¹ In kim eilman gwesik, Paulus dekam zep Yesussu de taibliblan wenyaka tagal gulsuku. Zao zep aumwa hap de ol zim-zimni golzimki. Zena dekam zep Makedonia mo lang san dep song gweka.
² Holokam zep Makedonia mo lang san ten daka– zena men desan Alap mo ol dawemkam tawa tabirida gwekake. Zen etan desan ol zim-zimkim Kristen zisi tatete tabirida gweka, hendep Korintus mo langna Akayak hataka. Langna in aha bosena Yunani.
³ Zao dan-ahare benkam gweka. Siria mo lang san de bulkum song gwen hap kim hohle gweꞌanka, ki zep hwena nenblaꞌak, “Yahudi zini man emsa tan hap ora nakon dil gibliꞌan.” Dekam zep enlala gweka, “Tanakam asa etan Makedonia san dep lwahal.”
⁴ Hwena dekam zini mes jemat-jemat nakon tuju enkam dam dasibik– zen de Siria hen Yerusalem san ang gweblan hap. Ëe, Lukas, Paulus hun zebe tanakam Makedonia san song ek. Tujukam de zini in, zen en bulkum asa nangirzimk– Troask de hwena olegaing gwen hap. Zeno mae mo bosem-sena– ena Bereya walya Pirus mo tanena Sopater, Tesalonika wal darena, Aristarkus hun Sekundus hun, Derbe walya Gayus, hen Timotius, hen Asia mo lang nakore zi darena, Tikikus hun Trofimus hun.
⁵ (20:4)
⁶ Yahudi mo minggu yala kim tamank, rotisa dikim ragi sremkam taiblin gil gwen hap dena, dekam zebe Pilipi kon buluk Troas san dep ang ek. Bulkum de song enna, yaklana aha-ere taha-tapkam, ki zebe Troask olegaing gwek. Zao aha-ere minggukam zebe olelowehek.
⁷ Minggu mo kam, dekam zep Yesussu de taibliblan wenya tagal gwek– Yesus mo timsi dikim enlala gwibin hip de rotisa dikim twinbin hip, hen zep de anggur hosa dikim otdebin hip. Ëe Lukas ama hen ang gwek. Paulus dekam mam blalkam tonbiridaka, hendep zao zep ngirin tatem gwek. Sap zen man kaꞌan de hli yuludan hap kalang gweꞌanka.
⁸ Gulk de teksonna men zaoe tagal gwek, syauk ngatanna beyana.
⁹ Gola in, zeno klibuna dan-ahan. Aumwa hap de klibuna, zen zaoe tagal gwehak. Wal seiwiri bosena Yutekus, zen jendela tahannak nikinki. Paulus kim tonbirida tineꞌanka, wal seiwiri in zao zep hendep ta guk halka. Kim kon balep gwesiki, dekam zep kon kama san dep zan tineka. Kim ze neir ineꞌak, anakan zep hla daꞌak, “Mes tili.”
¹⁰ Paulus kim ati gweka, zao zep nabakam bik dan tahannak glang gwebla ineka, hendep kyang-kyang tasiki. Ki zep gubiridaka, “Bahem enlalana edowe hanan. Zeno angna mes etan lwabla halan zala!”
¹¹ Ki zep etan golesesek gweka. Zao zep Yesussu de enlala gweblan hap de rotina insa zitwenblaka, hen kire hap de anggur hona ziotdebirki. Zao kim etan ola zitonbirki, zao zep hendep golehleng gwek. Kaknak zep hwena Paulus zere hon de ang ta gwen wenya aban mae golesek gweka.
¹² Zewe de zini in ki zep wal seiwiri insa gol san dep nga-ngola ban nersong gwek– anakare hap, “Zen mes ngaya gwera!”
¹³ Ëe hen Lukas Troas kon bulkume Paulussu angirblik– Asos kon de esblan hap. Ëe mese ola kirekam aha-en uk, sap Paulus man Asos san tanakam de song gwen hap dwam gweꞌanka.
¹⁴ Kime ena Asos kon bulkum eirink, dekam zebe hwena Mitilene san dep sek gwek. Ëna in lang tekna Lesbosnak.
¹⁵ Kaꞌankam zebe kon hwena lang tekna Kiossa lamank. Zeno kaꞌankam zebe hwena lang tekna Samos san dep tablan gwe kinik. Zao de yaklanak, ki zebe hendep Efesus mo golek denak de ena Miletusk yaing gwek.
¹⁶ Paulus mes ki Efesuꞌu de talmaran hap kalang gweka, sap zen man nabakam de Yerusalemk hatan hap dwam gweka. Sap zen man enlala gweꞌanka, “Ëe wehe Pentakostana jap soꞌak?” In zep Asia mo lang san de egweisik song gwen hap baes gweka.
¹⁷ Miletus kon zep Efesusk de Kristen zi mo nol-nola gu sonebiridaka– zen de yaing gwezan hap.
¹⁸ Kim yaing gwezak, zao zep aumwa hap de ola anakan gubiridaka, “Aya-wal oso-wal, ena tawana: Ëe kime Asia mo langna awe emsa golelowehe gwek, nonol hata zankam hendep angkam,
¹⁹ ee Alap hon de babu gwen zi mo kime syal gwe-gwek– enlala betekkam hen nwe go-ho naban. Ëe karekna mam nakae goltowe gwek– Yahudi zini kim sap tan hap asa dil gik gweblak. Hwena ee home kim golzausuk.
²⁰ Ena tawana: Ëe anakan de titik gwibin enlala naban home emsa tawa ta gwibik, ‘Ansa babe tawa tabin. Aha zi sa husus neibir.’ Hwena ee mensa ena dwam ei gwibik, Kristus hon dikim etal gwesin hip dena, ee desa sul sonenkame zi tra mo inik emsa tawa ta gwibik– hen gol-gol san.
²¹ Sap Yahudi zi, sap Yunani zi, ee damnake tonbirida gwek– zen dikim ehalen hap, hen Alap osan dep dikim lwanda halzan hap, hen zen dikim Bian Yesussu taibliblan hap.
²² “Hwena angkam, Alap mo Enhona man asa titi taꞌara– ee dikim Yerusalem san song gwen hap. Hen ee home tame guꞌun, ‘Basa wehe ze goltoweꞌak?’
²³ Hwena Alap mo Enhona aha-en mes ap anakan goltreblaka, ‘Ëna men zewe em hata gweꞌanka, zao bwinak sa emsa se dyain gwer, hen kareksa esa ze goltowe gwera.’
²⁴ Hwena ee ere mo gwensa de langa gulsun hup home enlala gweꞌan. Hwena diki abe hap insa Bian Yesus syala we yul soneblakake, desa de sul sonen habe tangan dwam gweꞌan. Ano syala in zen: Tingare zisi de titi ta gwibin hip, zen dikim Alap mo kwasang hap de ol dawem san ang ta gwen hap denaye.
²⁵ “Angkam ee tawana: Ëe men desae Alap mo irik gin hip dena emsa tonbirida gwek, em molye etan asa hla lak.
²⁶ In zebe emsa gubiridaꞌan: Alap molya eno mae mo kala abe hap ngero gulbluka.
²⁷ Sap ee home ere mo tawa tabinni wet gulsuk gwek– em dikim asa husus gweblan srem hap. Ëe hwena Alap mo dwam gwibin en san dena kime sowe henkam emsa tawa ta gwibik.
²⁸ Dawem enkam enaka kara la gwibik– tatete enkam eka ezauk gwek. Sap Alap mo Enhona mes emsa dam tasibirki– dekam de Yesussu de taibliblan wenya insa taizi gwibin hipye. Zep desa dawem enkam kara la gwibik. Em in men kiye– zahosa de kara ta gwibin zini. Eno mae mo zahona in, zen Alap mo hlil irin wenya– men desa Tane Zem Yesus mo kalkam lup gul inkike.
²⁹ Ëe tawana: Ano tim bwanak tesen lwa jal-jala sa biti gwezal– eno mae mo zahona insa de tamerazan hapye.
³⁰ Ere mae onakon sa hen ejower– dekam de eiwa de ol aisili insa men-man gun hup de ziniye, dekam de hwena zisi zere mae mo bosesa dikim mam gun hup hlil inhal gwen hap.
³¹ Zen in zep terya-tyakam lowehe gwek. Emki eenlala gwe-gwen: Ëe dan-ahare tahunkame nwe go-ho naban emsa titi tabir tine gwek– yaklam denaban kam denaban.
³² “Angkam ee Alap zere mo tahanake emsa tapbla gulun! Alap zere mo kwasang-kwasang hap de ol dawemna in, zen desa en em enlala gwe-gwibin. Desan de ang ta gwenkam zen dekam esa etatete gwer, hen dekam esa ulin– Alap mensa tingare lalak wenya nebe mae hap hamal gulzimkiye.
³³ Ëe home zi mo kire-kire dawemna hole-hle gwe-gwibik– sap te-ala, sap hen pakean maekam denaye.
³⁴ Ena tawana: Ëe ere mo tahakame ere mo tahalha hap syal gwe-gwek– hen abon de ang ta gwen wenyik mo tahalha hapye.
³⁵ Tingare ano syala in, zen erak makane ebe mae hap enaka anakan drene gwizimk, ‘A kirekam nen soson srem zisi mas gwibirida gwen.’ Sap ee Bian Yesus mo olsae anakan enlala gwe-gwibik, ‘Isrip-sri gwibin tanganna, em em zi hip gol gwizimdin. Zen de ebe hap gol gweblankam, zen isrip-sri gwibin tangan naka hom.’”
³⁶ Kim tonsubiridaka, ki zep boklena golekom taka, ki zep Alapsa zigu soneblaka.
³⁷ Aumwa hap serkam zep go naban babang da gweꞌak.
³⁸ Zen mae hap gona dablak: Sap zen man gubiridaka, “Em molye etan asa hla lak.” Hendep ki zep bul sun dep zon dak.