Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Uned Pétrus idi Yahya pebala nan lemulun ineh, idi imam-imam dengan lun Saduki, idi lun rayeh lun matar Ruma' Allah iné' nedidueh.
2 Ideh museh ngaceku didueh ineh nemada' nelun mula' ratnan Yésus netumui ratnan até, luk mangun ku tanu' ratnan lun maté pana' miak tumui.
3 Idi ideh nengakem nedidueh idi nenipa nedidueh bang tutup macing kenebpa, ngaceku pangeh malem.
4 Iamo' mula' lemulun luk neninger bala ineh manu; idi amung deléi ineh lélé macing limeh ngeribu burur.
5 Idi kenebpa amung lun luk ngimet nelun Yahudi, lun rayeh-rayeh, idi guru-guru Ukum nepamung déi' Yerusalim.
6 Ideh nepegayam dengan Annas Imam Rayeh, Kayapas, Yahya, Iskandar, idi amung lemulun ineh pana' luk ratnan inul Imam Rayeh.
7 Ideh nenganau' rasul-rasul ineh tuped arangdeh, idi ideh nengitun nedidueh, "Kudeng apehké muyuh nengedo' lun luk meliai ineh? Lalud anunké idi ngadan idéké luk pikai muyuh?"
8 Idi pangeh ineh Pétrus luk mepanu' ku Roh Meligan nengor baladeh, keburi'neh, "O muyuh lun ngimet idi lun rayeh teh,
9 kudeng kai ini tinutun aco sini ratnan kekamen luk do' luk inau' kuan lun mét meliai, kudeng apeh lemulun ini pangeh dino',
10 do' amung muyuh kali' idi amung pupu Israil pana', idi dengan ngadan Yésus Keristus, lun Nasarét luk pangeh sinalib muyuh, idi luk tinui Allah rat arang lun naté, ratnan lalud Dieh lemulun ini tuped pa kiung muyuh dengan do'.
11 Surat Allah ngegala' ratnan Yésus ineh, kebalaneh, 'Batu luk tila' muyuh luk mudut ruma', mangun luk Batu Lidung."
12 Idi na luk idi ulun luk meruked bang selemulun luk baken, ngaceku na luk idi ngadan luk baken aput tana' luk pangeh biré Allah kuan lemulun, luk inan tau miak ngalap ulun luk meruked."
13 Kareb lun rayeh ineh nenier kuu' Pétrus idi Yahya, idi ideh nekali' nedidueh lun dat idi na mileh teh, ideh mawa. Idi ideh nekali ratnan didueh ineh lun rurum Yésus atun.
14 Ideh na miak mala anun-anun pana', ngaceku ideh nenier lemulun luk pangeh dino' ineh tuped dengan didueh.
15 Idi ideh nengecuk nedidueh remuat rat bang tebubpun besara' ineh, idi ideh nepegayam arangdeh sebuleng,
16 keburi'deh, "Anunké luk miak ruen tau kuan lemulun ineh? Amung-amung lemulun luk tudo déi' Yerusalim pangeh nekali' kekamen luk inan mawa ini luk inau' didueh. Tau na miak ngalum ineh.
17 Do' tau mebpeng nedidueh na mada' bang ngadan ini kuan seburur pana', pad bala ini na kali' lun baken."
18 Idi ideh nenawar nedidueh idi nemebpeng tu-tu nedidueh aleg pebala idi mada' bang ngadan Yésus ineh.
19 Iamo' kebala Pétrus idi Yahya, "Do' muyuh ngerawé sapehké luk matu pa kiung Allah, maya' pian muyuh kian maya' pian Allah lek.
20 Ngaceku kai na miak ugka' mada' amung luk sinier kai idi luk pindenger kai teh."
21 Iamo' lun rayeh-rayeh ineh metueh mebpeng nedidueh idi ideh nemuit nedidueh, ngaceku na luk idi punneh ideh ngukum nedidueh, ngaceku lun mula' nengerayeh Allah ngaceku ratnan tanu' luk pangeh mangun.
22 Idi ulun lemulun luk pangeh nedo' ratnan tanu' ini, mela apat ngepulu' lak.
23 Kareb Pétrus idi Yahya pinuit, idi didueh iné' matun lun rurum didueh idi nemada' amung-amung luk pangeh bila imam-imam rayeh idi lun rayeh-rayeh pana' kuan didueh.
24 Kareb ideh neninger bala didueh, idi ideh nengitang kuan Allah dengan sebuleng niat idi sembayang, kesembayangdeh, "O Tuhan, Iko luk nemudut langit idi tana' idi abpa' rayeh idi amung uangdeh,
25 Iko nepebala dengan Roh Meligan dengan dila' tepun kai Daud demulunMu ineh, kudeng ini, 'Ngudehké amung lun pupu baken megateh niat; ngudehké amung pupu nepegayam mo'-mo'.
26 Idi amung-amung raca' bang tana' netumui, idi lun luk ngimet pana' nepamung sikal metueh ratnan Tuhan idi KeristusNeh.'
27 Matu bang bawang ini Herodés idi Pontius Pilatus nepamung dengan lun pupu baken idi pupu Israil pana' sikal metueh ratnan Yésus DemulunMu luk meligan ineh, luk inumauMu mangun ku Keristus.
28 Ideh nepamung nganau' amung-amung luk Iko pangeh nengeletep maya' lalud idi pianMu.
29 Nekini, O Tuhan, nier kudeng apeh ideh ngatot nekai, idi do' Iko maré kuan kai demulun-demulunMu ineh ileh mada' balaMu dengan mekuu'.
30 Natang ticu'Mu idi ngedo lemulun idi nganau' tuda'-tuda' tanu' idi kekamen luk nan mawa dengan ngadan Yésus DemulunMu luk meligan."
31 Kareb ideh pangeh nesembayang, idi luk inandeh tebubpun ineh neruyuh; idi amung-amungdeh mepanu' ku Roh Meligan idi nemada' bala Allah dengan mekuu'.
32 Amung-amung lun manu ineh sebuleng niat idi sebuleng terawé. Na luk idi seburur pana' luk mala binawehneh ieh kuan, iamo' amung binaweh ineh bibpatdeh.
33 Dengan lalud luk rayeh rasul-rasul ineh nemada' luk nekali'deh ratnan tui Tuhan Yésus, idi Allah nengutang peruan luk rayeh kuan amungdeh.
34 Seburur pana' nateh luk masi' rat arangdeh. Lemulun luk inan tana' idi ruma' nemasui ineh idi nenguit raganeh,
35 idi ideh nemaré ineh kuan rasul-rasul ineh, idi usin ineh uen mabpat kuan anid-aniddeh maya' ran niatdeh.
36 Idi Yusup seburur lun Liwi luk tinganak déi' Siprus, luk titen rasul-rasul ineh Barnabas (ilungneh "Luk Ngubuk"),
37 nemasui aceh tana' luk ieh kuan, idi nenguit raganeh idi nemaré usin ineh kuan rasul-rasul ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA