Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Teako appasiaraki kabara’ a’balle-balle, siagang teako tulungi tau ja’dalaka assare kasa’biang takontutojeng.
2 Teako katuru’-turukangngi mae ri tau jaia punna a’gau’ ja’dala’ ke’nanga yareka napalekko salai hukkunga lanri assarena kasa’biang takontutojeng.
3 Teako appasimmara’-maraengi ri parannu tau lalang ri pangadelanga, manna pole natukasi-asi anjo tau niadelia.
4 Punna sitabangi nucini’ sapina yareka keledaina musunnu sala oloang, erangi ammotere’ mae ri patanna.
5 Punna tu’guru’ keledaina musunnu lanri battala’na eranganna, tulungi ampaentengi anjo keledaia; teako bakoi bawang kamma anjo.
6 Pakaadeleki panggaukannu mae ri tu kasi-asia punna battui mae ri kau angngerangi parkarana ri pangadelanga.
7 Pakabellai tuduhang takontutojenga, siagang teako pa’biangngi nihukkung mate tau tenaya nasala, lanri tena Kupattojengi tau a’gau’ ja’dala’ kammaya anjo.
8 Teako annarimai doe’ pammuccu’, nasaba’ anjo doe’ pammuccuka napa’jari butai taua mae ri katojenganga siagang napakarugi sikamma tau tenaya nasala.
9 Teako paero’-eroki panggaukannu mae ri bansa maraenga; nuassemmi kasia’na nikanaya a’jari bansa maraeng, saba’ riolo ikau a’jari bansa maraeng tongko ri wattunnu ri Mesir."
10 "Annang taung sallona akkullei nulamungi kokonnu siagang nualle wassele’na.
11 Mingka ri taung makatujua anjo buttaya musti nuboliki bawang. Lalanna anjo taunga takkulleako angngallei apa attimbo kale-kalea ri kokonnu. Boli’mi kamma anjo nanaalle tu kasi-asia, nampa sesanna untu’ olo’-olo’ liaraka. Kamma tomminjo nugaukang mae ri koko anggoro’nu siagang poko’-poko’ zaitunnu.
12 Annangallo akkulleko anjama; mingka ri allo makatujua musti ammari-mariko, sollanna ammari-mari todong olo’-olo’nu, ata-atannu, siagang bansa maraeng anjamaya untu’ ikau.
13 Parhatikangi sikontu apa le’baka Kupau mae ri kau. Teako appakalompoi rewata-rewata maraeng, ba’lalo manna nutappua arenna tena todong nakkulle."
14 "Tunggala’ taung musti pintallungko appare’ passua’-suarrang untu’ ampakalompoA’.
15 Lalang bulang Abib, ri wattu le’baka nipattantu, musti nupakalompoi Passua’-suarrang Roti Tenaya Nammake Pa’gambang, situru’ cara le’baka Kuparentakang mae ri kau, nasaba’ lalannami anjo bulang Abib nanubokoi butta Mesir. Teako angnganrei roti ammake pa’gambang lalang anjo tujua allo passua’-suarrang. Punna battuko anggaukangi ibadanu mae ri Nakke, musti angngerangko passare.
16 Pakalompo tongi Allo Lompo Pakkattoang ri wattunnu appakkaramula angkattoi uru wassele’na kokonnu. Pakalompoi Allo lompo Pa’ballakang Leko’-leko’ ri kala’busang taung, ri wattunna nupasse’re wassele’ koko anggoro’nu siagang koko rappo-rappoannu.
17 Tunggala’ taung, ri wattunna nigaukang passua’-suarrang anjo tallua, sikontu tu bura’nea musti battui anggaukangi ibadana mae ri Nakke, Karaeng Allata’alanu.
18 Teako assarei roti ammakea pa’gambang ri wattunnu assare koro’bang olo’-olo’ mae ri Nakke. Jannana anjo olo’-olo’ nikoro’bangkanga mae ri Nakke lalang nigaukanna anjo sikamma passua’-suarranga takkulleai nuboli’ sa’genna ammuko bari’basa’.
19 Tunggala’ taung musti angngerangko mae ri Balla’Na Karaeng Allata’alanu gandunnu uru nukattoa. Dagenna ana’ gimbalaka yareka ana’ bembea takkulleai nipasipallu siagang dadi’na anronna."
20 "LaKusuroi malaekakKu a’jappa riolo ri dallekannu untu’ anjagaiko lalang pa’jappannu siagang angngerangko mange ri tampa’ le’baka Kupasadia.
21 Parhatikangi siagang musti mannurukiko ri ia. Teako angngewai ri ia, lanri ia suroKu, siagang tena nalanapammopporang kasalannu.
22 Punna mannurukiko ri ia siagang nugaukang sikontu Kuparentakanga, iNakke la’bundu’ angngewai sikontu musunnu.
23 La’lampa rioloi malaekakKu ri dallekannu siagang naerangko mange ri pa’rasanganna tu Amori, Het, Feris, Kanaan, Hewi siagang Yebus, siagang laKuancuru’ ngasengi ke’nanga.
24 Teako anynyombai ri sikamma patung-patung pa’la’langanna ke’nanga siagang teako palembai carana ke’nanga anggaukangi ibadana. Ancuru’ ngasengi anjo sikamma patung-patung pa’la’langanna ke’nanga, siagang tepoki sikamma benteng-bentenna batu napakea ke’nanga untu’ anggaukangi ibadana.
25 Punna anynyombako ri Nakke, Karaeng Allata’alanu, laKubarakkakiko siagang kaparalluang kanrenu siagang inungannu, kammayatompa laKupakabellai sikontu garringa battu ri kau.
26 Tena tubaine ri pa’rasangannu lanalari cera’ yareka tamanang. LaKusareko umuru’ la’bu.
27 Sikamma bansa nubattuia laKupa’jari malla’ ngasengi mae ri Nakke; laKukacoi ke’nanga; sikontu musunnu la’giling ngasengi nampa lari.
28 LaKukaco ngasengi sikamma musunnu; bansa Hewi, Kanaan, siagang Het laKubongkai battu ri dallekannu sollannu akkulle maju.
29 Tena nalaKubongka taba sikali ke’nanga lalanna sitaung, sollanna tena nata’ronang anjo buttaya, siagang tena nabattu sikamma olo’-olo’ sekkeka.
30 LaKubongka tassike’de’-ke’deki ke’nanga, sa’genna angganna’mo jainu untu’ angkoasai anjo buttaya.
31 Sikamma pa’baeng-baenna pa’rasangannu laKupattantui battu ri Tamparang Akaba sa’genna mae ri Binanga Efrat, kammayatompa battu ri Tamparang Tangngaya sa’genna mae ri parang lompoa. LaKusareko koasa mae ri pandudu’na anjo pa’rasanganga, sa’genna akkulle nubongka ke’nanga ri wattunnu maju untu’ angngallei anjo buttaya.
32 Teako appareki parjanjiang siagang anjo taua yareka siagang rewata-rewatana ke’nanga.
33 Teako lappassangi ammantang anjo taua ri pa’rasangannu, sollanna tena nunynyomba ri rewata-rewatana ke’nanga na nudoraka mae ri Nakke. Punna anynyombako mae ri rewata-rewatana ke’nanga, tu’guru’ mako antama’ ri sikko’na kamateanga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA