¹ Yaklana kim aha-ere taha-tapkam damank, Alap mo golak de teipsin zini Ananias hen Yahudi mo nol-nola dekam zep Kaesarea san tine gwek. Roma mo ol jalse gwen klis gul gwen hap de zini hen man ang gwibiridaka. Zeno bosena Tertulus Bak. Yahudi mo mam-mamna mes desa nenblak– zen de Paulus mo kareksa gubernor hap goltreblan hap.
² Paulussu kim ner halzak, dekam zep Tertulus Peliks Baksa anakan tonblaka, “Ano mae mo teipsinni, bian gubernor– men desae blikip eisik gweblaꞌanke: Eno asa de irik ginkim, ee mese holokam umlae enkam lowehe gwek. Em mese ere mo enlala blalkam asa oto gulsuk gweka. In zebe tingare langna awe dawemna mwin-mwankam ep ol gweblanan.
³ (24:2)
⁴ Hwena holokam de desa loran srem hap, ee ama emsa blikip gwesiblin naban abe taꞌan– ano mae mo ola ansa de sane gwen hap.
⁵ Zini an ee mese dam lasik: Zen zisi karek tabirida gwenda. Hen zeno yasik tabin nikon Yahudi zini tingare okamanak de wenya man eilman gwenda gwenan. An hen men zen Nazaret walya men mo bosekam tawa dabirida gweꞌanke, zeno mae mo mamna ahana.
⁶ Zen kim sap Alap mo golsa de kun gun hup akasiki, hwena ama ze nabakam balk lak. [“Ëe sap ere mae mo ol jalse gwen san de karek tan habe ki enlala eblaꞌak. Hwena jana nabare zi mo mamna Lisias Bak, zen zep zere mo walas naban asas tangankam zial ta halka. Dekam zep asa gubiridaka– ee de zeno kareksa ebe hap goltreblan hap.”]
⁷ (24:6)
⁸ Em de hen taken-taken gweblankam, esa ki zere mo ola kon anakan dam tasili, ‘Eiwa, zeno karek-karekna beya tanganna, in zep ki ne gweblaꞌan.’”
⁹ Yahudi zini men zen ang tazak, dekam zep zeno ola insa anakan tri nilblik, “In eiwa tangan.”
¹⁰ Gubernor kim Paulussu tahakam anakare hap akablaka, “Emki hwena toran,” Paulus dekam zep ding gulku, “Ëe tawana: Em mese langna awe zi mo karek-karekna holokam klis gul gweka. Zep ee ama tangan isrip-sri gwenan– emsa de ere mo tim golsriwen hap denaka tonblan hapye.
¹¹ Em de ano olsa taiblibin hip, em emaka hen aha zisi takensibiridaꞌara. Ëe mae habe Yerusalem san song gwek: Dekon de Alapsa zere hap de gola kon gu sone gweblan hap. Yaklana tuju enkame ze gwek, ki zep an san dep asa ner halzak. Zep ee bawalkam de ze karekna mam gun hup? Angkam hwena awe yaklana aha-ere taha-tapkame gweꞌan.
¹² Men zen ano kareksa de ebe hap goltreblan hap yaing gwezak, zen hom asa hla dak– zi mo olsa de keisa gunnuk, ahaksa zi tra mo enlalasa de ben tyasizimdinnik, sap Alap mo golak, sap but srem golak, hen sap ena iweye.
¹³ Men desa boton ol blo-blona emsa donblanan, zen hwena basa molya emsa anakan donblak, ‘Ëe kirekam de karek gwennake hla lak.’
¹⁴ Hwena ee ebon damnake kira gweꞌan: Ëe ama ere mae mo auyan-aza mo Alapsa betek gwe-gweblanan– Nazaret walya Yesussu de ang gweblankam. Men zen Desa daibliblaꞌan, desa man Yahudi mo mam-mamna anakan husus neibirida gweꞌan, ‘In yasik tabin sin ang taꞌan.’ Hwena tingan mensa Musa mo titi tabin olak hen Alap mo ol ayang gul gwen zi mo ola ale nuk, ee nama desa kitak taiblibiꞌin.
¹⁵ Ëe ama Alapsa taibliblaꞌan– in kirekam hen zen lowe heꞌan, anakan, ‘Zini tin nikon sa engaya gwer– sap dawem gol gwen zi, sap hen karek gol gwen zi.’
¹⁶ Ëe in zebe alp gwe-gwenan– enho kles gwesin sremkam de Alap mo nwenak gwen hap, sap hen zi bosyan mo nwenak.
¹⁷ “Ëe kime zi mo lang san tahun beyakam gwendak, ki zebe etan Yerusalem san dep lwa halzak– zao de tahalha zisi te-alakam mas gwibiridan hap, hen Alap hap de domba maesa kap ta gweblan hap.
¹⁸ Zen in kim kiresa de syal gwibinnik Alap mo gol teksonnak asa hla dak, ee dekam kun naban home ze gweꞌak. Hen zi tra naban home mae ze golekeisa-keisa gwek. Hen home mae ze goleilman gwek.
¹⁹ Hwena Yahudi zini men zen Asia mo lang nakon yaing gwezak, zen zen en ze asa anakan tame dak, ‘An men zen neno mae mo lang san tenda gwekake.’ Diki zen de awe yaing gweꞌan zanam, zen de eno nwenak asa taken-taken gweblan hap, ki maka sam gwesiꞌin– zen de asa ba mae hap jal gweblankamye.
²⁰ Ahaksa bong-bongna an zen teinikinꞌin, zen maka emsa nenblaꞌan– ano karekna men zen ap hla nulblik, in kim Yerusalemk teipsin sinodenak asa taken-taken neblakye.
²¹ Zeno mae mo nwenak ee ama sapꞌnen ol mamkam anakan guk, ‘Asa ansa namen taken-taken eblaꞌan, zen mae hap: Sap ee ama anakan taiblik, “Zini tin nikon ngaya gwenkam.”’”
²² Peliks Bak orep mes anakan tawa gwibiridaka, “Ahakon Nazaret walya Yesus Swesa ang ne gweblaꞌan.” Zep gubiridaka, “Angkam dekam sekwak gwek. Jana nabare nik mo mamna Lisias Bak de hata zankam asa klis gul.”
²³ Dekam zep zewe de jana nabare nik mo mam naka gubluka– zen de zere mae mo lowehe gwennak Paulussu kara ta gwen hap. Peliks man desa gubluka, “Dikire gol mwa ennak te nasen gwek, hen wal bose wal zem dikire tahalhanak mas ne gweblak.”
²⁴ Yaklana hom beya gweꞌak, ki zep Peliks we zem Drusila han aptazak. We zem in Yahudi we, hwena zena Roma wal. Ki zep Peliks Paulussu de kwang ta halzan hap gubiridaka. Dekam zep we zeban apdenak sane laꞌak– Kristussu de taibliblan hap dena kim klis gulzimꞌinkaye.
²⁵ Insa klis gulzimꞌinka, Alap hon dikim tal gwesin hip denaka, zenaka dikim zerinik gwen hap denaka, hen Alap de lamkam klis gun hup denaka. Peliks dekam zep airiꞌanka, dekam zep gubluka, “Zao en golzausuk. Amki asa hli so. Ëe de hir-hir gwen sremkam, asa etan emsa gu soneblal.”
²⁶ Hwena zen man hen Paulussu anakan gu gweblaka, “Eme te-alasa mamkam ap golblaꞌanam, ki amaka emsa zeser soneꞌan.” Zep etan-etankam kire hap de olsa de loran hap gu sone gweblaka.
²⁷ Tahunna kim dan damank, Peliks dekam zep gubernora kon ati gweka. Hwena Yahudi zi dikim sam gwesiblin hap zep Paulussu bwinak hli taka. Hwena dekam zep zeno weinak Perkius Pestus gubernorkam irik gilki.