Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas wari si pewaluhken, kenca lakon penangkuhen e nggo dung, Musa ndilo Harun ras anak-anakna bage pe peminpin-peminpin Israel.
2 Nina man Harun, "Buatlah sada jenggi lembu nguda ras sada bajar biri-biri si la lit sitik pe man pandangen, persembahken e man TUHAN. Lembu e gunana man persembahen kerna dosa, janah biri-biri e man persembahen tutungen.
3 Kenca bage kataken man bangsa Israel gelah maba sada bajar kambing man persembahen kerna dosa; sada lembu umur sada tahun, ras sada biri-biri umur sada tahun si la lit sitik pe man pandangen, man persembahen tutungen,
4 janah sada jenggi lembu ras sada bajar biri-biri, man persembahen persadan. Bangsa e arus mpersembahken si enda kerina man TUHAN radu ras persembahen pangan si icampur ras minak. Arus ilakokenna enda erkiteken TUHAN ncidahken BaNa i bas wari e man bangsa enda."
5 Emaka ibaba kalak enda ku lebe-lebe Kemah Perjumpan kerina si iperentahken Musa, janah kerina bangsa e pulung i je nembah man TUHAN.
6 Nina Musa, "TUHAN nggo merentahken kam guna ngelakoken si enda kerina, gelah banci idahndu terang sinalsal KemulianNa."
7 Jenari nina man Harun, "To ku batar-batar persembahen ah, persembahken persembahen kerna dosa ras persembahen tutungen guna nasapken dosandu ras dosa bangsa e. Persembahken lah persembahen enda guna nasapken dosa-dosa bangsa e, sue ras si iperentahken TUHAN."
8 Emaka lawes Harun ku batar-batar persembahen e, igelehna jenggi lembu nguda e si ikhususken jadi persembahen kerna dosana jine.
9 Anak-anakna mereken dareh lembu e man bana, emaka icebukkenna jari-jarina ku bas darah e, jenari itamakenna sitik ku tanduk batar-batar, janah si lebihna iamburkenna ku teruh batar-batar persembahen.
10 Kenca bage itutungna i babo batar-batar persembahen tabeh-tabehna, piahna, bagin atena si mehulina, sue ras si nggo iperentahken TUHAN man Musa.
11 Tapi daging ras kuling-kulingna itutungna i darat ingan erkemah e.
12 Jenari maka igelehna ka asuh-asuhen si jadi persembahen tutungen guna dirina jine. Anak-anakna mereken dareh asuh-asuhen e man bana, jenari icurcurkenna ku empatna dingding batar-batar persembahen e.
13 Ibereken anak-anakna ka takal asuh-asuhen ndai ras bagin-bagin si debanna, emaka itutung Harun e kerina i babo batar-batar persembahen.
14 Kenca bage iburihina isi beltek asuh-asuhen e, nahena si arah pudi, emaka itutung i babo batar-batar i babo kerina persembahen tutungen si deban.
15 Kenca bage maka ipersembahkenna persembahen bangsa e. Ibuatna kambing si man persembahenken guna pengalemi dosa kalak enda, igelehna, emaka ipersembahkenna, bali ras si nggo ibahanna nandangi persembahen kerna dosa-dosana jine.
16 Ibabana ka pe asuh-asuhen guna persembahen tutungen e. Ipersembahkenna e rikutken peraturenna.
17 Ipersembahkenna persembahen pangan e jenari ibuatna tepung e sempukul, emaka itutungna i babo batar-batar persembahen. (Persembahen enda eme selaku tambahen persembahen tutungen si tep-tep wari.)
18 Igelehna jenggi lembu ras bajar biri-biri e jadi persembahen persadan bangsa e. Anak-anakna mereken dareh asuh-asuhen e man bana, emaka icurcurkenna ku empatna dingding batar persembahen e.
19 Bagin-bagin si lit tabeh-tabehna i bas lembu ras biri-biri e iamparken Harun
20 i babo tenten asuh-asuhen e, emaka ibabana kerina ku batar-batar. Itutungna tabeh-tabeh e i babo batar-batar,
21 emaka iendeskenna tenten ras nahe pudi si kemuhen asuh-asuhen e jadi pemere si khusus man TUHAN guna imam-imam bagi si nggo iperentahken Musa.
22 Kenca nggo dung kerina ipersembahken Harun persembahen-persembahen e, iangkatna tanna i babo bangsa e, ipasu-pasuna. Emaka nusur ia.
23 Musa ras Harun bengket ku bas Kemah Perjumpan. Sanga kalak enda ndarat i bas nari, ipasu-pasuna bangsa e, janah terang sinalsal kemulian TUHAN teridah man kerina bangsa e.
24 Rempet ipesusur TUHAN api, janah ipan api e persembahen tutungen ndai ras kerina bagin-bagin tabeh-tabeh si lit i das batar-batar e. Kenca idah kalak enda kejadin e ersurak-surak ia, jenari erjimpuh ia, ayona seh ku taneh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA