Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanga Petrus ras Johanes ngerana denga, reh piga-piga imam ras kepala pengawal Rumah Pertoton ras piga-piga kalak Saduki.
2 Nembeh ate kalak e sabap iajarken rasul-rasul si dua e man kalak si nterem maka Jesus nggo keke i bas si mate nari, si nuduhkenca maka lit kekeken i bas si mate nari.
3 Emaka itangkapna Petrus ras Johanes, jenari itamakenna ku bas penjara seh pagina, sabap paksa e wari nggo ben.
4 Tapi nterem kalak si megi pengajaren e tek; teremna dilaki si nggo tek e tambah jadi kira-kira lima ribu kalak.
5 Pepagina pulung peminpin-peminpin kalak Jahudi ras pertua-pertua bage pe guru-guru Undang-undang i Jerusalem.
6 Ikut pe pulung Imam si Mbelin Annas ras Kayapas, bage pe Johanes ras Aleksander ras kalak si deban i bas kesusuren Imam si Mbelin nari.
7 Kenca bage isuruhna Petrus ras Johanes tedis i lebe-lebe sidang. Jenari isungkunina nina, "Kuga ibahanndu maka kalak si pangpangen e nggo banci erdalan? Kuasa kai lit i bas kam ntah pe gelar ise ipakendu asum kam mpepalem ia?"
8 Petrus si dem alu Kesah Si Badia erjabap man sidang e nina, "O kam peminpin-peminpin ras pertua-pertua.
9 Kami iadilindu kerna perbahanen kami si mehuli nandangi kalak si pangpangen e. Isungkunindu kami kerna kuga kami pepalem ia.
10 Dage arus ietehndu kerina bage pe arus ieteh kerina kalak Israel maka ia si tedis i lebe-lebendu enda nggo banci erdalan erkite-kiteken kuasa gelar Jesus Kristus kalak Nasaret. Ia me Jesus si nggo ipakukenndu ku kayu persilang dingen si nggo ipekeke Dibata i bas si mate nari.
11 Jesus si ikataken i bas Pustaka Si Badia, 'Batu si iambekken tukang nggo jadi batu palas.' Janah kam me tukang e.
12 Arah Jesus ngenca kita banci terkelin; sabap i belang-belang doni enda la lit itetapken Dibata gelar si deban si erbahanca kita terkelin."
13 Ngidah Petrus ras Johanes pang kal ngerana alu terus terang, dingen perbahan ietehna maka si dua kalak e rakyat biasa si la erpendidiken, emaka mamang ate anggota sidang e. Jenari ietehna maka kalak e duana ajar-ajar Jesus.
14 Tapi lanai ieteh anggota sidang e ngaloisa sabap kalak pangpangen si nggo banci erdalan e tedis i je ras rasul si dua kalak ndai.
15 Emaka isuruhna rasul-rasul e ndarat jenari arih-arih ia kerina.
16 Nina sapih-sapih ia, "Kai tindakenta genduari man bana? Kerina kalak si ringan i Jerusalem nggo meteh tanda sengget si ibahanna enda.
17 Tapi gelah ula reh mbarna berita e i tengah-tengah jelma si nterem, siolangilah dingen siajarken ia gelah ulanai ngerana man ise pe i bas gelar Jesus."
18 Emaka isuruhna rasul-rasul e ku bas mulihi. Ilarangna gelah ulanai ngerana ntah pe ngajar i bas gelar Jesus.
19 Tapi ngaloi Petrus ras Johanes nina, "Kamlah kerina ertimbang si apai kin mehuli iakap Dibata: patuh kami man bandu ntah man Dibata.
20 Sabap la terngadiken kami ngerana kerna kai si nggo idah dingen ibegi kami."
21 Isergang-sergangi anggota sidang tole rasul-rasul e, jenari ipulahina. La idatna alasen guna ngukum rasul-rasul e sabap kalak si nterem kerina muji Dibata erdandanken kai si nggo jadi e.
22 Kalak si nggo ipepalem alu tanda sengget e umurna lebih empat puluh tahun.
23 Kenca Petrus ras Johanes ibebasken, minter ia lawes ndahi teman-temanna. Iturikenna man teman-temanna e kai si nggo ikataken imam-imam si mbelin ras pertua-pertua.
24 Kenca teman-temanna megi si e, ertoto ia kerina ras-ras man Dibata nina, "O Tuhan, Kam kap si njadiken langit, doni, ras lawit bage pe kerina isina.
25 I bas Kesah Si Badia nggo ngerana Kam arah nini kami Daud PersuruhenNdu, asum nina, 'Ngkai maka merawa ate bangsa-bangsa si deban; ngkai maka ia erbahan rencana si sia-sia?
26 Raja-raja doni nggo ersikap janah kalak si erkuasa nggo pulung guna ngelawan Tuhan Dibata ras Si Engkelini si nggo IpilihNa.'
27 Tuhu nggo pulung i bas kuta enda Herodes, Pontius Pilatus ras bangsa-bangsa si deban bage pe bangsa Israel guna ngelawan Jesus, PersuruhenNdu si Badia, si nggo ItetapkenNdu jadi Raja.
28 Pulung ia guna ndalanken kerina si nggo ItetapkenNdu nai nari alu kuasa ras PeratenNdu.
29 Janah genduari, o Tuhan, perdiatekenlah kuga ancamen nandangi serayanndu, janah berelah kami suruh-SuruhenNdu, guna meritaken KataNdu alu la biar-biaren.
30 Dudurken TanNdu guna pepalem kalak si penakiten janah bahanlah maka jadi tanda-tanda sengget si mbelin i bas gelar Jesus PersuruhenNdu si Badia e."
31 Kenca dung kalak e ertoto, mugur-mugur rumah inganna pulung e. Kerina ia dem alu Kesah Si Badia jenari alu ukur si tetap iberitakenna kata Dibata.
32 Kerina kalak si nggo erkiniteken e ersada ukurna dingen ersada pe penggejapenna. La lit sekalak pe si ngatakenca maka erta-erta si lit i bas ia, si kerajangenna sisada; tapi kerina iraskenna.
33 Alu kuasa si mbelin isaksiken rasul-rasul emaka Tuhan Jesus nggo keke i bas si mate nari. Janah Dibata mereken pasu-PasuNa si mbelin man perpulungen e.
34 La lit sekalak pe si kekurangen, sabap kalak si lit taneh ntah rumahna, idayakenna.
35 Janah duitna iberekenna man rasul-rasul. Jenari ibagiken rasul-rasul man perpulungen rikutken keperlunna sekalak-sekalak.
36 Bage me Jusup si igelari rasul-rasul e Barnabas (ertina anak si nggit nampati), ia kalak Lewi tubuh i pulau Kiprus.
37 Idayakenna tanehna, jenari iberekenna duitna e man rasul-rasul.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA