Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Ba’na agabay mezba dhari kaju akasia. Pamasagi, lanjang ban lebarra padha dhuwa’ koma dhuwa’ meter, ban tenggina settong koma tello’ meter.
2 E saneyap padduna se e attas pasange e’-kae’ se asambung ban mezbana. Kabbi kodu ekole’e paronggu.
3 Gabayyagi nay-pennay baddhana abuna gaji se eobbar, kop-sekkop, bung-tobung, pu-garpu ban baddhana apoy. Parabut jareya kabbi kodu ekagabay dhari paronggu.
4 Nganggi’ kaba’ paronggu pobuwi long-kolong pa’-empa’ e paddu babana se pa’-empa’ gabay panyekka’anna kaju kol-pekolla.
5 Kaba’ se la eanggi’ jareya tenggina kodu saparona tenggina mezba, ban kodu le’-le’agi ka mezba bagiyan babana.
6 Agabay kol-pekol dhadhuwa’ dhari kaju akasia se ekole’e paronggu,
7 pas pamaso’ ka long-kolong e penggirra mezba se dhu kalaja e bakto ngosong mezba jareya.
8 Mezba jareya kagabay dhari kaju se ngarongkong, menorot rancana se eduduwagi Sengko’ ka ba’na e attas gunong reya."
9 "Gabayyagi taneyan e sakalenglengnga Tang Kemah, pasange bir-tabir dhari kaen linen se alos. E bagiyan lao’ lanjangnga kodu pa’ polo empa’ meter,
10 cekka’agi ka cangga dimbaga se bannya’na dhu polo meggi’, saneyap cangga pobuwi langgan dhari paronggu keya, tape e’-kae’ ban panyekkadanna e’-kae’na dhari salaka.
11 E bagiyan dhajana pakantha jareya keya.
12 E bagiyan bara’ lanjangnga bir-tabirra dhu lekor meter, pacekka’ ka cangga sapolo meggi’ ban cangga jareya pobuwi langgan sapolo meggi’ keya.
13 E bagiyan temorra, se badha labangnga, lanjangnga bir-tabirra dhu lekor meter.
14 E kangan kacerra labang jareya kodu epobuwi bir-tabir se lanjangnga tong-settongnga ennem koma ennem meter, sarta ngangguy cangga tatello’ se badha langganna tatello’.
15 (27:14)
16 Labangnga pobuwi bir-tabir se lanjangnga sangang meter dhari linen alos se etennon dhari wol bungo, bungo terrong ban mera sarta ngangguy rarenggan solaman. Kaangguy panyekka’anna bir-tabir jareya gabayyagi cangga pa’-empa’ se epacekka’ ka langgan pa’-empa’.
17 Sakabbinna cangga e pakarangan jareya kodu esambung ban palang dhari salaka; ke’-cangke’na kagabay dhari salaka, dineng langganna dhari paronggu.
18 Bir-tabir e sakalenglengnga taneyan jareya lanjangnga pa’ polo empa’ meter, lebarra dhu lekor meter ban tenggina dhuwa’ koma dhuwa’ meter. Bir-tabirra kodu kagabay dhari kaen linen se alos, ban langganna dhari paronggu.
19 Parabut se eangguy e Kemah jareya, sa’-pasa’na Kemah ban sa’-pasa’na bir-tabirra kodu dhari paronggu kabbi."
20 "Parenta’agi ka reng-oreng Isra’il soro ngeba mennya’ jaitun se morne ban se paleng bagus kaangguy damar e dhalemmanna Tang Kemah sopaja damar jareya bisa’a odhi’ terros.
21 Harun ban na’-ana’na kodu ngoros damar dhari ri’-bari’ sampe’ kalagguwanna gu-laggu e kennengnganna Sengko’ hadir, jareya e lowaranna bir-tabir se badha e adha’anna Petthe Parjanjiyan. Parenta reya kodu ejalannagi salanjangnga bi’ oreng Isra’il ron-temoron."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA