Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Ja’ ngabarragi sabarang se ta’ bendher, ban ja’ nolonge oreng se sala kalaban nyakse’e barang se ta’ bendher.

² Ja’ ro’-noro’ oreng bannya’ se alako jahat otaba nyakse’e barang se ta’ bendher sampe’ kaadilan pas daddi lopot.

³ Ja’ ada’-bida’agi oreng e dhalem parkara pangadilan, maske se eadili oreng ta’ andhi’.

⁴ Mon ba’na kabendherran nangale’e sape otaba hemarra andhi’na mosona buru sarta posang, giba pabali ka se andhi’.

⁵ Mon hemarra mosona ba’na labu polana berra’ gallu ban-gibanna, tolonge oreng jareya majaga hemarra; ja’ onduri.

⁶ Paadil ka oreng se ta’ andhi’ mon oreng jareya aparkara ka pangadilan.

⁷ Ja’ markara’agi oreng ka pangadilan ban ja’ daddi sababba oreng se ta’ sala sampe’ eokom mate, sabab Sengko’ masthe ngokom oreng se atengka kantha jareya.

⁸ Ja’ narema’an go’-sogo’, sabab go’-sogo’ reya mabuta matana oreng sampe’ ta’ nangale’e barang se bendher ban marogi reng-oreng se ta’ sala.

⁹ Ja’ nganeyaja’an oreng manca; ba’na tao baramma rassana daddi oreng manca, sabab lamba’ ba’na oreng manca keya e Messer."

¹⁰ "Nem taon abidda ba’na olle namenne teggalla ban ngala’ hasella.

¹¹ Tape e taon se kapeng petto’ tana jareya kodu panneng. Sataon jareya ba’na ta’ olle makompol apa’a bai se tombu dibi’ e jadhiya. Dina me’ olle ekala’ oreng se mesken, ban karena me’ olle ekakan burun alas. Pakantha jareya keya kebbunna anggurra ban ka-bungkana jaitunna ba’na.

¹² Nem are e dhalem samenggu ba’na olle alalakon, tape e are se kapeng petto’ ba’na kodu aistirahat, sopaja ebinna, nor-dunorra ban reng-oreng manca se alako ka ba’na ngenneng aistirahat keya.

¹³ Edhingngagi kabbi se ekoca’agi Sengko’ reya. Ja’ nyemba lah-illah laen, la’-mala’ nyebbut nyamana bai ta’ olle."

¹⁴ "Sabban taon ba’na kodu mabadha paraya’an tello kale kaangguy ngormat Sengko’.

¹⁵ E dhalem bulan Abib, e bakto se la etantowagi, ba’na kodu araya’agi Pesta Roti Se Ta’ Eragi’i, carana akantha se la eparenta’agi Sengko’ ka ba’na, sabab e dhalem bulan jareya ba’na ondur dhari Messer. Ja’ ngakan roti se eragi’i saabidda paraya’an se pettong are jareya. Sabban ba’na entar abakte ka Sengko’ kodu ngeba tor-ator.

¹⁶ Raya’agi Pesta Anye e bakto ba’na molae molong hasella teggalla. Raya’agi Pesta Ranggun Dhaun e aher taon e bakto ba’na makompol hasella kebbun anggur ban kebbun wa’-buwa’anna.

¹⁷ Tello kale sataon e bakto ebadha’agi paraya’an jareya, oreng lalake’an kodu dhateng abakte kabbi ka Sengko’, GUSTE Allahna.

¹⁸ Ja’ ngeba roti se eragi’i e bakto ba’na ngurbannagi ebin ka Sengko’. Gajina keban se ekurbannagi ka Sengko’ saabidda paraya’an-paraya’an jareya ta’ olle epangenep sampe’ kalagguwanna.

¹⁹ Sabban taon ba’na kodu ngeba ka padalemmanna Sengko’, PANGERAN, Allahna ba’na, gandum se eketthok ba’na dha’-adha’ kadibi’ e bakto anye. Dagingnga budhu’na dumba otaba budhu’na embi’ ta’ olle eola bi’ aeng sosona korbina."

²⁰ "Sengko’ ngotosa Tang malaekat epajangadha’ana ba’na, epajaga’a ba’na e dhalem parjalanan ban epangeba’a ba’na ka kennengngan se la esadhiya’agi bi’ Sengko’.

²¹ Gateyagi malaekat jareya ban toro’ apa oca’na. Ja’ alaban, sabab malaekat jareya Tang otosan, ban malaekat jareya ta’ kera nyapora pa’-sapa’a ka se alaban.

²² Mon ba’na atoro’ ka malaekat jareya ban ngalakone sabarang se eparenta’agi Sengko’, Sengko’ aperranga ngadhebbana so-mosona ba’na.

²³ Tang malaekat ajangadha’ana ba’na, ngeba’a ba’na ka nagarana bangsa Amori, Het, Feris, Kana’an, Hewi ban Yebus; sa-bangsa jareya bi’ Sengko’ epatompessa kabbi.

²⁴ Ba’na ja’ nyemba ca-arca se esemba sa-bangsa jareya, ban ja’ nerowe tengka polana se nyemba ka ca-arca jareya. Paancor ca-arcana jareya ban pagujur gu-tugu brahalana.

²⁵ Mon ba’na abakte ka Sengko’, PANGERAN, Allahna, ba’na bi’ Sengko’ eberkadana, eberri’ana kakanan tor nom-enoman, ban ba’na bi’ Sengko’ epajauwa dhari samacemma panyaket.

²⁶ E nagarana ba’na bakal tadha’a babine’ se kalabuwan otaba jubeng. Bi’ Sengko’ ba’na epalanjanga omor.

²⁷ Sa-bangsa se eentare ba’na bi’ Sengko’ epatako’a ka Sengko’; ban epasalebbudana kabbi; mosona ba’na bakal abaliya, buru katako’an.

²⁸ Sengko’ madhatengnga nyarowan, sampe’ sa-bangsa Hewi, Kana’an ban Het padha buru sopaja ba’na ngennenga terros maju.

²⁹ Sa-bangsa jareya bi’ Sengko’ ta’ eojuga sakaleyan e dhalem sataon, sabab mon kantha jareya tanana dhaggi’ ta’ taoros, tanto burun alas se lak-galak pas padha dhateng ban ba’na ta’ kellar ngadhebbi.

³⁰ Daddi bi’ Sengko’ sa-bangsa jareya eojuga gan sakone’, sampe’ na’ potona ba’na cokop bannya’ se ngobasa’ana tana jareya.

³¹ Tes-batessa nagarana ba’na bi’ Sengko’ eteptebbagiya dhari Tellok Akaba sampe’ ka Songay Efrat, ban dhari Tase’ Tengnga sampe’ ka sagara beddhi. Ba’na bi’ Sengko’ epangobasa’ana pandhudhu’ e nagara jareya, ban ba’na bisa ngojuk reng-oreng jareya e bakto ba’na maju arebbu’a nagara jareya.

³² Ja’ mabadha parjanjiyan ban sa-bangsa jareya otabana ban lah-illahna.

³³ Reng-oreng jareya ja’ bagi neng e nagarana ba’na, sopaja ba’na ta’ nyemba ka lah-illahna ban agabay dusa ka Sengko’. Mon ba’na nyemba ka lah-illahna sa-bangsa jareya, ba’na tabalusok ka dhalem jebbak maot."

Keluaran

Video Keluaran 23

Ikuti Kami:

KONTAK | PARTISIPASI | DONASI