Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngerana TUHAN man Musa i das Deleng Sinai merentahken ia

² mereken peraturen-peraturen enda man bangsa Israel. Adi nggo kam seh ku taneh si ibereken TUHAN, tep-tep tahun si pepituken arus maka ula isuani taneh e, guna mereken kehagan man TUHAN.

³ Enem tahun dekahna banci isuanindu jumandu.

⁴ Tapi tahun pepituken arus maka jadi tahun pengadi-ngadin man jumandu, tahun si iendesken man TUHAN. Ula suani jumandu, ula ranggasi pe kebun anggurndu.

⁵ Ula perani si turah-turah bana, ula perani buah anggur si la iranggasi, erkiteken tahun e kap tahun pengadi-ngadin man taneh e.

⁶ Aminna gia taneh e la iusahai i bas tahun e, cukup nge nakandu iberekenna, bage pe nakan budakndu, kalak upahenndu, ntah pe kalak si deban si tading ras kam,

⁷ asuh-asuhenndu, ras rubia-rubia si meliar si lit i jumandu. Kerina si turah i juma si la iusahaindu banci ipan.

⁸ Kira pitu kali pitu tahun, eme empat pulu siwah tahun.

⁹ Emaka tanggal sepuluh bulan siwah eme Wari Penangtangen, suruh sekalak ngembus tanduk ermomo ku kerina negeri.

¹⁰ Alu bage iserapkenndu tahun pelima puluhken janah ermomo kerna kebebasen man kerina penduduk. I bas tahun e, kerina erta si nggo idayaken arus maka iulihken man empuna si gelgel, ntah man kesusurenna. Asa kai kalak si nggo idayaken jadi budak arus maka iulihken man keluargana.

¹¹ La banci kam merdang, ntah pe merani gandum si turah-turah bana, ntah pepulung buah anggur si la iranggasi.

¹² Sada tahun e arus maka jadi tahun si badia man bandu; ulih taneh si la iusahai ngenca si banci ipanndu.

¹³ I bas tahun e arus maka iulihken man empuna kerina taneh warisen si nggo idayaken.

¹⁴ Emaka adi ndayaken ntah nukur taneh kam sapih-sapih kalak Israel arus maka bujur-bujur perbahanenndu.

¹⁵ Ergana arus itetapken rikutken perkiran piga tahun nari taneh e banci mereken ulihna ngayak Tahun Penangtangen si rehna.

¹⁶ Adi tahunna melala denga ganjangen ergana, tapi adi piga-piga tahun nari ngenca murahen ergana, sabap si idayaken e ulih taneh e.

¹⁷ Ula tipu temanndu kalak Israel tapi mbiar lah man TUHAN Dibatandu.

¹⁸ Patuhi undang-undang ras perentah TUHAN, maka selamat kam nggeluh i bas negeri e.

¹⁹ Taneh e mereken ulihna, emaka cukup nge man bandu kai atendu ipanndu, janah mejuah-juah kam nginganisa.

²⁰ Tapi banci jadi lit kalak nungkun, "Kai kin ipan i bas tahun pepituken e, adi la lit juma si erdangi dingen labo lit ulihna si iperani?"

²¹ Ipasu-pasu TUHAN taneh e i bas tahun peenemken, maka ulih taneh e bias man nakan dua tahun.

²² Sanga ierdangindu jumandu i bas tahun pewaluhken, ipanndu denga kai si iperanindu i bas tahun peenemken. Bias nakanndu, seh iperanindu ka kai si ierdangkenndu i bas tahun e.

²³ Labo kam empuna taneh e, emaka ula dayaken ngayak sun; sabap Dibata nge si tuhuna empuna, janah kam seri ras pertandang ibereken makesa.

²⁴ Adi taneh idayaken arus maka iakui hak empuna si tangtangna guna nebusisa.

²⁵ Adi lit kalak Israel mesera akapna, janah terpaksa idayakenna tanehna, keluargana si ndeherna lah nebusisa.

²⁶ Kalak si la lit kade-kadena nebusisa, banci jadi nggo bayak ia, janah cukup i bas ia jine guna nebusisa mulihken.

²⁷ Adi bage jadina, arus maka igalarina man kalak si nggo nukursa mbarenda, buena asa ganti rugi guna tahun-tahun si tading denga ngayak Tahun Penangtangen si rehna. Kenca bage banci ia mulihken ku tanehna e.

²⁸ Tapi adi la ngasup ia nebusisa, taneh e tetap ikuasai si nukursa ndube seh ngayak Tahun Penangtangen si rehna. I bas tahun e, taneh e iulihken man empuna ndube.

²⁹ Adi kalak ndayaken rumah i bas kota si ertembok, lit hakna nebusisa mulihken i bas sada tahun mulai rumah e idayaken.

³⁰ Tapi adi la itebusina i bas si sada tahun e, bene hakna nukursa mulihken, janah rumah e nggo tetap jadi hak sinukursa e ras kesusurenna. Amin seh pe Tahun Penangtangen, rumah e lanai bo mulih man empuna ndube.

³¹ Tapi rumah i kuta-kuta si la ertembok, e ipeseri ras juma-juma. Emaka banci itebusi empuna, janah mulihken bana i bas Tahun Penangtangen.

³² Amin ugapa pe, adi suku Lewi banci nebusi rumahna i bas tahun si apai pe adi rumahna e lit i bas kutana jine.

³³ Adi lit rumah i bas kota-kota Lewi idayaken kalak Lewi, amin pe labo itebusina mahan bana e mulih i bas Tahun Penangtangen, erkiteken rumah kalak Lewi si lit i bas kotana eme kap erta kalak Lewi si tetap i tengah-tengah bangsa Israel.

³⁴ Tapi taneh perjalangen sekelewet kota kalak Lewi la banci idayaken; e kalak enda empuna rasa lalap.

³⁵ Adi temanndu kalak Israel si tading ndeher ras kam jadi musil janah lanai ia ngasup muat keperlunna, sampati lah ia bagi kam nampati kalak upahenndu, maka banci ia tetap tading ndeher ras kam.

³⁶ Ula bahan erbunga man bana, tapi mbiarlah man Dibata, janah pelepas temanndu kalak Israel tading ndeher ras kam.

³⁷ Ula suruh ia nggalar bunga duit si ipinjamkenndu man bana, janah ula buat untungndu i bas pangan si idayakenndu man bana.

³⁸ Eme perentah TUHAN Dibatandu si maba kam ndarat i taneh Mesir nari maka IberekenNa bandu taneh Kanaan, gelah ia jadi Dibatandu.

³⁹ Adi temanndu kalak Israel si tading i deherndu jadi musil kal seh maka idayakenna bana man bandu jadi budakndu, la banci isuruhndu ia ndahiken dahin budak.

⁴⁰ Ia tading ras kam selaku kalak upahen dingen erdahin guna kam ngayak Tahun Penangtangen si rehna.

⁴¹ I bas tahun e ia ras anak-anakna banci nadingken kam mulihken ku keluargana, ku taneh nini-ninina.

⁴² Bangsa Israel budak TUHAN kap. TUHAN nggo maba ia i taneh Mesir nari, emaka la banci ia idayaken jadi budak.

⁴³ Ula kasar man bana, tapi mbiar lah man Dibatandu.

⁴⁴ Adi perlu kam budak, banci itukurndu i bas bangsa si deban i sekelewetndu. Banci pe itukurndu anak-anak bangsa si deban si tading i sekelewetndu.

⁴⁵ Banci pe itukurndu anak kalak pertandang si ringan i tengah-tengahndu. Anak-anak kalak si bage, si tubuh i bas negerindu banci jadi ertandu,

⁴⁶ banci pe jadi barang tading-tadingenndu, guna anak-anakndu, janah arus idahina dahin anakndu e kidekah geluhna. Tapi temanndu bangsa Israel la banci kasar perbahanndu man bana.

⁴⁷ Ntah mawen lit bangsa si deban si tading ras kam si nggo jadi bayak, sedang lit temanndu kalak Israel jadi musil; perban serana idayakenna bana selaku budak man bangsa si deban ndai ntah man keluarga bangsa si deban e.

⁴⁸ Kenca ia idayaken, lit denga hakna guna itebusi mulihken.

⁴⁹ Sekalak seninana ntah senina bapana, ntah senina sembuyak bapa ras ia, ntah kade-kade si deban si ndeher denga ras ia banci nebusi ia. Ntah pe adi nggo cukup duitna banci itebusina bana.

⁵⁰ Arus maka iarihkenna ras si nukur ia e. Arus ikira lit piga tahun nari mulai ia idayaken seh ngayak Tahun Penangtangen si reh. Erga tebusenna arus itentuken erpalasken upah kalak si ngemo.

⁵¹ Arus iulihkenna sada bagin i bas erga pendayanna gelgel e sue ras buena tahun-tahun si tading,

⁵² (Im 25:51)

⁵³ tempa-tempa ia isuruh jadi kalak upahen erpalasken upah tahunen. Tuanna la banci kasar man bana.

⁵⁴ Adi la ia itebusi rikutken cara si enda ndai, ia ras anakna arus maka ibebasken i bas Tahun Penangtangen si rehna.

⁵⁵ Sekalak kalak Israel la banci asa lalap jadi budak, sabap bangsa Israel eme kap budak TUHAN. IbabaNa ia ndarat i taneh Mesir nari. Ia kap TUHAN Dibatana.

Imamat

Video Imamat 25

Ikuti Kami:

KONTAK | PARTISIPASI | DONASI