Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ipauli si Besaleel ma poti parpadanan humbani hayu nangka, tongah tolu asta ganjangni, tongah dua asta bolagni anjaha tongah dua asta gijangni.
2 Ilampis ma ai pakon omas pitah humbagas pakon hun darat anjaha ibahen ma marlais-lais omas inggot.
3 Ituang ma ompat pinggol-pinggol humbani omas hubani suhini na ompat ai, dua pinggol-pinggol hubani na salopah anjaha dua hubani na salopah nari.
4 Ibahen ma lanja-lanjani humbani hayu nangka anjaha ilapis ma ai bani omas.
5 Isurukkon ma lanja-lanja ai hubagas pinggol-pinggol na longkot bani poti ai laho mangusung poti ai.
6 Ibahen ma sada langkob pardearan humbani omas pitah, tongah tolu asta ganjangni anjaha tongah dua asta bolagni.
7 Ibahen ma dua herub humbani omas na tinopa; ibahen ma ai hubani na dua tampakan ni langkob pardearan ai.
8 Sada herub hubani tampakan na sada, anjaha herub na sada nari, hubani tampakan na sada nari; marsada rap pakon langkob pardearan ai ipauli herub ai bani tampakanni na dua ai.
9 Ipaherbang herub ai ma habongni dompak datas laho manrongkob langkob pardearan ai marhitei habong ni sidea, anjaha padompak bohi ni sidea; dompak langkob pardearan ai do bohi ni herub ai.
10 Ipauli ma meja ai humbani hayu nangka, dua asta ganjangni, saasta bolagni anjaha tongah dua asta gijangni.
11 Ilampis ma ai bani omas pitah, anjaha ibahen martopi omas inggot.
12 Ibahen ma topini santopap bolagni inggot, anjaha ibahen ma homa laisni humbani omas.
13 Ituang ma pinggol-pinggolni ompat humbani omas, anjaha ibahen ma ai hubani suhi-suhini na ompat ai, na bani naheini na ompat ai.
14 Dohor i toruh ni lais ai do pinggol-pinggol ai bahen panurukan ni lanja-lanja ai laho mangusung meja ai.
15 Ibahen ma lanja-lanja ai humbani hayu nangka, anjaha ilapis ma ai bani omas, ai ma ipakei mangusung meja ai.
16 Ipauli ma parugas sipakeion i atas meja ai: Pinggan bolagni, pingganni, batilni pakon mangkukni bahen panguseian ni galangan siinumon; ipauli ma ai humbani omas pitah.
17 Ipauli ma parsuluhan ai humbani omas pitah, sangkimpal parsuluhan ai itopa, ronsi badanni, dangkahni, boltokni, tungkulni pakon bungani.
18 Onom dangkahni luar hun lambungni, tolu dangkah hun salopah ni parsuluhan ai anjaha tolu dangkah hun na salopah nari.
19 Martolu boltok, songon bunga ni buah pala ganup dangkahni ai marhasoman tungkul pakon bunga, martolu boltok songon bunga ni buah pala ganup dangkahni ai marhasoman tungkul pakon bunga; sonai ma ibahen hubani sangkah na onom ai, na luar hun parsuluhan ai.
20 Tapi ompat do boltok ni parsuluhan ai, songon bunga ni buah pala marhasoman tungkul pakon bunga,
21 anjaha sada tungkul i toruh ni dua dangkah na luar hunjai, sada tungkul use i toruh ni dua dangkah na luar hunjai, anjaha sada tungkul nari use i toruh ni dua dangkah na luar hunjai, ase bani na onom dangkah na luar hunjai ai.
22 Hunjai do luar tungkul pakon dangkahni, ganupan ai ipauli humbani sangkimpal omas pitah.
23 Anjaha ipauli ma suluhni na pitu ai, panurturini pakon pangintopini humbani omas pitah.
24 Humbani satalenta omas pitah do parsuluhan ai ipauli ronsi parugasni ganupan.
25 Ipauli ma anjapanjap pardahupaan ai humbani hayu nangka, saasta ganjangni, saasta bolagni, ase marompat suhi, anjaha dua asta gijangni; luar hunjai do homa tandukni ai.
26 Ilampis ma ai bani omas pitah, sonai homa tutupni, dingdingni inggot pakon tandukni; ibahen do homa marlais inggot humbani omas pitah,
27 anjaha ibahen do dua pinggol-pinggol omas i toruh ni laisni ai bani lambungni na dua ai angkup, bahen panurukan ni lanja-lanja, ase boi marhitei ai usungon.
28 Humbani hayu nangka do lanja-lanja ai ipauli, anjaha ilampis bani omas.
29 Imasak ma homa minak pamminaki na pansing ai pakon dahupa na misbou na so sinampur, mangihutkon hapandeian ni tuhang pulung.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA