Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nabarakkakimi Allata’ala anjo Nuh siagang sikamma ana’na na Nakana, "Ammana’-manakko siagang accucu-cucuko nu’jari jai, sollanna akkulle sossorannu napammantangngi sikontu linoa.
2 Sikontu jangang-janganga siagang jukuka kammayatompa olo’-olo’ maraengannaya lamalla’ ngasengi ri kau. Yangasenna anjo ke’nanga nia’ ngasengi lalang kakoasannu.
3 Yangasenna anjo akkullei a’jari kanrenu, sangkammaya tompa lamung-lamung moncongbuloa; yangasenna anjo Kupassareangi ri kau untu’ a’jari kanrenu.
4 Tena ruanna takkullea nukanre, iamintu dageng niaka ija cera’na, nasaba’ anjo nyawaya niaki lalang ri ceraka.
5 Sikamma taua siagang olo’-olo’ ammunoa rupatau laKuhukkung matei.
6 Anjo rupataua nipa’jari sangkamma iNakke; lanri kammana anjo, inai-nai ammuno rupatau, kalenna lanibuno tongi ri rupataua.
7 Jari, ikau musti ammana’-manakko siagang accucu-cucuko nu’jari jai, sollanna akkulle sossorannu napammantangngi sikontu linoa."
8 Nakana Allata’ala mae ri Nuh siagang sikamma ana’na,
9 "Kamma-kamma anne apparekKa’ parjanjiang mae ri kau ngaseng siagang sossorannu,
10 siagang mae ri sikontu apa-apa attallasaka, iamintu jangang-janganga siagang sikontu olo’-olo’ niaka ri bontoa, bodona kana sikontu anjo assuluka battu ri anjo kappalaka siagang ikau.
11 Iaminne parjanjiangKu mae ri kau: A’janjiA’ angkanaya sikontu apa-apa attallasaka tenamo nalaKuancuru’ siagang a’ba lompo. Tenamo nalania’ a’ba lompo angngancuruki anne linoa.
12 A’jaria pammatei ri parjanjiang satunggu-tungguna Kupareka mae ri kau siagang mae ri sikontu apa-apa attallasaka,
13 iamintu laKuboliki taraweKu ri rammanga, a’jari pammatei parjanjiangKu mae ri linoa.
14 Kere-kere wattu, punna Kutongko’ langika siagang rammang, nampa kacinikang anjo tarawea,
15 laKuu’rangi janjingKu mae ri kau siagang mae ri sikontu apa-apa attallasaka, iamintu angkanaya tenamo nalaniancuru’ sikontu apa-apa attallasaka ri a’ba lompoa.
16 Punna kacinikang tarawea ri rammanga, laKuciniki siagang laKuu’rangi parjanjiangKu satunggu-tunggua mae ri sikontu apa-apa attallasaka ri lino.
17 Iaminjo pammatei parjanjiangKu, ia Kupassareanga mae ri sikontu apa-apa attallasaka ri lino."
18 Ana’-ana’na Nuh ia naaganga assulu’ battu ri kappalaka iamintu: Sem, Yafet siagang Ham. (Ham iami manggena Kanaan.)
19 Anjo tallua ana’na Nuh, iami boe-boena sikontu taua ri lino.
20 Anjo Nuh jama-jamanna iamintu pamarri. Iami uru-uru appare’ koko anggoro’.
21 Le’baki Nuh angnginungi anggoro’na, sa’genna nasa’ring. Napasulu’ ngasengi sikontu care-carena nampa tinro assolara’ lalang ri kemana.
22 Ri wattunna Ham, iamintu manggena Kanaan, naciniki manggena assolara’, assulukammi nampa napauang anjo ruaya sari’battanna.
23 Jari angngallemi Sem siagang Yafet silawara’ juba na napaka’rang ri salangganna ke’nanga. Nampa a’jappa ammono’boko ke’nanga antama’ ri anjo kemaya na nakalimbuki manggena ke’nanga siagang anjo jubaya. Assailemi accini’ maraeng ke’nanga sollanna tanacinika anjo manggena ke’nanga assolara’.
24 Ri wattunna angngu’rangimo ammotere’ Nuh, na naasseng apa nagaukanga ana’ bungkona mae ri kalenna,
25 nakanamo, "Cilaka laloi Kanaan! La’jari ata kaminang tunai mae ri sikamma sari’battanna.
26 Nipujimi Batara, Allata’alana Sem! Kanaan la’jari atai mae ri Sem.
27 Poro Natambai barakka’Na Allata’ala mae ri Yafet iamintu Natambai luara’na pammantanganna. Poro sipammantangngangi sossoranna siagang sossoranna Sem. Kanaan la’jari atai mae ri Yafet."
28 Le’ba’na kajariang anjo a’ba lompoa, attallasa’ iji Nuh 350 taung sallona.
29 Umuru’na 950 taung nampa mate.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA