¹ Aya-wal oso-wal, ee ama em dikim ano syal hap denaka etawa gwen hap dwam gweꞌan. Ëe syala dohon-hon tangannake gol gwenan– Kolose hen Laodikiak de zini ebe mae hapye, hen tingare ahakore Kristen gwen zi hip men zen hen asa hla da srem gwe-gwenanke.
² Ëe mae habe tingare eKristen gwen zini ebe mae hap alp gwe-gwenan: Em dikim enho nakon etatete gwen hap, hen em dikim enaka de kwasang gwibirida gwenkam eaha-en gwen hap. Zen dekam esa sul sonenkam anakan tame ul gwer, “Alap insa ner hom zere mo ngaya tabin hip de kalangna nep goltreizimki, zen heꞌho gwibin tanganna. Zeno ausuna zen kitak Kristus onak.”
³ Sap Alap mo enlala blala hen kalangna, mensa zini serkam dei gwibirin, desa Kristus hun de zeraha-en gwenkame tame ul gwenan.
⁴ Ëe mae habe desa ebe mae hap ale gulzim: Emsa de yasik tabin hip de zi boton ora san dep sil tibirhal srem gwe-gwen hap. Yasik ta gwibin zini in mo ola sap zen derek gwen, hwena bahem desan ang ta gwen.
⁵ Ëe sap ebon mae home gweꞌan, hwena ano enlalana san de eban mae de golelowe henna kiye. Zep ee ama tangan sam gwesik gwenan– anakan de emsa salbirida gwenkam, “Zen dawemkam lowehe gwenan, hen Kristussu de taibliblannak tatem ezauk gwenan.”
⁶ Nen mese anakan ekira gwek, “Kristus Yesus, Zen eiwa ano mae mo teipsinni,” zen in zep nen ki ealp gwe-gwen– dawemkam de Deban zeraha-en gwen hap.
⁷ Nen ki Yesus onak emas gwirin. Nere mae mo gwennak nen ki Kristussu gweblan– san de ngirin gol tenya kiye. Desa de taibliblannak nen etatete gwe zahe gwen– men kirekam Epafras Bak emsa tawa ta gwibirkike. Deban nen ki Alap hap enho nakon dawemsa golbla tine gwen.
⁸ Dawem! Zi mana emsa zere mae mo yasik tabin sin dikim ang tan hap dahyo halank. Zen man zere mae mo tawa tabinni insa tim nul gwenan, “An enlala blala korena.” Hwena zen zi zere mae mo totore enlala yang tasin. Zeno mae mo tawa tabinni, zen auyan-aza mo ol aisili kon, hen okamana awe de teipsin dowal-dowala korena. Kristus onakore naka hom.
⁹ Kristus sap zi tangankam hata zaka, hwena Alap man tingare enho naban Kristus hon gwe gwenda.
¹⁰ Hwena angkam hen kirekam Kristus nesa tingare enho naban golegwe gwenda– nen an zene Deban eraha-en gwekye. Zen Zen– tingare teipsin-teipsin wenya kon Teipsin Tangan naye, sap okamanak de wenya kon, hen sap gulk de wenya konye.
¹¹ Nen kime Kristus hun taibliblankam eraha-en gwek, Zen dekam zep neno mae mo enhonak anakan ale gulku, “An ere mo dena.” Nen dekam zebe hen enho nakon anakan eis gwibiꞌin, “Ano karek gol gwen timni an mes Kristus te-lidak sonnak goltilki.” Yahudi zini kim to mipna blom dasik gwibirin, zen tahakam tim ensa wei-wei da gwibirin. Hwena Kristus hun de zeraha-en gwenkam, zen dekam zebe enho nakon eliwehe gwenan.
¹² Sap nen kime Kristussu de taibliblankam baptis gwennak ang ta gwenan, dekam man anakan nwe-mase gwe-gwenan, “Nesa hen mes Kristus mae han apdekam kang nulnek.” Hen Zen kim tin nikon ngaya gweka, dekam zep hen anakan nwe-mase gwe-gwenan, “Nesa Zen dekam golengaya gweka.” Zen kirekam nebe mae hap lwa gwizimꞌin, sap nen ema anakan Alap mo sosonna laibli gwibiꞌin, “Zen eiwa mes Kristussu tin nikon ngaya taka.”
¹³ Orep nen Alap mo nwenak san de tok-tokna kiye. Sap nen dekam karek ensae syal ei gwibik, hen neno mae mo enhonak dekam auhu-kama enlala en lwa gweka. Hwena angkam Alap mes nesa apdekam Kristus mae han ngaya tabirki– Desa kim tin nikon ngaya takake. Zen Zebon onakon Alap neno mae mo karek-karekna totoresa nep tap gulsuzimki.
¹⁴ Menkam neno mae mo karek-karekna man ngatan zi mo langnak bukunak nait gwibik– tokonak de bonsa de aitbin makan. Zao hen man ale nul gwek, “Kirekam de Musa mo olsa de gulmurun zini, kirekam de karek tan.” Hwena neno mae mo bon yala in kitak Alap hom gulku– Kristus hup de te-lidak sonnak de makan gul irinkim. Deban zep Yesus goltilki.
¹⁵ Sap Kristus kim te-lidak sonnak tilki, Zen dekam zep hen dowal mo kigisa wal bose wal zeban tahalebin nika yal gul ineka– anakan dikim tingare zi hip goletreizimdin hip, “Zeno mae mo sosonna angkam hom tangan.”
¹⁶ Zen in zep, zi de anakan emsa titi ta gwibinni, “Em ba habe golsriwen tembanena insa olgwen gwibirin?” “Hen golsriwen hona insa ba habe otde gwibirin?” “Alap hap de yaklana insa em ba habe ang ta srem gwe-gwenan?” “Ben ese hap de tembane yawalak em ba habe ang ta srem gwe-gwenan?” “Hari Sabatnak hen ba habe syal ta gwenan?” – kirekam de emsa zi titi ta gwibinni, bahem salbirida gwen.
¹⁷ Sap kirekam de golsriwenna in, zen Kristus de hatan sremnake kirekam syal ei gwibik. Sap dekam namae kara e gweblak. Zen in kitak san de honak de zere mo au-ausa hla ta inenna kiye. Hwena eiwa de tanganna, zen Kristus onake hla kul gwenan.
¹⁸ Anakan hen ki emsa yasik da gwibirin, “Alap mo dam taha nakore zi de nesa mas gwibiridan hap, tembanesa nen ki elwa gwen– dekam de blikip gwesibiridan hapye.” Kirekam de zini anakan hen ki titi da gwibirin, “Ëe kirekame eisirkim hlauk. Ano eisiri an san nen ang tan.” Hwena em bahem desan ang ta gwen. Dawem! Zen mana ngatan zi mo lang san dep de orasa ebe mae hap gwa-gwa da gwizimnink, ki hwena em molye zewe dep de mire sigina lop laink. Kire zini waba hap zenaka boltere da gwibirin, hwena zeno mae mo enlalana auhu-kama en nakorena.
¹⁹ Kire zini mes Kristus onak de emas gwirin nikon esyalhe hanak. Hwena Kristus Zen diki Zen Nola. Nen an tingare Kristen zini san de zeno taha-tanana kiye. Zep Kristus mo timni, sap dan gaing nenna hen sana, zen kitak zere mo sosonkam aha-ere timnik esyal gwe-gwenan. Kristus mo timni in dekam zep mam gwe-gwenan– men kirekam Alap Zena dwam gwibiꞌirake.
²⁰ Nen mese Kristus hun eraha-en gwek, zep Zen kim tilki, Zen neban mae apdekam golejuweka. Okamana awe de teipsin dowal-dowala menkam man nesa dahalebik. Hwena Kristus kim nesa golejuweka, nen dekam zebe zeno mae mo tahalebinni in kon ehil gwe hanak. Zep em ba habe etan yasik tabin sin de ang tan hap ealp gwesik gweꞌan? – okama ennak dep de anakare jalse gwen san de lwan dahan hapye:
²¹ “Ansa bahem twin gwibin.” “Ansa tangan bahem mae akasibin.” Ahaksa, “Bahem ansa olk gun.”
²² Hwena okamanak awe de tembane nwe-masena, zen twinbinkim dekam zep jek-jak gwe-gwenan. Zep ba hap de kire hap etan jalse gwen ola mas gul gwen hap?! Zen auhu-kama zi mo jalse gwen. Alap onakore naka hom.
²³ Eiwa, auhu-kama zi mo jalse gwen ola insa zini man tim nul gwenan, “Nen eiwa nere mae mo timkim de syal dohon-honna ansa syal gwe-gwibinkim esa Alap mo nwenak edawem gwer.” Zen zep waba hap zere mae mo timni karek da gwibirin– anakan de tim gunkum, “Ëe an dekam Alapsae blikip gwesibliꞌan.” Zep kirekam de yasik tabinni insa man tim nul gwenan, “An enlala blala korena.” Hwena zeno mae mo syala in waba hap! Zini men zen sap desan ang ta gwenan, hwena zeno mae mo auhu-kama hole-hlena hom kim tap gwe-gwizimnin.