Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nakanamo Batara ri Musa, "LaKupitujui pole se’re bala Karaeng Mesir siagang ra’ya’na. Le’baki anjo, lanalappassang mako a’lampa. Ba’lalo lanabongka ngasengko battu anrinni.

² Lanri kammana anjo a’bicara mako siagang bansa Israel; suroi ke’nanga appala’ belo-belo bulaeng siagang pera’ battu ri siampi’ balla’na ke’nanga."

³ Batara lampagioki atinna tu Mesir sa’genna lammoro’ pa’mai’ ke’nanga mae ri tu Israel. Na’jari Musa tu sanna’ nipakalompona ri sikamma pagawea siagang ra’yaka ri Mesir.

⁴ Nakana Musa ri karaenga, "Kammaminne kananNa Batara, ‘Kira-kira ri wattu tangnga bangngi la’lampa’ anjappai sikontu butta Mesir.

⁵ Tungga’-tunggala’ ana’ toa bura’nena tu Mesir lamate ngasengi, appakkaramula ri ana’na Karaeng Mesir sa’genna ana’na ata baine padengka gandunga. Kammayatompa sikontu ana’ bungasa’na sikontu olo’-olo’ piaraya lamate ngaseng tongi.

⁶ Ri sikontu Mesir lania’ kalangngerang sa’ra piraung lompo, tenaya nale’ba’ kajariang baji’ riolo kammayatompa ribokoanganna.

⁷ Mingka ri bansa Israel tena nalaniganggu, baji’ rupataua kammayatompa olo’-olo’ piaraya. Jari lanuassemmi angkanaya iNakkemi Batara, ampasisalai tu Mesir siagang tu Israel.’"

⁸ Kala’busanna nakanamo Musa, "Sikontu pagaweta labattu ngasengi mae ri nakke siagang lasu’juki ri dallekangku sollanna kubokoi anne pa’rasanganga siagang bansaku. Le’baki anjo la’lampama’." Nampa sanna’mo larrona Musa na nabokoi karaenga.

⁹ Nakanamo Batara ri Musa, "Tena nalanajampangi karaenga kanannu, sollangKu akkulle pila’ jai gau’ malompo Kugaukang ri sikontu Mesir."

¹⁰ Nagaukang ngasemmi Musa siagang Harun sikamma gau’ malompoa ri dallekanna karaenga, mingka nipa’jari kapala batui ri Batara, sa’genna taerokai allappassangi tu Israel ambokoi Mesir.

Keluaran

Video Keluaran 11

Ikuti Kami:

KONTAK | PARTISIPASI | DONASI