Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ko wakutu ing ki Petrus bo ki Yohanes koyogotpa nongonguman takin intau moaíntoí kon tua, indoianmai yo imang mita itoi bo itoi im moḷoḷukad kom Baḷoi Tuhan takin intau mita in Saduki namangoidon ko'i monia kon tua.
2 Mosia sinumoruí ko'i nayadua sim mosia ain notunduí bo nopota'au kon intau mita kong ki Yesus aindon nobiag bui nongkon kinopatoian-Nya. Tua in nobalií bukti kon intau matoi im mobiagbií bui.
3 Daí dinomok monia im mosia bo pinobonu kom ponjara nodapot in nobangon monik sin wakutu intua nodoḷomdon.
4 Ta'e intau mita inta ain nokodongog kon onu inta ain sinunduí in rasul mita tatua nobayong in nopirisaya. Daí nodugangdon ing kobayong monia, kom bonu im ponarukira'an limamaidon noribu kobayongea in ḷoḷaki.
5 Nopo'ikoḷommai kon singgai, itoi mita in Yahudi, guhanga mita in lipuí bo mototunduí mita kon agama nogaid kon sidang kon Yerusalem.
6 Takin mita Imang Moḷoben ki Hanas, ki Kayapas, ki Yohanes, bo ki Aleksander takin bayongan intau inta katurunan mita in imang moḷoben.
7 Ki Petrus bo ki Yohanes dinia kon tayowon sidang tatua bo mulai pinolibo-liboían kon rupa-rupa, kai monia, "Naíonda im pinongongundam monimu kon intau inta lempeng tatua? Kakuatan bo kawasa i ine im pinogaid monimu kon tua?"
8 Bo takin kawasa in Roho i Allah, ki Petrus notubag, "Tuang-tuang inta nobalií itoi mita im bangusa bo tuang mita inta anggota mita in sidang!
9 Aka tana'a makow bo kami dinia mangoi kon na'a sin sidangon lantaran nogaid kon mopia notuḷung kon intau inta lempeng bo liboíon monimu mongo kawasa i ine im pinogaid nami kon tua,
10 daí tana'a im pogumankudon ko'i monimu bo kom bayongan intau Israel, kon intau tana'a nokosindogdon bo nosehatdon in indoian makow monimu lantaran ropot bo kawasa i Yesus Kristus intau in Nazaret inta aim pinopopakuí monimu kong kayu pinoyotalempang, ta'e bui biniag i Allah in Sia nongkon sigad in intau minatoi.
11 Ki Yesusbií tua inta imakusud in ayat kom Buk Mosuci nana'a, 'Batu inta iḷumbuí in intau mita mogogaid kom bangunan, na'anta nobaliíbií batu inta totok im baraguna.'
12 Diaíbií ing kasaḷamatan kon ibanea makow kolikudbií ing ko'i Yesus tontanií, sing kon dunia na'a diaíbií intau ibanea in inogoian i Allah ing kawasa moposaḷamat ko'i naton."
13 Intau mita kon tua inta nosidang ko'i Petrus bo ko'i Yohanes noherang totok in noko'ontong kong kobobarani nayadua, padahaḷ kinota'auanbií monia kon taya dua tua in intaubií inta diaí nosikoḷah. Bain tua bo kino-toropan monia kon taya dua tua in dumoduduibií i Yesus.
14 Mosia diaídon mokobayow ko'i nayadua tua, sin intau inta bagu inundaman monia simindogpa makow kon diug nayadua tua.
15 Daí pinoḷuaidon monia kon ruang sidang tatua in rasul mita tatua, bodongka noyosingog bui im mosia,
16 kai monia, "Onubií im pomia'an naton kon intau mita tatua? sim bayongan intau inta kon Yerusalem na'a aindon nokota'au kon tayaduabií tua in nogaid kom bayongan soaáḷ inta mokoherang totok kon intau. Tua in diaíbií mota'au bayowan naton.
17 Ta'e ḷukadan naton simbaí diaí totok mo'isiar magií makow kom bayongan intau daí manikah bo ancamon naton im mosia, kombaí mosia diaídon mopota'a-ta'au magií makow kon tangoi i Yesus tatua."
18 Ki Petrus bo ki Yohanes inoinií bui sinumu'ot kon ruangan. Onda in no'ituotmai, totok in dinandi monia kon diaídon mota'au in taya dua mopota'a-ta'au makow in tangoi i Yesus tatua.
19 Ta'e ki Petrus bo ki Yohanes noguman ko'i monia nana'a, "Raidon monimu kopia mongo onda im mopia-pia kon tayowon i Allah: Dumudui kom parentah monimu mongo dumudui kom parentah i Allah.
20 Sin diaíbií mota'au ing kami mogogai mopota'au kon onu inta ain inontong bo dinongog nami tontanií."
21 Sidang tatua diaí noko'ulií kon taḷaí tobatuímai inta mota'au baliíon monia dodoyonan pohukuman ko'i nayadua. Daí pangabisannya binulian monia in rasul mita tatua sim mo'ondokdon mosia kon intau moaíntoí inta moduiímai kon tangoi i Allah sim mosia ain noko'ontong kom bayongan inta ain nobalií.
22 Sin intau inta inundaman tatua umurnya aindon no'iliu kon opat nopuḷuh notaong."
23 Naonda im pinoḷuai makow monia, ki Petrus bo ki Yohanes minayak kon yobayat mita monia, bo ino'uman mita monia onu inta siningog in imang mita itoi bo itoi mita in Yahudi ko'i monia.
24 Naonda in yobayat mita monia tatua nokodongog kon o'uman monia tatua, mosia nosambayang ko'i Tuhan noyotakin, kai monia, "Oh Tuhan, Ikowbií in nomia kon ḷangit bo butaí, dagat bo bayongan tombonunya.
25 Ki Daud ki amaí nami inta kinawasa'an in Roho-Mu pernah noguman nana'a, 'Nongonu sin intau mita inta diaí mopirisaya ko'i Tuhan, tumoruíbií; nongonu sim mosia im moroncanabií kon inta diaí baraguna?
26 Raja mita in dunia na'a mosadia makow moparang bo itoi mita motobatuí sim moḷawang ko'i Tuhan bo Raja Mopoposaḷamat.'
27 Sin totu'ubií kong ki Herodes bo ki Pontius Pilatus aindon noyosipun kong kotaí tana'a takin intau mita inta diaí nonota'au ko'i Tuhan bo intau mita in Israel sim moḷawang ko'i Yesus, simpaḷ-Mu inta aim pinilií-Mu bo inta kino ibog-Mu.
28 Mosia notobatuí nogaid kon yagi-yagi, inta munadon sinantuí-Mu kom mobalií. Bo sinantuí-Mu intua pinodudui ing kawasa bo ibog-Mu tontanií.
29 Bo tana'a makow Tuhan, indoiaikah im mosia molarangbií ko'inami. Po'igumon nami ko'i-Nimu Tuhan, ogoiaipa ing kabaranian bobantung-Mu mita tana'a mopoyaput im Pirman-Mu mita.
30 Tuḷungaipa ing kami simbaí intau mita nongotakit modait mopia bo onu inta diaí mota'au aidan in intau, mobalií sing kawasa bo ropot inta pinodoyon kon tangoi i Yesus, simpaḷ-Mu inta aim pinilií-Mu tua."
31 Bo naonda im mosia nosambayang, tampat pinoyosipunan monia tatua nodanduí bo mosia komintan kinawasa'an in Roho i Allah, daí mosia diaídon inangoian ondok nopota'au im Pirman i Allah.
32 Komintan intau inta ain nopirisaya tua nobiag notobatuí kong gina bo porasa'an. Diaí tobatuímai ing kon sigad monia tua in norai kon onu inta ko'i monia yo tongaíbií kuon monia tontanií.
33 Takin kawasa moḷoben, rasul mita tatua nopota'au kong ki Yesus ain nobiag bui. Daí totokdon binarakatan i Allah im mosia.
34 Bo diaíbií in tobatuímai kon sigad monia tua in nobiag moyoyiga. Sin intau mita inta ko butaí andeka ko baḷoi, nopotaḷui im butaí andeka baḷoi monia, bo doit inta boli im pinotaḷui monia tua diaan monia
35 bo posarahkan kon rasul mita. Doit tatua sila-silaion makow kon intau mita inta moparaḷu.
36 Natua doman ing ki Yusup, inta dinonoi in rasul mita ki Barnabas (inta mangalenya, Mohohibur).
37 (4:36)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA