¹ Ikoniumk hen kirekam lwak. Paulus ne Barnabas ne etan Yahudi mo but srem gol san song eka. Zewe zeno nik mo tawa tabinni man tangan soson gwek, dekam zep tangan beyakam Yesussu daibliblak– sap Yahudi zi, hen sap Yahudi srem zi.
² Hwena ahakore Yahudi zini– men zen Yesussu de taibliblan hap baes tak, zen dekam zep Yahudi srem zi mo enlalana ben dyasizimk– dekam de zen Yesussu de taibliblan wenya insa u sal-sal gwibiridan hap.
³ Hwena Paulus ne Barnabas ne holokam ze eka, hen udobe naban Bian mo nesa de kwasang gwibiridan hap de ola lonbirida gweka. Zen Bian en hon yaing e kini gweka, zep Bian man zebe nikip owas-owassa dikim syal ei gwibin hip dena gol gwizimki– zeno nik mo ola insa dikim soson gul gwizimdin hip.
⁴ Zewe de zini dekam zep ehliwek. Ahakon Yahudi zi nik ang tak. Ahakon Paulus nebon ang tak.
⁵ Dekam zep sap Yahudi zini hen Yahudi srem zini zere mae mo ena iwe de nol-nola ban ola niaha-en guk– dekam de Paulus neka karek son hap, hen zao de kasokam i tizimdin hip.
⁶ Hwena kim tame ulki, dekam zep Ikonium kon heya eka– Likonia mo lang san dep. Zao zep hwena ena Listra hen Derbe mo langnak
⁷ engaya gwen hap de ol dawemna inkam tawa labirida gweka.
⁸ Listrak zi lekna ki. An zem lek naka ki hendep jaha gwek.
⁹ Zen kim Paulus mo tawa tabinnik ang gweka, Paulus ki zep karatda taka, dekam zep tame taka, “Zini an angkam man Yesussu taibliblaꞌara. Zen sa zeno bosekam dawem gwera.”
¹⁰ Ki zep ol mamkam takenblaka, “Emki zaun!” Dekam zep hendep hetyak gwesik kininkam luwesik ane kinika, hendep te nasenꞌanka.
¹¹ Zi trana in kim hla dak, ki zep zere mae mo olkam etaken gweꞌak, “An aha alap dare zi nwe-masekam nebon mae onak ati e ine zaka!”
¹² Dekam zep zere mae mo yang tasin alap mo bosekam bose nosok. Barnabaꞌa “Zeus”kum bose dak. Paulussu “Hermes”kam bose dak, sap zeno mae mo alap-alap hap de epba olak Hermes zen aha alap-alap mo olsa zi hip ayang gul gwizimki.
¹³ Zeno mae mo yang tasin alapna Zeus, zebe hap de gola ki– e alpnak iwe. Gola iwe de syal gwe-gwen zini ki zep sapi zirya teisyahal zaka– dekam de zi tra mo nwenak Barnabas ne Paulus nikip hlik sozimdin hip. Nolak de ala sozimdin hip de desan-san weir sosunnu hen man teisyahal zaka– zeno nik mo nolak de ala so sonezimdin hip. Sap zen man tim nosok, “An ano mae mo yang sosun alap eiwakam ati e ine zaka.”
¹⁴ Hwena anakan kim tame ulki, “An hare kirekam am asa neizimꞌin!” – dekam zep zere nik mo tahan bajusa kalk-kalk oson daka, anakan dikim goltreizimdin hip, “Ëe ama eno mae mo syala insa husus eibiꞌin.” Ki zep zi trana in mo ngirin sin hlu ke zaka, dekam zep ol mamkam laken zaka,
¹⁵ “Em ba habe kirekam asa eizimꞌin? Ëe an hen zi tangan sake– in ki hen em. Ëe an ebon mae onak engaya gwen hap de ol dawemsa de tawa labin hibe aptazak– em dikim boton alapsa de betek gwibirida gwensa baes tan hap, eiwa de Alap ensa dikim hwena betek gwe-gweblan hap, men Zen ngli naban, kama naban yang sosukuke, hina, hen tingare ensasa gwen kire-kirena men zen zewe lowehe gwenanke.
¹⁶ Menkam Alap nwe enkam emsa anakan kara ta gwibirki, ‘Dikire zere mae mo boton alap-alapsa betek neibirida gwek.’
¹⁷ Hwena Zen hen dekam ki dawemna ebe mae hap gol gwizimki– em dikim sap anakan tame tan hap, ‘O hare eiwa de Alapna kike.’ Zen zep ona il ti gwenda– eno mae mo obwaga dikim dawemkam hatan hap. Hen tembanena sowe henkam ep gol gwizimnira– em dikim isrip-sri naban lowehe gwen hap.”
¹⁸ Kirekam sap lonbiridaka, hwena dekam tangan man alp neizimꞌik– sapi darena insa de hlik sozimdin hipye.
¹⁹ Hwena Yahudi zini kim Antiokia hen Ikonium kon Listrak iwe yaing gwezak, dekam zep zi trana in mo enlalana wet dyasizimzik. Paulussu dekam zep kasokam niriblak. Ëna in kon ki zep il dihak. Man kil dik, “Mes tilida.”
²⁰ Hwena zao de Yesussu taibliblan wenya kim tagam neisiblik, dekam zep luweka, dekam zep etan nertilzik. Kaꞌankam zep hwena Derbe san dep etan Barnabas han song eka.
²¹ Derbek zep hwena engaya gwen hap de ol dawemkam lonbirida gweka. Zewe beya nik zep Yesussu daibliblak. Dekon ki zep etan amjanbiridaka– e-ena men desan zena song e zakake, Listra, Ikonium, hen Pisidiak de Antiokia san.
²² Zen dekam eKristen gwen wenya insa etan titi labir song gweka– dekam de Yesussu de taibliblan ennak tatem ezauk gwen hap. Anakan tawa labir song gweka, “Men zen kareksa de goltowe gwennak tatem ezauk gweꞌak, zen zen sa Alap mo irik ginnik biti gwer.”
²³ Zao hen man enbirida song gweka, “Tembanesa esa elwa gwer, dekam eka eno mae mo nol-nolaka dam lasik gwibik.” Kim dam dasik gwibik, dekam zep Paulus ne Barnabas ne taha tehabirida inen naban Biansa anakan en sone gweblaka “Bian, zini an man Ebon eyaing gwe kiniꞌan. Ëe ere mo tahanake hli kulidaꞌan.”
²⁴ Pisidia mo langna kim lamanka, dekam zep Pamfilia mo langnak aptaka.
²⁵ Pergak kim ol dawemna inkam tawa lasibirki, ki zep hwena Atalia san dep song eka.
²⁶ Zen mes zere nik mo syala su kul soneka, zep Atalia kon bulkum Siria mo langnak de Antiokia san dep song eka– men zewe nonol zere nikip anakare ola ban tahana dehazim anekke, “Bian, dikire ere mo kwasang-kwasangna zebon nebon lwa gwek.”
²⁷ Antiokiak kim aptaka, ki zep zewe de eKristen gwen zini tagal ulsuku, zao zep lonbiridaka– tingan mensa Alap syal gwe-gwibir-zimki, Alap men kirekam orana Yahudi srem zi hip dam tasik gwizimkike, zen dikim hen Yesussu taibliblan hap.
²⁸ Zao holokam zep zewe de Kristen zi niban olelowehe gweka.