Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siallo ri le’ba’namo anjo upacara pallantikanga, iamintu ri allo makasagantujua, nakio’mi Musa anjo Harun siagang sikamma ana’na kammayatompa sikontu pamimpinna tu Israel.
2 Nakanamo Musa mae ri Harun, "Angngalleko sikayu sapi laki rungka siagang sikayu gimbala’ laki, rua-ruana tena ngaseng callanna. Passareangi anjo ruaya olo’-olo’ mae ri Batara; anjo sapi lakia untu’ koro’bang pammopporang dosa, nampa anjo gimbala’ lakia untu’ koro’bang nitunu.
3 Nampa suroi bansa Israel assare sikayu bembe laki untu’ koro’bang pammopporang dosa siagang sikayu ana’ sapi kammayatompa sikayu ana’ gimbala’, massing-massing umuru’ sitaung siagang tenaya callanna untu’ koro’bang nitunu.
4 Suroi ke’nanga assare todong sikayu sapi laki siagang sikayu bembe laki untu’ koro’bang passiamakkang. Yangasenna anjo musti napassareangi ke’nanga mae ri Batara siagang koro’bang nipatala nisarea minynya’, lanri anne alloa laniaki Batara battu mae ri ke’nanga."
5 Sikontu anjo napappasangnganga Musa naerang ngasemmi ke’nanga mange ri dallekanna Kemaya, nampa sikontu umma’ Israel a’rappungammi anjoreng untu’ anggaukangi ibadaya mae ri Batara.
6 Nampa nakanamo Musa, "Nasuro ngasengko Batara anggaukangi anne kammaya sollanna akkulle nucini’ caya kahaderanNa Batara."
7 Le’baki anjo nakanamo ri Harun, "A’lampako mange ri tampa’ pakkoro’bangnganga siagang pasadiai koro’bang pammopporang dosaya kammayatompa koro’bang nitunua, sollanna Napammopporang Batara dosanu siagang dosana ummaka. Gaukangi anjo kammaya situru’ Naparentakanga Batara."
8 Jari a’lampami Harun mange ri tampa’ pakkoro’bangnganga nampa ammolong sapi laki lanakoro’bangkanga untu’ nipammopporanna dosa batangkalenna.
9 Ana’-ana’na Harun ampabattui cera’na anjo sapia mae ri Harun, nampa ia anjallakkangi karemenna antama’ ri anjo ceraka, siagang ampasapui anjo ceraka mae ri tanru’-tanru’ niaka ri appaka panyingkulu’na anjo tampa’ pakkoro’bangnganga. Le’baki anjo, la’binna ceraka napatiriki antama’ ri dapara’na tampa’ pakkoro’bangnganga.
10 Jannana, lempanna siagang bageang kaminang bajika battu ri dagenna anjo sapia natunui irate ri tampa’ pakkoro’bangnganga, situru’ Naparentakanga Batara mae ri Musa.
11 Mingka dagenna siagang kukkulu’na anjo sapia natunui ri pantaranna pakkemaanga.
12 Nampa anynyamballe Harun olo’-olo’ untu’ koro’bang nitunu untu’ batangkalenna. Ana’-ana’na Harun angngerangi cera’na anjo olo’-oloka mae ri ia, nampa napatiri’ mae ri appaka sa’rinna anjo tampa’ pakkoro’bangnganga.
13 Le’baki anjo napassareammi ke’nanga mae ri ia ulunna anjo olo’-oloka siagang bageang maraenna, nampa natunu irate ri tampa’ pakkoro’bangnganga.
14 Nampa nabissai bone parru’na siagang bongganna anjo olo’-oloka nampa natunu siagang koro’bang nitunua irate ri tampa’ pakkoro’bangnganga.
15 Le’baki anjo assaremi bembe untu’ koro’bang pammopporang dosana ummaka. Anjo bembea nasamballei siagang napassareangi sangkamma nagaukanga untu’ koro’bang pammopporang dosa batang kalenna.
16 Nampa pole angngalle todong olo’-olo’ untu’ koro’bang nitunu, na napassareang situru’ paratoranga.
17 Le’baki anjo napassareammi koro’bang nipatalaya; angngallei labu’ sikangkang, nampa natunu irate ri tampa’ pakkoro’bangnganga. Iaminjo tambanna koro’bang nitunu allo-alloa.
18 Nampa ammolong todong sikayu sapi laki siagang sikayu gimbala’ laki untu’ koro’bang passiamakkang mae ri ummaka. Ana’-ana’na Harun angngerangi cera’na anjo olo’-oloka mae ri ia, nampa napatiri’ mae ri appaka sa’rinna anjo tampa’ pakkoro’bangnganga.
19 Bageang niaka jannana battu ri anjo sapia siagang bembea napadongkoki ke’nanga
20 irate ri barambanna anjo ruaya olo’-olo’, nampa natunu Harun irate ri tampa’ pakkoro’bangnganga.
21 Barambanna siagang bongga kananna anjo olo’-oloka nipassareangi salaku passare nipappicinikang mae ri Batara. Iaminjo bageanna sikamma imanga, situru’ apa naparentakanga Musa.
22 Le’baki napassareang ngaseng anjo koro’banga, naangka’mi limanna Harun irateanna umma’ Israel na nabarakkaki ke’nanga, nampa naung.
23 Nampa antama’ Musa siagang Harun ri KemaNa Batara. Le’baki anjo assulu’mi ke’nanga nampa nabarakkaki ummaka. Nampa nacini’ sikontu umma’ Israel caya kahaderanNa Batara.
24 Ti’ring Napanaummi Batara pepeka nanakanre sa’genna la’busu’ koro’bang nitunua siagang bageang-bageang niaka jannana irate ri tampa’ pakkoro’bangnganga. Nacini’na umma’ Israel anjo kammaya, a’gora-gora rannumi ke’nanga nampa su’ju’ anynyomba.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA