliasa zer soneka– awe de aha we sem maesa de mas gwibin hip. Hwena aha zi mo langnak Sarfat de we sem san dep zer soneka– Sidon mo langnak.
²⁷ Hen kirekam– Alap mo ol ayang gul gwen zini Elisa Bak kim gwekaye. Dekam Israelk awe de zini beya nik sop sang-sang karek naban nollwa gwek, hwena hom aha-en mae dawem taka. Hwena aha zi ausu nakore wal ensa dawem taka– Siria walya Naaman Bak ensa.”
²⁸ Kim anakan zeno ola kon dam nulsuk, “Zen molya nebe mae hap owasna syal gwibir-zimki,” dekam zep but srem golak de zini in serkam jal neblak.
²⁹ Dekam zep luk tak, ki zep hendep Yesussu ena in kon irik ta hankam nerwet sok. Ëna in kwatapnak, in zep li san de ak tasik irin hip irik da haꞌak.
³⁰ Hwena Yesus ki zep zeno mae mo ngirin kles san song gweka.
³¹ Ki zep Yesus tineka Galilea mo langnak de ena Kapernaum sun dep. Hari Sabatkam zao zep tawa tabirki.
³² In desa tawa tabiꞌinka, man tangan denggwanblaꞌak. Sap zeno ola soson tanganna– san de teipsin zi mo tawa tabinni kiye.
³³ But srem golak iwe zini hen ki gweꞌanka– dowal mo bi gweblanna. Zen ki zep mam enkam herhe hanaka,
³⁴ “Weo, Nazaret walya Yesus! Em aban mae ba olsa de etoran hap? Em san asa de tameran habe hata zala? Ëe mese emsa tame tal! Em in Alap mo zer sonen Zi Lalakna.”
³⁵ Yesus ki zep zebon de dowala insa jala ban gubluka, “Balkkam! Zini in kon em wet son!” Dowala in dekam zep zini insa zeno mae mo ngirinnik zerheir guk halka. Hendep sang-sang maena hom hli yulbluka.
³⁶ Tingare zini serkam tangan denggwanblak, dekam zep zenaka donbirida nasenꞌak, “Ha! Zeno ola wehasa hom– soson tanganna, san de teipsin zi mo ola kiye! Zeno dowal-dowalsa de golealsa sonenna, hendep dekam de wet so gwenkam!”
³⁷ Hendep dekam zep nabakam Yesus hup de ola tingare zewe de langna in san nol haladak.
³⁸ Yesus kim but srem gola in kon wet soka, ki zep Simon mo golak golebiti gweka. Simon mo we marena man serkam ewek, zep Yesussu dawem gun hup abe dak.
³⁹ Tum alp nakon zep zauꞌun zaka, dekon zep ewenna insa gubirki, “Wenya ansa em hli yun.” Ewenna in dekam zep tapbla guk– Simon mo marena insa. Dekam zep hendep luwek, hen tembanekam mas gwibiridak.
⁴⁰ Hwena yaklana kim dum gwe heka, dekam zep Yesus hon dep kitak men zen kirekam-kirekam sang-sang naban nolgwek desa noleyaing gwezak. Yesus ki zep tahasa de tehabirida ane gwenkam kitak dawem tabirki.
⁴¹ Hen dowal-dowala dekam zep zini in kon anakare herhen naban wet so gwe-gweꞌak, “Em in Alap mo Tane!” Hwena Yesus ki zep jala ban jalse gwibiridaka, ki zep ze hendep ol srem tabirki. Sap zen mes tame dak, “An Zen– Alap mo dam tasin Zi niye, zisi de ngaya tabin hip Denaye.”
⁴² Yaklana kim hata seꞌan zaka, Yesus ki zep ena insa hli taka, dekam zep zi srem san dep song gweka. Kim nohwensiblik, dekam zep hendep deblak, hendep ki zep hla dak. Zao zep desa de hli yuludan srem hap nertonk.
⁴³ Ki zep hwena ding gulzimki, “Alap Zen de tingan irik gilzin hap de ol dawemna an, zen tingare e-e san de tawa tabirida gwen hap dena. Asa Zen kire hap zer soneka.”
⁴⁴ Yesus dekam zep hwena tingare Yahudi mo langnak de but srem gol-gol san tawa tabir song gweka.