Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bezale’el agabay Petthe Parjanjiyan dhari kaju akasia, lanjangnga saratos sapolo sentimeter, lebarra ban tenggina padha sabidak ennem sentimeter.
2 Bagiyan dhalem ban lowarra ekole’e emmas morne ban e sakalenglengnga epobuwi palepet emmas.
3 Saellana jareya pas egabayyagi long-kolong emmas pa’-empa’ kaangguy panyekkadanna kol-pekolla, long-kolong jareya epasang e sokona petthe se pa’-empa’, dhadhuwa’ salaja.
4 Kaju kol-pekolla ekagabay dhari kaju akasia, ekole’e emmas,
5 kol-pekolla jareya emaso’agi ka dhalem long-kolong e gir-penggirra petthe jareya.
6 Petthe jareya pas egabayyagi kodhung dhari emmas morne, lanjangnga saratos sapolo sentimeter ban lebarra sabidak ennem sentimeter.
7 Kodhungnga egabayyagi kerub dhadhuwa’ dhari emmas tempa’an, esaba’ e konco’na kodhungnga, settong salaja. Kerub se dhadhuwa’ jareya daddi settong ban kodhungnga,
8 (37:7)
9 ban epadhep-adhebban, kalembangnga ebarbar notobi kodhungnga petthena.
10 Bezale’el agabay meja dhari kaju akasia, se lanjangnga ballung polo ballu’ sentimeter, lebarra pa’ polo empa’ sentimeter, ban tenggina sabidak ennem sentimeter.
11 Meja jareya ekole’e emmas morne ban e sakalenglengnga epobuwi palepet emmas.
12 Saellana jareya pas epobuwi penggirra meja se lebarra pettong satengnga sentimeter ban epobuwi palepet emmas e sakalenglengnga.
13 Meja jareya egabayyagi keya long-kolong pa’-empa’ kaangguy panyekkadanna kol-pekolla, long-kolong jareya epasang e padduna sokona se pa’-empa’.
14 Long-kolong panyekkadanna kaju kol-pekol jareya epasang e seddi’anna penggirra meja.
15 Kol-pekolla ekagabay dhari kaju akasia se ekole’e emmas.
16 Bezale’el agabay keya reng-pereng, ker-cangker, dhi-gendhi ban la-piala se ekagabaya baddhana anggur tor-ator ka Pangeran, kabbi padha dhari emmas morne.
17 Bezale’el agabay panongko’anna damar dhari emmas morne. Langgan ban gu’-teggu’na dhari emmas tempa’an; bang-kembang rarengganna, iya areya kembang ban bungkella, epamasettong ban gu’-teggu’na.
18 E gu’-teggu’na jareya epobuwi cangka nem-ennem, tatello’ salaja.
19 Saneyap cangkana epasange rarenggan aropa kembang badam tatello’, iya areya kembang ban bungkella.
20 Gu’-teggu’na epobuwi rarenggan aropa kembang badam pa’-empa’, iya areya kembang ban bungkella.
21 Saneyap sapasang cangka e baba’anna epobuwi kembang settong.
22 Panongko’anna damar jareya ban bang-kembangnga sarta ka-cangkana ekagabay dhari emmas bungkol tempa’an se morne.
23 Panongko’anna damar jareya egabayyagi damar papetto’ epagenna’ ban pakakas se eangguya aberse’e sombuna sarta tatagga se ekagabay dhari emmas morne.
24 Panongko’anna damar ban parlengkabanna jareya ekagabay dhari emmas morne se bannya’na tello polo lema’ kilo.
25 Bezale’el agabay mezba pangobbarranna dupa, ekagabay dhari kaju akasia. Mezba jareya masagi empa’; lanjangnga ban lebarra padha pa’ polo lema’ sentimeter, ban tenggina sangang polo sentimeter. É padduna se pa’-empa’ e bagiyan attas epasange dhu’-tandhu’ se masettong ban meja jareya.
26 Bagiyan attassa, bagiyan erengnga se pa’-empa’ ban dhu’-tandhu’na ekole’e emmas morne ban e sakalenglengnga epobuwi palepet emmas.
27 E baba’anna palepet emmas gella’ e bagiyan erengnga se dhadhuwa’ epobuwi keya long-kolong dhadhuwa’ kaangguy panyekkadanna kaju kol-pekolla mezba jareya.
28 Kol-pekolla ekagabay dhari kaju akasia ban ekole’e emmas.
29 Bezale’el agabay keya mennya’na opacara ban dupa morne se ro’om, ecampor akantha mennya’ ro’om.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA