Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E attas Gunong Sinay PANGERAN adhabu ka Mosa,
2 "Kabala kantha reya ka bangsa Isra’il: Mon ba’na la maso’ ka nagara se bi’ PANGERAN eparengngagi ka ba’na rowa, ba’na kodu ngormat PANGERAN kalaban cara se kantha reya: Sabban taon se kapeng petto’ ba’na ta’ olle agarap tana.
3 Nem taon abidda ba’na kodu namenne gal-teggalla, notto ka-bungkana anggur e kebbunna ban makompol hasella tanana.
4 Tape sabban taon se kapeng petto’ kodu atorragi ka PANGERAN malolo. Daddi saabidda sataon jareya tanana ta’ olle egarap. Gal-teggal ta’ olle etamenne ban ka-bungkana anggurra ta’ olle totto.
5 La’-mala’ gandum se tombu dibi’ otabana anggur e bungkana se ta’ etotto, ta’ olle polong otaba esempen sabab taon jareya taon istirahat monggu ka tana.
6 Sanajjan e taon jareya tanana ba’na ta’ egarap, tana jareya bakal madhatengnga hasel keya se daddiya kakanna ba’na, nor-dunorra, la-kabulana, ban reng-oreng manca se apolong ban ba’na.
7 Bariya keya kaangguy pakanna ebinna ba’na ban burun alas e nagarana ba’na. Sabarang se kalowar dhari tana jareya olle kakan."
8 "Etong pettong kale pettong taon, daddi kabbi pa’ polo sanga’ taon.
9 Saellana jareya, e tanggal sapolo bulan petto’, iya areya e are pangamponanna dusa, soro oreng nope calampong e man-dhimman e sabingkerra nagara.
10 Taon se kapeng saeket jareya kodu socceyagi. E taon jareya ba’na kodu ngomommagi kabebasan ka reng-oreng sanagarana. E taon jareya sabarang dhi’-andhi’na oreng se la ejuwal kodu epabali ka se andhi’ dha’-adha’ otaba ka na’ potona. Pa’-sapa’a se ejuwal epadaddi dunor kodu epabali ka balana.
11 Ja’ namenne teggalla. Gandum se tombu dibi’ ta’ olle eanye, ban buwana anggur e kebbunna se bungkana ta’ etotto ta’ olle epolong.
12 Taon jareya taon se socce monggu ka ba’na. Ba’na pera’ olle ngakan sabarang se tombu dibi’ e teggalla.
13 E dhalem taon jareya sakabbinna tana se la ejuwal kodu epabali ka orengnga se andhi’ dha’-adha’.
14 Daddi, mon ba’na ajuwal tana ka sasamana oreng Isra’il, otaba melle tana dhari oreng Isra’il, ja’ sampe’ ba’na ta’ jujur e dhalem ajuwal belli jareya.
15 Argana tana jareya kodu eteptebbagi menorot bannya’na taon saabidda tana jareya bisa madhateng hasel sampe’ ka taon e baktona tana jareya kodu epabali pole.
16 Mon taonna bannya’, argana tana jareya larang. Tape mon taonna sakone’, argana kodu epamodha, sabab se ejuwal bannya’na hasella tanana.
17 Ja’ nepo oreng se padha Isra’illa, tape ba’na kodu patako’ ka PANGERAN, Allahna."
18 "Toro’ sakabbinna hokom ban papakonna PANGERAN, me’ olle ba’na aman odhi’na e nagara jareya.
19 Tana e nagara jareya madhatengnga hasel sopaja ba’na cokoba kakanna ban aman odhi’na e jadhiya.
20 Tape olle daddi badha oreng se atanya apa se ekakana saabidda taon se kapeng petto’ e bakto tana ta’ olle etamenne ban hasella ta’ olle ekala’.
21 E taon se kapeng ennem PANGERAN aberkadana tana sopaja hasella cokoba ekakan tello taon.
22 Ban e bakto ba’na namenne teggalla e taon se kapeng ballu’, hasella tana e taon se kapeng ennem gi’ badha se ekennenga kakan ba’na. La’-mala’ parsadhiya’anna kakanna ba’na gi’ bakal cokoba sampe’ napa’ baktona ba’na makompola hasella tanana e taon jareya."
23 "Tanana ba’na ta’ olle ejuwal saterrossa, sabab tana jareya banne andhi’na ba’na, jareya kaagunganna PANGERAN. Ba’na pera’ akantha oreng manca se eedine ngangguy tana jareya.
24 Mon badha oreng ajuwal tana, se andhi’ dha’-adha’ kodu eberri’i ha’ kaangguy nebbus tana jareya.
25 Mon oreng Isra’il daddi mesken sampe’ tapaksa ajuwal tanana, la-balana se paleng semma’ kodu nebbus tana jareya.
26 Mon tadha’ oreng se nebbussagi, tape se andhi’ tana jareya e budhi are olle daddi pas sogi pole, sarta andhi’ pesse cokop kaangguy epanebbusa tanana,
27 oreng se andhi’ tana jareya kodu majar ka oreng se melle tanana saargana hasella tanana e dhalem on-taon se bakal dhatengnga sampe’ ka Taon Pabaliyan se bakal dhateng. Kalaban cara se kantha jareya oreng buru narema balina tanana.
28 Tape mon oreng jareya ta’ kellar nebbus tanana, oreng se melle teptep kobasa ka tana jareya sampe’ Taon Pabaliyan se bakal dhatengnga. E dhalem taon jareya tana jareya kodu epabali ka orengnga se andhi’.
29 Mon oreng ajuwal bengko e dhalem kottha se epagari bato sakalenglengnga, oreng jareya andhi’ ha’ nebbus bengkona jareya e dhalem bakto sataon kaetong dhari tanggal baktona bengko jareya ejuwal.
30 Tape mon bengko jareya ta’ etebbus e dhalem bakto sataon, ha’na kaangguy nebbus bengko jareya elang. Bengko jareya teptep daddi andhi’na oreng se melle ban na’ potona. E dhalem Taon Pabaliyan, bengko jareya ta’ osa epabali.
31 Kaangguy bengko e disa se ta’ epagari bato sakalenglengnga atoranna padha ban atoranna tana: se andhi’ bengko dha’-adha’ andhi’ ha’ nebbus, ban bengko jareya kodu epabali e dhalem Taon Pabaliyan.
32 Tape oreng Lewi andhi’ ha’ bila’a bai nebbus dhi’-andhi’na e tha-kottha se eteptebbagi daddi kotthana.
33 Mon oreng Lewi ajuwal bengkona e sala settong dhari kottha jareya ban ta’ etebbus, bengko jareya kodu epabali ka aba’na e dhalem Taon Pabaliyan. Sabab bengkona oreng Lewi e tha-kotthana jareya teptep ha’na reng-oreng Lewi jareya e antarana bangsa Isra’il.
34 Tape talon e sabingkerra tha-kotthana suku Lewi ta’ olle ejuwal. Jareya andhi’na oreng Lewi kaangguy salanjangnga."
35 "Mon oreng sabangsana ba’na se apolong sanagara badha se daddi mesken ban ta’ andhi’ se ekakana ban se eangguya, ba’na kodu nyokong oreng jareya pakantha se nyokong oreng manca sopaja oreng jareya bisa’a terros odhi’ e ma’-semma’na ba’na.
36 Ja’ menta budhu’ dhari pa-apa se epaenjam ba’na ka oreng jareya, tape ba’na kodu patako’ ka Allahna, ban dina reng-oreng jareya odhi’ apolong ban ba’na. Bariya keya ba’na ja’ ngala’ ontong dhari kakanan se ejuwal ba’na ka oreng jareya.
37 (25:36)
38 Sengko’ reya PANGERAN, Allahna ba’na se ngeba ba’na kalowar dhari Messer, se aberri’ nagara Kana’an ka ba’na, sopaja Sengko’ daddiya Allahna ba’na."
39 "Mon oreng sabangsana ba’na se abengko e ma’-semma’na ba’na daddi mesken sampe’ tapaksa ajuwal aba’na ka ba’na, oreng jareya ta’ olle esoro alako lalakonna dunor.
40 Oreng jareya kodu apolong ban ba’na menangka kabula ban alako ka ba’na sampe’ napa’ ka Taon Pabaliyan.
41 E bakto jareya oreng jareya ban na’-ana’na olle kalowar dhari bengkona ba’na ban abali ka la-balana ban ka tanana bangatowana.
42 Oreng Isra’il reya dunorra PANGERAN, se abakta bangsa Isra’il kalowar dhari Messer; daddi reng-oreng Isra’il ta’ olle ejuwal epadaddi dunor.
43 Daddi oreng Isra’il se ajuwal aba’na ka ba’na ta’ olle ekasare bi’ ba’na, ba’na kodu patako’ ka Allahna.
44 Mon ba’na parlo dunor, ba’na olle melle dhari sa-bangsa e ma’-semma’na ba’na.
45 Ba’na olle keya melle na’-ana’na oreng manca se abengko e antarana ba’na. Na’-ana’na oreng manca se lahir e nagarana ba’na olle ekaandhi’ ba’na,
46 ban olle esangkollagi ka na’-ana’na ba’na, epadaddi dunorra na’-ana’na ba’na saomorra. Tape oreng se padha Isra’illa ta’ olle ekasare.
47 Mon badha oreng manca se abengko e ma’-semma’na ba’na daddi sogi, ban badha sasamana oreng Isra’il se daddi mesken sampe’ ajuwal aba’na ka oreng manca jareya otaba ka la-balana oreng manca jareya,
48 oreng Isra’il jareya teptep andhi’ ha’ kaangguy etebbus bi’ sala settong dhari taretan lake’na,
49 otabana majadhi’ lake’na otabana sapopona otabana sala settong dhari bala semma’na. Otabana, mon oreng jareya dibi’ e settong bakto kellar, olle nebbus aba’na dibi’.
50 Dunor jareya kodu arembak ban oreng se melle aba’na, se kadhuwa kodu ngetong barampa taon abidda eetong molae dhari bakto oreng jareya ejuwal epadaddi dunor sampe’ ka Taon Pabaliyan se bakal dhateng, argana tebbusanna pas eteptebbagi. Argana tebbusanna kodu eteptebbagi noro’ etonganna gaji se ebajarragi ka oreng se daddi kabula.
51 Dunor jareya kodu mabali sabagiyan dhari argana aba’na e bakto ebelli,
52 (25:51)
53 se bannya’na padha ban gajina oreng se daddi kabula saabidda on-taon se gi’ ta’ ejalane. Dunor jareya ta’ olle ekasare bi’ lorana.
54 Mon oreng jareya ta’ ekenneng tebbus bi’ sala settongnga cara jareya, oreng jareya ban na’-ana’na kodu epabebas e dhalem Taon Pabaliyan samarena jareya.
55 Oreng Isra’il ta’ olle epadaddi dunor saomorra sabab bangsa Isra’il reya dunorra PANGERAN, se abakta bangsa Isra’il kalowar dhari Messer. Sengko’ reya PANGERAN, Allahna ba’na."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA