Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Andiko lengetna Jerusalem, mbarenda seh kal riahna. Mbarenda ermulia i tengah bangsa-bangsa, genduari bali ras diberu balu-balu, si biak raja e nggo jadi budak.
2 Gedang-gedang berngi tangis ngandung ia; iluhna maler ku pipina. Kerina temanna mbarenda la ngapuli ia. Teman-temanna nggo enghianat, kerina nggo jadi imbangna.
3 Kalak Juda nggo jadi budak si musil-musil ipaksa lawes i rumahna nari. Tading i negeri kalak la lit ingan si ikataken ia empuna. Ikepung musuh-musuh ia la lit dalanna pulah.
4 Genduari la lit kalak si bengket ku bas Rumah Pertoton, nembah tupung wari-wari si badia. Singuda-nguda ngendeken tangis-tangis janah imam-imam kelsehen nari nge ngenca. Pintu gerbang nggo melenget, Sion nggo mesui atena.
5 Imbang-imbangna nggo menang, ikuasai musuhna ia. TUHAN kap si mahanca mesui atena, erkiteken dosana si mbelin. Anak-anakna nggo itangkap dingen iangkut tertaban.
6 Kemulian Jerusalem nggo bene, peminpin-peminpinna desken belkih, si kote perbahan melihe. Gegehna nggo keri erkiteken iayak-ayak perburu.
7 I bas runtuhenna si melenget genduari, Jerusalem nginget kemulianna si nai. Tupung ia italuken musuh-musuhna, la lit kalak si nampati ia. Itawai imbangna ia tupung ketalunna.
8 Kemulianna nggo bene, manjang-anjang ia janah ciga ate kalak kempaksa. Kelsehen ia, ibunikenna ayona perban mela iakapna. Jerusalem jine erbahanca ia melket iban dosana si mesangat.
9 Kemelketenna teridah kal tapi la icidahkenna sikerajangenna. Nggo mesangat kal perndabuhna, la lit ise pe si ngasup ngapulisa. Imbang-imbangna nggo menang, emaka serko ia mindo perkuah ate man TUHAN.
10 Imbang-imbangna nggo ngerampuki erta-ertana. Idahna pe imbangna e bengket ku bas Rumah Pertoton, ku ja TUHAN ngelarang kalak perbegu bengket ku bas.
11 Kelsehen rayatna tupung ia ndaram-ndarami si man pangan. Itukarkenna erta-ertana guna pangan gelah ula ia mate. Nina kota e, "Nehen aku TUHAN, tatap min kiniseranku."
12 "Nehen min aku!" serko ia kempak kalak si mentas arah e. "La lit pernah kalak ndat ukumen bagi ukumen enda, ukumen si ibereken TUHAN man bangku tupung paksa Ia merawa.
13 IdabuhkenNa api i datas nari api si nciluk pusuhku. ItogengNa siding man bangku, idampeskenna aku ku taneh. Jenari ItadingkenNa aku ipediatna i bas sui ate si la erngadi-ngadi.
14 IpepulungNa kerina dosangku jenari iberkisna jadi sada. IolahkenNa e i bas kerahungku, seh kote aku nahanken beratna. TUHAN ngendesken aku man imbangku lanai lit ngasupku ngelawan ia.
15 Kerina tenterang si mbisangku iuru-uru TUHAN. IsuruhNa tentera ngkernepken anak peranangku. IerikNa bangsangku desken ngerik buah anggur i bas pengeriken.
16 Eme sabapna matangku teriluh erdire-dire. La lit kalak si ngasup ngapuli aku, la lit kalak si ngasup petetap ateku. Musuh nggo naluken aku, bangsangku lanai lit sitandaina.
17 Kudadaken tanku, tapi la lit sinampati aku. Nggo ilebuh TUHAN imbang-imbangku, lako ngepung aku. Desken barang mbau, ciga ate musuh-musuhku ngenen aku.
18 Tapi bujur kap perbahanen TUHAN e, sabap lanai kap ia kuikutken. O bangsa-bangsa kerina, dengkehkenlah perdiateken kiniseranku. Anak perana ras si nguda-ngudangku nggo iangkut tertaban.
19 Kulebuh teman-temanku, tapi itipuna aku. Imam-imam ras peminpin-peminpin maten i gedang-gedang pasar-pasar kota ndaram-ndarami pangan atena mesuri beltekna si lume.
20 O TUHAN, nehen min ateku mesui, mesui kal pusuhku. Getem kal pusuhku, picet kal ukurku erkiteken dosa-dosangku. Gedang-gedang dalan lit pembunuhen, i bas rumah pe lit kematen.
21 Dengkehken min, kesah-kesah kal aku, la lit si petetap ukurku. Meriah ukur musuhku perbahan IdabuhkenNdu cilaka man bangku. BerekenNdu dage wari si IpadankenNdu. Bahan dage mesui ate imbang-imbangku bagi si kunanami.
22 Ukum min ia kerina perbahan kejahatenna. Dabuhken min ukumen man bana bagi PendabuhkenNdu ukumen man bangku. Kelsehen kal aku perban suina, getem kal pusuhku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA